Əmiraslanovun işi üzrə şahidlər dolaşığa düşdülər

Cümə axşamı Sabirabad rayon məhkəməsində 2010-cu ilin may-iyun daşqınından ziyan çəkənlərin hüquqlarını müdafiə edən “Kür” vətəndaş cəmiyyəti qərargahının fəalı İlham Əmiraslanovun cinayət işi üzrə məhkəmə iclası keçirilib. 

Əmiraslanov AR CM-in 228.1-ci (odlu silah və döyüş sursatlarının saxlanması, daşınması) maddəsi ilə ittiham olunur. Bu maddə iki ilədək icbari iş və ya üç ilədək azadlıqdan məhrumetmə cəzası nəzərdə tutur. O, iyunun 8-də “Makarov” tapançası və onun güllələrini saxlamaqda ittiham olunub. Əmiraslanov əvvəlcədən bildirib ki, silah onun üzərinə qəsdən atılıb, etirafları isə işgəncə altında edib.

Məhkəmənin iclası 15.30-a təyin edilib, amma bir saat gecikmə ilə başlayıb və 3,5 saat davam edib. DİN-in Mütəşəkkil Cinayətkarlığa qarşı Mübarizə İdarəsinin (MCMİ) iki əməkdaşının və iki şahidin ifadələri dinlənilib.

MCMİ əməkdaşı Rüstəm Səfərov bildirib ki, Əmiraslanovun saxlanılması üzrə əməliyyat onun odlu silah daşıması haqqında məlumat əsasında həyata keçirilib. İyunun 8-də üç əməliyyatçıdan və iki xalq şahidindən ibarət qrup Bakıdan Sabirabada yola düşüb.

Şahidlər iddia ediblər ki, əməliyyatda yalnız onlar iştirak edib, əlavə qüvvə cəlb olunmayıb, yerli polisə isə məlumat verilməyib.

Şahidlər onun üzərində qəhvə rəngli köynək olduğunu, üzərindən bir qutu siqaret, açılan bıçaq, 1 manat və Makarov tapançası var idi. Amma onlardan heç biri saxlama əməliyyatın başlanmasının, evə baxışın, polisdə protokol tərtib edilməsinin, Sabirabada səfərin, saxlanılan şəxsin Bakıya gətirilməsinin dəqiq saatını söyləyə bilməyib.

Daha sonra ifadələrdə çoxsaylı ziddiyyətlər qeydə alınıb. Məsələn, əməliyyatçılar Əmiraslanovu Əsgərbəyli kəndində evinə gedərkən saxladıqlarını deyiblər, şahid Dərgah Quliyevisə Əmiraslanovun Əsgərbəyli kəndindən çıxarkən saxlandığını iddia edib. Əməliyyatçılar iddia ediblər ki, Əmiraslanov könüllü olaraq tapançanı kəmərindən çıxarıb və onlara verib, şahid Samir Məmmədov isə bildirib ki, Əmiraslanov tapançanı çıxarmağa çalışdıqda qolundan tutublar.

Şahidlər Əmiraslanovun evinin zirzəmisindən tapança güllələrini gətirdiyini təsvir edərkən dolaşığa düşüblər və bir-birinə zidd ifadələr veriblər. 

Dindirmə protokolu Sabirabad rayon polis binasının ikinci mərtəbəsindəki kabinetdə saxlanılan şəxsin, üç əməliyyatçının və iki şahidin iştirakı ilə tərtib edilib. Xalq şahidi Samir Məmmədov bildirib ki, protokol tərtib edildikdən dərhal sonra özü onu oxuyub və imzalayıb, Dərgah Quliyev isə bildirib ki, protokolu əməliyyat qrupunun rəhbəri Rövşən Camalov oxuduqdan sonra imzalayıb.

Hər iki xalq şahidi iyunun 8-də səhər saatlarında təsadüfən idarə binasının qarşısında (bir versiyaya görə birlikdə, digər versiyaya görə ayrı-ayrılıqda) göründükləri zaman əməliyyatda iştiraka dəvət ediliblər. 

Əməliyyatçılar iddia ediblər ki, Əmiraslanov saxlanılarkən hər iki xalq şahidi onun yanında olub.

Vəkil Samir İsayevin əməliyyatçıların Əmiraslanovun silahdan atəş açmayacağından niyə əmin olduqları və niyə şahidlərin həyatını təhlükəyə atdıqları barədə sualına əməliyyatçılar ağlabatan cavab verə bilməyiblər.

Amma ən əsası, vəkilin sözlərinə görə, əməliyyatçılar silahın aşkar edilməsindən dərhal sonra saxlanma və axtarış haqqında protokol tərtib etməyərək və ifadəni hadisə yerində deyil, sonradan polis binasında vəkilin iştirakı olmadan alaraq, Əmiraslanovun hüquqlarını kobud şəkildə pozublar.

Məhkəmə saat 20.00 radələrində bitib. Növbəti məhkəmə iclasının tarixi hələlik məlum deyil. Məhkəmənin gedişini ATƏT-in, Helsinki Vətəndaş Assambleyasının, “Kür” vətəndaş cəmiyyəti qərargahının, Turan agentliyinin, obyektiv.tv hüquq-müdafiə internet portalının nümayəndələri izləyiblər. -0-