Əli Həsənovun redaktorlara məsləhəti

Ötən şənbə günü Mətbuat Şurasında ölkənin aparıcı KİV təmsilçilərinin Prezident Administrasiyasının ictimai-siyasi məsələlər şöbəsinin müdiri Əli Həsənovla görüşündə ölkədə dövrü mətbuatın yayımı problemləri müzakirə olunub. Görüş Mətbuat Şurasının “Nazir-redaktor dialoqu”  layihəsi çərçivəsində təşkil edilib.

“Azərbaycan” qəzetinin baş redaktoru, deputat  Bəxtiyar Sadıqov qeyd edib ki,  yayımla əlaqədar problem heç də müstəqil, iqtidaryönlü və müxalifət qəzetlərinin üzləşdikləri ayrı-ayrı çətinlik kimi dəyərləndirilməməlidir. Bu məsələ onların hər biri üçün aktualdır. B.Sadıqov nəşrlərin yayımından çoxsaylı qayıdışın olduğunu deyib. Bu isə satış nöqtələrinin azalması ilə bağlıdır. Yollardakı köşklər götürülüb. Haradakı köşk var, olanlarda sanki qəzet çatmır. Azərbaycanın kəndlərinə isə qəzet ümumiyyətlə gedib çıxmır. 

“Bütün bunlar eyni zamanda maddi sıxıntılara yol açır ki, son nəticə peşəkar jurnalist kadrların bu sahədən uzaqlaşmalarına səbəb olur. Bu gün qəzet öz əməkdaşına kifayət qədər əmək haqqı verə bilmirsə, sabah həmin vəziyyət ümumən söz və mətbuat azadlığı ilə bağlı məsələlərə də öz təsirini göstərəcək”, - B.Sadıqov  bildirib.

“Yeni Müsavat” qəzetinin baş redaktoru Rauf Arifoğlu əsasən nəşrlərin səyyar satışında yaranan problemi qabardıb. Bu sahədəki məhdudiyyətin rəhbərlik etdiyi qəzetin satışına mənfi təsir göstərdiyinə dair faktları açıqlayıb. “Eurovision-2012” ərəfəsində metro stansiyalarındakı stendlərin yığışdırılması da “Yeni Müsavat”a ziyan vurub. 

R.Arifoğlu iqtisadi çətinliyin spesifik cəhətlərindən biri kimi reklam məsələsinə toxunub. O, reklamların KİV-lərdə bölüşdürülməsi məsələlərinin tənzimlənməsinə ehtiyacın olduğunu vurğulayıb. Baş redaktor həmçinin müxtəlif bölgələrdən yayım firmalarına məxsus qəzet köşklərinin yerlərinə qaytarılmasının vacibliyindən söhbət açıb.

“Azadlıq” qəzetinin baş redaktor müavini Rahim Hacıyev da əsasən reklam məsələsi üzərində dayanaraq təmsil olunduğu 8 min tirajlıq nəşrə nəyə görə reklam verilməməsinin anlaşılmaz qarşılandığını diqqətə çatdırıb. Müstəqil mətbuatın mövcudluğunun hamı tərəfindən dəyərləndirilməsinin vacibliyinə toxunan R.Hacıyev ölkənin mediadakı problemlərin aradan qaldırılması üçün iqtisadi plüralizmin mövcudluğunu vacib cəhət kimi önə çəkib. 

“Ayna-Zerkalo” qəzetinin baş redaktoru Elçin Şıxlı dövlət elan və reklamlarının ümumi reklamların çox az qismini təşkil etdiyinə toxunaraq əsas potensial reklamçıların digər təşkilatlar olduğunu bildirib. Onun sözlərinə görə, bir çox sahələrdə inhisarçılıq mövcud olduğundan inhisar sahibləri qəzetlərə reklam verməyi düşünmürlər də. Həmin problemlər aradan qaldırılmalıdır. 

“Bakinksi raboçi” qəzetinin baş redaktoru Rəhman Hacıyev eyni zamanda “1news.az” saytına da rəhbərlik etdiyini bildirərək qəzetdən fərqli olaraq saytda reklamlarının həddən artıq çoxluğunu önə çəkib. Əsas məsələ odur ki, qəzetlərə reklam verilmir. Bu isə hansısa inhisarçı fəaliyyətlə bağlı deyil, onların yayımı ilə əlaqədar. Əgər qəzetlər oxucuya müntəzəm şəkildə çatdırılsalar, reklam verənlər də onlara maraq göstərəcək. 

