Bakı türklərlə anlaşılmazlığı yoluna qoydu. Ancaq suallar qalır

Bakı/30.05.21/Turan: Mayın 30-da gecəyarısı AZƏRTAC Şuşada incəsənət məktəbi üçün bina tikilməsi barədə Türkiyə Milliyyətçi Hərəkat Partiyasının rəhbəri Devlət Bahçəlinin təklifilə bağlı dünənki anlaşılmazlıqla əlaqədar prezidentin köməkçisi Hikmət Hacıyevin geniş izahatını dərc edib.

Ötən gün Türkiyə millətçilərinin lideri Türkiyədə partiyadaşları arasında toplanmış vəsait hesabına Şuşada belə bir məktəbin tikilməsi planı barədə məlumat verib. Türkiyə partiyasının niyyəti hələ də ermənilərin işğalı altında olan ərazilərdə kəskin reaksiyaya səbəb olub.

Separatçıların qondarma "Xarici İşlər Nazirliyi" Türkiyə millətçilərinin "Azərbaycanın işğal etdiyi ərazidə" nəsə tikməsinin yolverilməz olduğunu bəyan edib. Türklərin təşəbbüsünə separatçıların reaksiyası Bakıda diqqətsiz qalıb. Lakin gözlənilmədən Bakıda bildiriblər ki, türklərin təqdim etdiyi layihə Azərbaycan tərəfin xoşuna gəlməyib və bu da ermənilərin xeyinə olub.

Belə olduqda Devlət Bahçəli bina tikmək niyyətindən imtina etdiyini və donorların təqdim etdikləri vəsaitin tezliklə onlara qaytarılacağını bildirib. Nəticədə, Bakı türk memarların layihəsilə razılaşmamaq barədə əvvəlki qərarı təcili olaraq ləğv edib.

“Milliyyətçi Hərəkat Partiyasının sədri Devlət Bahçəli tərəfindən hədiyyə olaraq Şuşa şəhərində Üzeyir Hacıbəyli adına incəsənət məktəbinin inşa edilməsi təşəbbüsü Azərbaycan tərəfdən minnətdarlıqla qarşılanıb”, - Azərbaycan prezidentinin köməkçisi, Prezident Administrasiyası xarici siyasət məsələləri şöbəsinin müdiri Hikmət Hacıyev bildirib.

O deyib ki, mayın 27-də prezident İlham Əliyev Türkiyənin milli təhsil nazirini qəbul edərkən bildirib ki, Türkiyə prezidenti Rəcəb Tayyib Ərdoğanın Şuşaya gözlənilən səfəri çərçivəsində Türkiyə tərəfindən təklif edilmiş bir hədiyyə kimi məktəbin təməlqoyma mərasimi səfər proqramına daxil edilib.

“Mütəxəssislər səviyyəsində incəsənət məktəbi binasının memarlıq layihəsinin Şuşa şəhərinin özünəməxsus arxitektura üslubuna uyğunlaşdırılması məqsədilə işçi müzakirələrin aparılması təklif olunub.

Bu xoşniyyətli təşəbbüsün məqbul görülməməsi əsla müzakirə mövzusu deyil. Məsələnin mahiyyəti barəsində tam dolğun məruzə olunmamasının anlaşılmazlığa səbəb olduğu istisna edilməyə bilər. Əminik ki, qarşılıqlı anlaşma şəraitində texniki memarlıq xarakterli məsələlər işçi səviyyədə həll olunaraq, Üzeyir Hacıbəyli adına Şuşa incəsənət məktəbinin tezliklə inşasına başlanılacaq”, - prezidentin köməkçisi bildirib.

Hacıyevin bəyanatından belə təəssürat yaranır ki, Azərbaycan tərəfi qədim Şuşanın tarixi görünüşünün qorunub saxlanmasına qayğı ilə yanaşır. Ola bilsin ki, Türkiyənin layihəsi Şuşa şəhər memarlığına hansısa şəkildə ziddir. Ancaq Bahçəlinin parlament tribunasındakı çıxışı zamanı təqdim etdiyi layihəni nəzərdən keçirəndə  görünür ki, türk memarların işi Şuşanın tarixi görünüşünə hörmətlə yerinə yetirilib.

Belə olan halda anlaşılmazlıq yaranır: Şuşada yeni məscidin tikintisilə bağlı prezident Əliyevin  düşündüyü və onun təklifi ilə icra edilən memarlıq planı şəhərin tarixi görünüşünə nə dərəcədə uyğundur? Utramüasir, Moskvadakı Yuri Qaqarin abidəsini xatırladan yeni məscidin layihəsi orta əsr Azərbaycan şəhərinin memarlıq üslubuna ziddir.

Ortaya başqa suallar çıxır. Niyə Bakıda Şuşa şəhərinin baş planı üzərində iş Azərbaycanın tarixi şəhərsalma xüsusiyyətlərini daha yaxşı bilən azərbaycanlı və ya  türk memarlara yox, ingilis şirkətinə həvalə edilib? Tender keçirilməyib, müsabiqə rəqabətliliyinə yaxın heç nə olmayıb.

Zəngin potensiala malik Azərbaycan memarlarının Qarabağda miqyaslı bərpa işlərindən kənarda qalmasının səbəbi nədir?--0--