Deputatlar hökumətin elm və bələdiyyələrə münasibətindən narazıdır

Bu gün parlamentin elm, mədəniyyət, sosial siyasət, regional məsələlər, beynəlxalq münasibətlər və parlamentlərarası əlaqələr, eləcə də insan haqları komitələri 2013-cü ilin dövlət büdcəsinin parametrlərini müzakirə ediblər. 

 Maliyyə naziri Samir Şərifovun sözlərinə görə, teatrlara 9,8 mln manat, kinoya 6,5 mln, ailə, uşaq və gender bərabərliyinə 1,2 mln, ombudsman aparatına 1,5 mln ayrılacaq. Siyasi partiyalar üçün də vəsait ayrılıb və proqnoz 13 noyabrda plenar iclasda səsləndiriləcək. 

 Qeyd edək ki, beynəlxalq miqyasda tanınmağa iddia edən filmin orta büdcəsi (qonorar daxil) $70-80 mln-dur. Yaxşı bir tamaşa $ 5-6 mln-a başa gəlir. Gələn il milli mədəniyyətin inkişafında əsas rolu büdcədənkənar vəsaitlər (əsasən Heydər Əliyev Fondunun vəsaiti, məqsəd onun prezidentinin əhəmiyyətini yenidən vurğulamaqdır) oynayacaq. 

 Səfirlik və konsulluqlar da daxil, xarici təmsilçiliklərə 61 mln manat ayrılıb. Diplomatların maaşı 15-40% artıırlıb. Beynəlxalq tədbirlərin keçirilməsinə 50 mln büdcə vəsaiti xərclənəcək. 

 Bu yaxınlarda yaradılan Elmə Dəstək Fondu üçün 7 mln, bədii əsərlərin latına keçirilməsi proqramı üçün 5 mln, tələbələrin təhsili üçün 88,5 mln manat, böyrək çatışmazlığı xəstələri üçün 25,8 mln, hemofiliaylı xəstələr üçün 21,2 mln, bədxassəli şiş xəstələri üçün 25,1 mln, şəkər xəstələri üçün 33,7 mln, vərəm və yoluxucu xəstəlik daşıyıcıları üçün 5 mln manat xərclənəcək. 

 Deputatlar bir sıra iradlarla büdcə layihəsini bəyəniblər. Yevda Abramovun sözlərinə görə, sosial perspektivin olmaması ərəb ölkələrində gəncləri inqilaba təhrik etdi. O, hökumətə təklif etdi ki, mənzil probleminə ciddi yanaşsın. 

 Arif Rəhimzadənin narazılığına səbəb regional inkişaf konsepsiyasındakı nöqsanlar idi. «Büdcənin desentralizasiyasından danışanda hökumət yerli özünüidarə orqanlarının rolunu nəzərə almır. Bələdiyyələr icra orqanlarından asılı olduqları üçün heç bir yerli problemi həll edə bilmir. İKT, sənaye, tikintiyə vəsaitlərin artırılmasını alqışlamaq lazımdır, amma elmi yanaşma və yerli özünüidarə orqanları olmasa, layihələrə tələbat olmayacaq və ya yarımçıq olacaq», - deyə o bildirib. --17D—