“Super market” qəzetlər qrupunun rəhbəri Etibar Bağırov əsasən səyyar satış işinin gücləndirilməsinin vacibliyini bildirərək əldə yayımın eyni zamanda qəzetlərin təbliği baxımından da vacibliyini önə çəkib. 

“Qaya” Mətbuat Yayımının rəhbəri Xanhüseyn Əliyev rəhbərlik etdiyi firmanın paytaxtdakı, eləcə də ölkənin bir sıra yerlərindəki köşklərinin götürüldüyünü  xatırladıb. O, qəzet yayımında mühüm rol oynayan təşkilatın vəziyyətinin nəşrlərin satışına da mənfi təsir göstərdiyini vurğulayıb və bu durumun aradan qaldırılmasının zəruriliyini deyib. 

“Xalq qəzeti”nin baş redaktoru Həsən Həsənov isə çıxışında bildirib ki, əsas məqam reklam yolu ilə qəzetlərin durumunun yaxşılaşdırılmasıdır və nəşrlərin reklamlarla təmin edilməsinin konkret mexanizminin formalaşması hər cəhətdən faydalıdır. Baş redaktor qanunvericilikdə dövlət təşkilatlarının büdcəsinin bir faizinin informasiya təbliğat məsələlərinə yönləndirilməsi prosedurunun tətbiqinin nəzərdən keçirilməsinin vacibliyini vurğulayıb. 

Öz növbəsində Əli Həsənov medianın problemlərinin həllinin Azərbaycan dövləti üçün prioritetliyini bildirərək səslənən təkliflərin ümumiləşdirilmiş formada müvafiq qurumlara çatdırılacağını deyib. O, metro stansiyalarında qəzet stendlərinin yerləşdirilməsi məsələsinin tez bir zamanda həllinin mümkünlüyünü ifadə edib. Digər məqamlarla əladəqar söz açan PA rəsmisi bildirib ki, hər bir rayon icra başçısı və ya hansısa bölgəyə məsul şəxs həmin yerin inkişafı məsələsinə müxtəlif cür yanaşır. Bəziləri hesab edirlər ki, qəzet köşkləri ümumi görünüşə xələl gətirir, bəziləri başqa cür düşünür. 

Hər bir halda bu kimi məsələlər müzakirələr yolu ilə həllini tapmalıdır. Haqqında söhbət açılan və “Reklam haqqında” qanunda dəyişikliyin nəzərdə tutulması ilə əlaqədar təklifə gəlincə, Ə.Həsənov da hesab edib ki, dövlət qurumlarının elan və reklamlarının yalnız rəsmi mətbuatda dərcinə dair müddəa aradan qaldırıla bilər. 

O, Mətbuat Şurasının elan və reklamların bölüşdürülməsi ilə bağlı Türkiyə təcrübəsini öyrəndiyini və bununla bağlı məsələlərə Azərbaycan dövlətinin də dəstək verdiyini bildirərək mövcud istiqamətdə ayrıca qurumun formalaşdırılmasının mümkünlüyünü diqqətə çatdırıb. 

Bütün dünyada qəzetlərin satışdan çox reklamlardan gəlir əldə etdiyindən söhbət açan Ə.Həsənovun sözlərinə görə, əgər Azərbaycanın KİV-ləri bu axara düşə bilsələr, onlar üçün məhsullarının satışı o qədər də önəm daşımayacaq. 

Şöbə müdiri hazırkı dövrdə İnternet nəşrlərin ənənəvi medianı sıxışdırması ilə bağlı tendensiyanın aktual səciyyə daşıdığından söz açaraq bunu həm də texnoloji hadisə kimi dəyərləndirib. O, ölkə KİV-lərini vəziyyətlə ayaqlaşmağa, daha çox özlərinin İnternet resurslarını təkmilləşdirməyə çağırıb.

Görüşün sonunda qərara alınıb ki, Mətbuat Şurası səslənən təklifləri ümumiləşdirsin və KİV təmsilçiləri adından dövlət rəhbərliyinə müvafiq müraciət ünvanlansın. 06D--