Ermənilər Qafqazın cənubunu tərk edirlər

Bakı/01.02.21/Turan: Ermənilər Ermənistandan və Qarabağdan köçürlər. Müharibə başa çatıb, amma cəmiyyət arasında hərbi əməliyyatların bərpa edilməsi qorxusu qalmaqdadır, sosioloq Samvel Manukyan belə hesab edir. O əmindir ki, həm ölkə daxilində, həm də onun hüdudlarından kənarda hər yolla vəziyyəti gərginləşdirməyə çalışan qüvvələr var. Bundan əlavə, üçtərəfli bəyanat imzalandıqdan sonra Azərbaycanla sərhədin uzunluğu və bunun nəticəsi olaraq da həmsərhəd icmaların sayı artıb.

Ekspertin fikrincə, qeyri-müəyyən hərbi-siyasi vəziyyət, yeni müharibə qorxusu və Türkiyədən gələn təhdid mühacirəti qamçılayan güclü amildir. Amma hakimiyyətdən məyusluq və əlbəttə ki, sosial-iqtisadi vəziyyətin pisləşməsi də kifayət qədər mühüm amillərdir.

Manukyan hesab edir ki, əhali köç edərsə, əksəriyyət Rusiyaya gedəcək. Statistikaya görə, Ermənistandakı ailələrin təqribən 20%-nin məhz bu ölkədə əmək miqrantı var.

O, vəziyyəti qaranlıq 90-cı illərlə müqayisə edib, həmin vaxt insanlar doğma yurdlarını tərk edib gedirdilər. Qeyd edək ki, Milli Statistika Xidmətinin məlumatına görə, 1992-ci ildə Birinci Qarabağ müharibəsi zamanı 230 minə yaxın insan ölkəni tərk edib.

“Sərhədlər açılsa, vəziyyət isə yaxşıya doğru dəyişməsə, təxmini qiymətləndirmələrə görə, 150 min ölkə vətəndaşı Ermənistanı tərk edə bilər”, deyə Manukyan koronavirusa görə Ermənistanın sərhədlərinin bağlı olduğu günlərdə xəbərdarlıq etmişdi.

“İndicə aeroportdan gəlirəm. Rusiya reyslərinə bu qədər ajiotajlı tələbat heç vaxt olmayıb. Ermənistanı son 30 ilin ən böyük mühacirəti gözləyir, hətta ötən əsrin 90-cı illərində belə bir şey olmayıb”, deyə Ermənistan Milli Məclisinin deputatı Naira Zoqrabyan Yerevan mətbuatına bildirib.

Zoqrabyan bu rekord həddə miqrasiyanın səbəblərini belə açıqlayıb: “Birincisi, müharibə. İkincisi, ermənilər artıq öz ölkələrində özlərini təhlükəsiz hiss etmirlər. Üçüncüsü və ən əsası, Ermənistanda iqtisadi vəziyyət həddindən artıq ağırdır”.

“... Ümumi atmosferdən görünüyü qədər, Ermənistanda sadəcə olaraq demoqrafik böhran yaşanacaq...”, deyə “Çiçəklənən Ermənistan”dan olan deputat vəziyyətə diqqət çəkib.

“Təkcə bu gün, fevralın 1-də Yerevandan Rusiyaya 6 reys uçub, bunların 4-ü Moskvaya uçub. İlk Mineralnıe Vodı reysi saat 7:55-də yola düşüb. Bu, milli faciədir. Bir çox vətəndaşlarımızı artıq biletləri var idi, amma onların koronavirus testi müsbət çıxıb, buna görə, təsəvvür edin, Rusiyaya getmək imkanından məhrum olublar...”, deyə Naira Zoqrabyan qeyd edib.

Gürcüstan erməniləri də regionu tərk etməyə çalışırlar. Bu gün Gürcüstanda sıx yaşayan erməni əsilli vətəndaşlar etiraz aksiyasına çıxıblar və bildiriblər ki, Tbilisi Rusiya və Ermənistanla sərhədləri açana qədər nümayişi davam etdirəcəklər.

2021-ci il fevralın 1-dən Gürcüstan bütün hava sərhədlərini gəliş-gediş üçün açıb. Amma Tbilisidən Moskvaya aviabiletlər Yerevandan olduğundan bahadır, buba görə Axalkalaki ermniləri Tbilisiyə qədər maşınla gedərək, Rusiyaya Yerevandan uçmağa üstünlük verirlər. -0-