Dillər Universitetinin auditi: ciddi ittiham nədən xəbər verir?

Hesablama Palatasının dövlət büdcəsinin mərkəzləşdirilmiş xərclərindən “Təhsil” bölməsi üzrə Azərbaycan Dillər Universitetinə ayrılmış büdcə vəsaitlərinin proqnozlaşdırılması və istifadə olunması üzrə auditin nəticələrini açıqlanıb.

Palatanın rəsmi saytının məlumatına görə, universitetin məsul şəxsləri tərəfindən vəzifə səlahiyyətlərindən sui-istifadə hallarına, ciddi maliyyə pozuntularına, çatışmazlıqlara, habelə saxtakarlıq və mənimsəmə hallarına yol verilməklə, dövlətə külli miqdarda zərər vurulduğunu nəzərə alaraq, auditin nəticələri üzrə materiallar Baş Prokurorluğa göndərilib. 

Palata həmçinin aşkar edilmiş nöqsan və çatışmazlıqların aradan qaldırılması istiqamətində ciddi tədbirlərin görülməsi məqsədi ilə Dillər Universitetinə təqdimat, Təhsil Nazirliyinə və Milli Məclisə məlumat verilməsini qərara alıb.

Universitetin rektoru Səməd Seyidov Hesablama Palatasının məlumatına şərh verməyib. 

Ancaq müstəqil ekspertlər hesab edir ki, universitetə qarşı sərt audit yoxlaması və sərt tənqid (məsələn, universitetin məsul şəxsləri tərəfindən vəzifə səlahiyyətlərindən sui-istifadə hallarına yol verilib) ya ümumi “dil tapılmaması”nın, ya da sifarişin nəticəsidir.   

Hesablama Palatasının rəsmi saytında dərc olunmuş məlumatların təhlili də dillər universitetinin rəhbərliyinə qarşı “sifarişin olması və ya ümumi dil tapılmaması” barədə şübhələr yaradır. Eyni zamanda, palata indiyədək daha ciddi ictimai narazılıqların olduğu və böyük həcmdə büdcə vəsaitlərini xərcləyən qurumlarda audit yoxlamalarının nəticələri barədə belə kəskin tənqid əks olunmuş məlumatı ictimaiyyətin diqqətinə çatdırmayıb. 

Həm də nəzərə alsaq ki, bir dövlət qurumunun iqtidarda mühüm mövqe tutmuş şəxsin rəhbəri olduğu müəssisəyə qarşı rəsmi sərt tənqidi çox nadir hallarda baş verir, bu amil “sifariş” ehtimalını bir qədər də gücləndirir. Səməd Seyidov İlham Əliyev prezident seçildikdən sonra Milli Məclisin Avropa Şurası Parlament Assambleyasındakı daimi nümayəndə heyətinin sədridir, iqtidarda olan “Yeni Azərbaycan” Partiyasının Siyasi Şurasının üzvüdür. 

İndi isə Hesablama Palatasının diqqəti cəlb edən digər məlumatlarına nəzər salaq. Belə ki, palatanın audit yoxlamaların nəticələri düz çıxan təmir işləri, yol tikintiləri, Əmək və Əhalinin Sosial Təminatı Nazirliyinin yerli strukturları barədə məlumatlar ictimai rəy, KİV-də dərc edilmiş araşdırmalar və nəhayət Korrupsiyaya qarşı Mübarizə İdarəsində istintaqı aparılan cinayət işləri ilə uyğun gəlmir.  

Məsələn, Hesablama Palatası məlumat verir ki, Şabran və Siyəzən rayonlarının yerli icra hakimiyyəti orqanları tərəfindən dövlət mülkiyyətində olan torpaqların istifadə vəziyyətinə, Dövlət Aqrar Universitetinin tədris korpuslarının təmiri və avadanlıqlarla təchiz edilməsinə, Ağstafa Rayon İcra Hakimiyyətinə “Poylu – Xətai – Yenigün – Aşağı Göyşəli” avtomobil yolunun tikintisinə ayrılan vəsaitlərin istifadəsinə, Bərdə Rayon İcra Hakimiyyətinə “Alpout - Mustafaağalı - Qaratəpə - Nazırlı” avtomobil yolunun tikintisinə, Ağdam rayon İcra Hakimiyyətinə “Quzanlı-Xındırıstan-Əhmədağalı-Əfətli” avtomobil yolunun tikintisinə, Tərtər rayon İcra Hakimiyyətinə “Bayandur-Poladlı” avtomobil yolunun tikintisinə ayrılan vəsaitlərdən istifadə, Şəki rayonunda Vərəzəd və Zəyzid kəndlərini birləşdirən yolda körpünün yenidən qurulmasına, Nəqliyyat Nazirliyinin “Azəryolservis” ASC tərəfindən Zaqatala və Qax Yol İstismar İdarələrinə yolların saxlanılması üçün ayrılan vəsaitlərin istifadəsinə dair auditin nəticələri təsdiq edilib. 

Palatanın onlarla belə məlumatlarının təhlili və Dillər Universiteti barədə məlumatda “saxtakarlıq və mənimsəmə hallarına yol verilməklə, dövlətə külli miqdarda zərər vurma” ifadələrinin yer alması “ala qarğanı” harada axtarmağın lazımlılığını bir daha diqqətə gətirir. Təbii ki, dillər universiteti ilə bərabər digər dövlət strukturlarının da ciddi auditinə ehtiyac var. Müstəqil müşahidəçilər Hesablama Palatasının özünün də auditə ehtiyac olduğunu vacib sayır. Çünki, palatanın binası qarşında hər gün dayanan işçilərə məxsus minik avtomobillərinin ictimai auditi göstərər ki, əmək haqları ilə müqayisədə “çox bahalı”dır. -03B-