Cinayətkarlıq Silahlı Qüvvələrin yalnız bir birləşməsində artır?

““Son 10 ildə ilk dəfədir ki,  Azərbaycan Silahlı Qüvvələrində cinayətlərin sayının artması  rəsmən etiraf edilib”. Bu barədə “Doktrina” Jurnalistlərin Hərbi Araşdırmalar Mərkəzinin direktoru Cəsur Sümərinli ölkənin hərbi prokuroru Xanlar Vəliyevin Hərbi Prokurorluğun birinci yarımilin yekunlarına həsr olunmuş iclasındakı çıxışını şərh edərkən bildirib.

X.Vəliyevin sözlərinə görə,  Müdafiə Nazirliyinin digər ordu birləşmələrində törədilmiş cinayətlər azaldığı halda, III ordu birləşməsində cinayətlərin sayı 21,2 faiz artıb.

Maraqlıdır ki, bu ilin 6 ayında  həmin hərbi birləşmədə itkilərin sayı ötən illə müqayisədə eyni səviyyədədir -  10 nəfər həlak olub və bir o qədər yaralanan olub. Odur ki, cinayətlərin sayının artması digər cinayət əməlləri ilə bağlıdır.

C.Sümərinlinin rəhbərliyi ilə “Doktrina” Jurnalistlərin Hərbi Araşdırmalar Mərkəzi güman edir ki, III ordu birləşməsində baş verənlər bu birləşmənin komandiri general-leytenant Rövşən Əkbərovla müdafiə naziri Səfər Əbiyev arasındakı ziddiyyətlə bağlıdır.

Bu ilin yanvarında  əsgər Ceyhun Qubadovun müəmmalı ölümü ilə bağlı R. Əkbərova şiddətli töhmət elan edilmişdi. Bu ölüm hadisəsi ciddi ictimai rezonans doğurmuşdu və yanvarın 12-də Bakıda kütləvi etiraz aksiyasının keçirilməsinə səbəb olmuşdu.

Bəzi KİV-in məlumatına görə, R.Əkbərov iyulun 26-da hərbi parada dəvət almayıb. Yalnız şəxsən ölkə rəhbərliyinə müraciətindən sonra paradda iştiraka nail olub.

“Doktrina” güman edir ki, R.Əkbərov gizli şəkildə müdafiə naziri postu uğrunda mübarizə aparır və onun birləşməsində cinayətkarlığın artması barədə bəyanatlar  R.Əkbərovu neytrallaşdırmaq cəhdidir.

 X. Vəliyevin çıxışından bu qənəatə gəlmək olar ki, bu gün Silahlı Qüvvələrdə aşağıdakı istiqamətdə cinayətlər diqqəti çəkir:

- hərbi qulluqçular arasında qarşılıqlı münasibətlərin nizamnamə qaydalarını pozma;

- fərarilik hallarının artması;

- maşınları idarəetmə və istismar qaydalarını pozma.

“Doktrina”nın iyulun 26-na olan məlumatına görə, Azərbaycanın

 təhlükəsizlik və müdafiə sektorunun itkiləri 55 nəfər təşkil edib. Ötən müddətdə 71 nəfər yaralanıb və ya xəsarət alıb. Müvafiq dövrdə dünyalarını dəyişənlərin 8-i döyüş (8 nəfər erməni gülləsi), 47-i isə qeyri-döyüş itkiləridir.  

6 nəfər bədbəxt hadisədən (suda boğulma, yıxılma, tank altında qalma, yanma, elektrik cərəyanı vurma), 11 nəfər avtoqəzadan,  3 nəfər vertolyot qəzasından, 2 nəfər naməlum səbəbdən,  1 nəfər ehtiyatsızlıqdan, 1 nəfər mülki şəxs tərəfindən, 6 nəfər qeyri-nizamnamə (qanunazidd) hərəkətlərindən, 6 nəfər xəstəlikdən dünyasını dəyişib. 11 nəfər intihar edib.

  Maraqlıdır ki, X. Vəliyev intiharların sayının artması barədə danışmayıb. “Doktrina” bildirir ki, bu ilin ilk 6 ayı ərzində orduda baş verən intihar hadisələrinin sayı 2012-ci ilin müvafiq dövrü ilə müqayisədə ən azı 15 faiz çoxdur.

“Doktrina” Jurnalistlərin Hərbi Araşdırmalar Mərkəzi bəyan edir ki, təhlükəsizlik və müdafiə sektoruna ayrılan vəsaitin kəskin artırılmasına, Silahlı Qüvvələr üçün böyük həcmdə silah ə hərbi texnikanın alınmasına baxmayaraq, Azərbaycan Silahlı Qüvvələrində durum gərgin olaraq qalır.

  “Müdafiə Nazirliyi rəhbərliyinin 20 ilə yaxın dövrdə eyni vəzifələri bölüşməsi, idarəetmənin sağlam olmaması, hərbi qulluqçuların sosial təminatının aşağı səviyyədə olması, zabit və gizirlərin məvaciblərinin onların sosial yaşayışına kifayət etməməsi, hərbi qulluqçular arasında sağlam tabeçilik münasibətlərin olmaması, qanunların işləməmısi orduda cinayətlərin sayının kəskin artmasının əsas səbəblərindəndir”, -  C. Sümərinli bildirib.

Əgər hakimiyyət orduda ciddi dəyişikliklər istəyirsə, dərhal Səfər Əbiyev başda olmaqla Müdafiə Nazirliyinin rəhbərliyini istefaya göndərməli, ciddi islahatlara başlamalıdır.

  “Əgər bunlar edilməsə, hər hansı bir dəyişiklik kosmetik xarakterlidir və Azərbaycan vətəndaşını aldatmağa, ölkənin milli təhlükəsizliyinə ciddi təhdidlər yaratmağa yönəldilib”, -C.Sümərinli vurğulayıb.—06D-