Ermənilər Laçından yan keçən yolun tikintisini həyəcanla izləyirlər

Bir aydan artıq müddətə Azərbaycan Laçın şəhərini tamamən öz nəzarətinə qaytaracaq, ermənilər isə Qarabağla Ermənistan arasında onlar üçün çəkilmiş yeni yolla hərəkət edəcəklər. Rusiya sülhməramlıları da oraya yerləşdiriləcək. 

Yeni yol Laçın və Zabuh (erməni dilində Ahavno) qəsəbələrindən keçən mövcud marşrutu əvəz edəcək. Bu 9 (10) noyabr 2020-ci il tarixli üçtərəfli bəyanatın 6-cı bəndilə müəyyən edilib.

Fevralda Azərbaycan Avtomobil Yolları Dövlət Agentliyinin İdarə Heyətinin sədri Saleh Məmmədov bildirib ki, Laçından yan keçən yol bu ilin iyuluna qədər istifadəyə veriləcək. “28 kilometrlik yol Laçın rayonunun altı kəndini birləşdirəcək. Artıq 17 kilometrlik hissə və Həkəri çayı üzərində körpü tikilib”, - Məmmədov deyib.

Aprelin 21-də Azərbaycan Avtomobil Yolları Dövlət Agentliyi öz rəsmi saytında layihənin texniki xarakteristikasını açıqlayıb: “Yeni avtoyolun uzunluğu 32 kilometr olacaq. Layihəyə əsasən ikizolaqlı yolun hərəkət hissəsinin eni 7 metr, yol zolağının  eni  12 metr olacaq. İşlərin bu il başa çatdırılması üçün tikintiyə lazımi qüvvələr cəlb edilib”, - agentlikdən qeyd olunub.

Yolun tikintisinə 2021-ci ilin avqustunda başlanılıb. Erməni kəndlərinin icmalarının rəhbərləri Yerevan KİV-ə bildiriblər ki, işlərdə ermənilər iştirak etmirlər. Onlar  tikintini uzaqdan müşahidə edirlər.

Şuşa rayonunun Kiçik Qaladərəsi (Xin Şen - erm.) kəndinin nümayəndəsi  Manvel Sarkisyan deyib ki, bir aya yaxındır ki, azərbaycanlı işçilər kəndin yaxınlığında fəal tikinti işləri aparırlar.

Onun sözlərinə görə, azərbaycanlılar oradan yan keçərək tikintini Mets Qaladərəsi (Mets Şen - erm.) kəndi və Xankəndidə mövcud tras istiqamətində davam etdiriblər. Təxminən bir həftədən sonra oraya da çatacaqlar. O, may ayına qədər işlərin (trasa qoşulma) tamamlanacağını istisna etmir. “Bakının yarısı burada işləyir, əgər hər kəs əlinə heç olmasa bir çömçə götürsə, yol tez tamamlanacaq”, - Sarkisyan deyib.

“Kavkazskiy uzel”in blogeri tikintiyə dair qısa videoçarx çəkib. Oradan görünür ki, erməni sakinlər yeni yolun Qarabağ ermənilərinə fayda və ya zərərilə bağlı fikir ayrılığı içindədir. Onlardan biri “Yaşayarıq, görərik” deyir.

Reportajdan görünür ki, yerli ermənilər tikinti zonasındakı meşələri qıraraq öz ehtiyacları üçün odun aparırlar. Eyni səbəbdən ermənilər yerdən köhnə su borularını qazırlar.

Erməni bloger deyir ki, azərbaycanlı inşaatçılar mühafizə xidməti olmadan işləyirlər, yerli ermənilər azərbaycanlılarla ünsiyyət qurur. “Mets Şen və Xin Şen kəndlərinin sakinləri hər gün bu yoldan keçirlər, yol isə texnika və təmirçilər tərəfindən bağlanıb. Ya çox uzun müddət gözləmək lazım gəlir, ya da azərbaycanlılara yaxınlaşıb keçmək üçün birdəqiqəlik yolu açmağı xahiş etməlisən. İnşaatçıların xətrinə onlar keçid üçün hər hansı xüsusi maneçilik törətmirlər. Hətta dedilər ki, bir dəfə maşın xarab olub dayanıb, gəlib işə salmağa kömək ediblər...”,- Xankəndidən bloger yazır. O bildirir ki, hazırda Laçında cəmi bir neçə erməni ailə qalıb və onlar şəhəri rus hərbçilərilə birlikdə tərk edəcəklər.

www.kavkaz-uzel.eu/blogs/83785/posts/53837

2025-ci ildə Rusiya sülhməramlı qüvvələrinin Qarabağın erməni əhalinin olduğu hissəsində qalmasının beşillik müddəti bitir. Üçtərəfli bəyanata əsasən bu müddətin bitməsinə 6 ay qalmış tərəflərdən biri sülhməramlıların missiyasını növbəti beş il müddətinə uzatmaq istəmədiyini bəyan edə bilər.

Azərbaycanlı rəhbərlər müxtəlif çıxışlarında işarə edirlər ki, 2025-ci ildən sonra rusiyalıların Qarabağda qalma müddəti uzadılmayacaq. Lakin erməni tərəfi bildirir ki, ruslar Qarabağda qalmalıdırlar, çünki bu regionda ermənilərin təhlükəsizliyinə yalnız onlar zəmanət verirlər. Ermənistan müxalifəti Azərbaycanın Qarabağda yeni yollar inşa etməsindən Paşinyana qarşı siyasi arqument kimi istifadə edir. “Azərbaycan siyasi, diplomatik və hərbi təzyiqlərlə yanaşı, həm də Arsax və Sünik ətrafında öz kommunikasiya məngənələrini sıxmaqla erməni dövlətlərinə qarşı infrastruktur təzyiqlərini davam etdirir...

…Qeyd edək ki, Bakı bu əsas yeni yolların tikintisini 2024-cü ilə qədər başa çatdırmağa çalışır. Görünür, Rusiya sülhməramlılarının mandatı başa çatana qədər Azərbaycan infrastruktur baxımından hazır olacaq və həm Rusiyanı, həm də Ermənistanı fakt qarşısında qoyacaq.

“Ermənistanda hakimiyyət dəyişməyincə, bu problemlərin dərindən dərk edilməsi mümkün olmayacaq. Seçkilər yolu ilə hakimiyyət dəyişikliyi nəticə vermədi və biz hamımız bir millət olaraq vaxt itiririk, Azərbaycan isə həm də infrastrukturla “silahlanır” və Arsaxı, Ermənistanı həm də kommunikasiya ekspansiyasına məruz qoymaq niyyətindədir”, - teleqram kanalı yazır.