Əlövsət Əliyev: Bakı miqrantların hüququna etinasızdır

2012-ci ildə Azərbaycan hökuməti əmək miqrantları üçün 11970 nəfərlik kvota qoyub. NMR üçün isə 1000 yer müəyyən edilib. Amma əmək miqrantlarının sayı dəfələrlə çoxdur. Bu gün Beynəlxalq Miqrasiya günü ilə bağlı dəyirmi masada Miqrasiya Mərkəzinin rəhbəri Əlövsət Əliyev məlumat verib. 

Onun sözlərinə görə, bu sahədə real statistika gizlədilir. Məsələn, Əmək Nazirliyinin inspeksiyası və Dövlət Miqrasiya Xidməti müəssisələrdə 200-300 qeydiyyata alınmayan əmək miqrantı müəyyən edəndə işəgötürənləri bir pozuntu faktı üzrə cərimələyir. 

İşəgötürənlər əcnəbi işçilər üçün icazə almaqda maraqlı deyil, çünki dövlətə vəsait ödəmək istəmirlər. Rəsmi müqavilə olmaması miqrantların hüququnun pozulması ilə nəticələnir. 

Digər tərəfdən, DMX bir çox miqrantları leqallaşdırmır. Əliyevin məlumatına görə, son ildə miqrasiya qurumuna 70 min nəfər müraciət edib. Hər dördüncü şəxs rədd cavabı alıb, cərimələnib və deportasiya edilib. 

DMX onları məmnuniyyətlə cərimələyir, çünki vəsaitin dörddə biri onun sərəncamına keçir.  «Cərimə alınması Miqrasiya Xidmətinin kommersiya fəaliyyətinə çevrilib», - deyə Əliyev bildirib. 

Başqa kateqoriya miqrantların da problemi var. Məsələn, İrandakı siyasi təqiblərdən qaçan azərbaycanlılar faktik olaraq hüquqsuzdurlar.

«2005-ci ildə İrandakı repressiyalardan bura qaçdım. O vaxt mənə qaçqın statusu verildi və iki ildən sonra “yol xəritəsi” vəd olundu. İndiyəcən onu verməyiblər. Heç yerə gedə bilmirəm, Azərbaycanda hərəkətim məhduddur. Mənim kimilər çoxdur. Hətta mobil telefon nömrəsi ala, nikaha girə bilmirik. Azərbaycanda 5 il yaşayandan sonra vətəndaşlıq almaq istədim, rədd cavabı verdilər. Məhkəmə də şikayətimi təmin etmədi. Miqrasiya Xidməti deyir ki, biz miqrant deyilik və 5 ildən sonra Azərbaycan vətəndaşlığı ala bilmərik», - deyə iranlı Nəbi Sultanzadə bildirib. 

Qamsaxurdiyanın hakimiyyəti dövründə Gürcüstandan gələnlər də Azərbaycan vətəndaşlığı ala bilmir. Eyni zamanda, onlar daşınmaz əmlak sahibidir, yaşayış yerində qeydiyyatları var və Azərbaycan ordusunda xidmət edirlər. 

Dəyirmi masada iştirak edən BMT-nin Qaçqınların İşi üzrə Komissarlığının rəhbəri Daq Siqurdson (Dag Sigurdson) qeyd edib ki, qaçqınların problemi onun Azərbaycan rəsmiləri ilə görüşü zamanı diqqət mərkəzindədir. 

Görüşdə miqrantların mədəniyyət cəmiyyətlərinin - əfqanların, çinlilərin və çeçenlərin problemləri də müzakirə edilib. –06D-