Əli Kərimlinin qaynının məhkəməsi başlayır

“Texnikabank”ın Yasamal filialının rəhbər müavini, 42 yaşlı Elnur Seyidovun işi üzrə cinayət işi uydurmadır və siyasi motivlidir. Bu barədə RATİ-də bugünkü mətbuat konfransında E.Seyidovun vəkilləri bildiriblər. Onların sözlərinə görə, E.Seyidov Ə.Kərimlinin müxalifətçi fəaliyyətinə görə siyasi sifarişlə təqib olunur.

E.Seyidovun barəsində istintaq başa çatıb və martın 14-də Bakı Ağır Cinayətlərə dair Məhkəmədə hazırlıq iclası təyin edilib.

E.Seyidov ötən il martın sonlarında həbs olunub. “Texnikabank”ın Müşahidə Şurasının rəhbəri Etibar Əliyev də daxil olmaqla, bankın bir neçə əməkdaşı cinayət məsuliyyətə cəlb edilib.

E.Seyidov dələduzluqda, israfçılıq, vəzifə səlahiyyətini aşmaqda ittiham olunur.

Lakin vəkil Əsabəli Mustafayevin sözlərinə görə, E.Seyidovun konkret nədə təqsirli bilindiyi cinayət materiallarından məlum deyil. “O, nə vətəndaşlara, nə də banka hər hansı maddi ziyan vurmayıb”, - vəkil vurğulayıb.

Bütün ittihamlar E.Seyidova qarşı yalan istifadə vermiş hansısa iki müştərinin ifadələri üzərində qurulub.

Vəkil həmçinin bu iş üzrə istintaqın prokurorluq və polis tərəfindən deyil, MTN tərəfindən aparılmasının qanunauyğun olmadığını bildirib.

Onun sözlərinə görə, real istintaq hərəkətləri aparılmayıb.

Müdafiə tərəfi qanunsuz həbslə bağlı Avropa İnsan Hüquqları Məhkəməsinə şikayət verib. Lakin Ə.Mustafayev təəssüflə qeyd edib ki, Strasburq məhkəməsi Azərbaycan üzrə işə baxılmasını yubadır.

Digər vəkil Fəxrəddin Mehdiyev də istintaq zamanı qanun pozuntusuna yol verildiyini qeyd edib. O, E.Seyidovun səhhəti ilə bağlı ciddi problemlərin olduğuna diqqəti yönəldib. O, onurğa və əsəb sistemi xəstəliyindən əziyyət çəkir.

E.Seyidovun işğənələrə məruz qalması ilə bağlı sualın cavabında “ağır xəstə adamın həbsdə saxlanması özü elə işgəncədir” cavabını verib.

Bundan əvvəl bəzi KİV bildirib ki, bankda həbslər İrana qarşı maliyyə sanksiyalarının pozulmasına bağlılıqla əlaqədar aparılıb və hakimiyyət bu işdən əməliyyatlara aidiyyatı olmayan E.Seyidovun həbsində istifadə edib. Belə ki, E.Seyidov AXCP sədri Əli Kərimlinin qaynıdır.  –16C--