Fəallar və siyasi məhbusların ailə üzvləri Beynəlxalq İnsan Hüquqları Gününü qeyd ediblər

Son bir ildə Azərbaycanda insan hüquqları sahəsində vəziyyət pisləşib. Hakimiyyət bu sahədə beynəlxalq öhdəliklərinə riayət etməkdən tamamilə imtina edib. Fərqli düşüncəyə qarşı dözümsüzlük dövlət siyasəti səviyyəsinə çıxarılıb və siyasi məhbusların sayı son 10 ildə ən yüksək səviyyəyə - 160  nəfərə çatıb. Bu barədə şənbə günü Beynəlxalq İnsan Hüquqları Günü ilə əlaqədar keçirilən tədbirdə “Siyasi Məhbuslarsız Azərbaycan” İctimai Alyansının rəhbəri Oqtay Gülalıyev bildirib.

Hakimiyyətin insan hüquqlarına qarşı münasibətinin ən parlaq göstəricisi kimi fəal Beynəlxalq Mətbuat Mərkəzinin bu tədbir üçün zal verməkdən imtinasını göstərib. Eyni zamanda, hüquq müdafiəçilərinə yer verməyə hazır olan digər bir məkanın sahibi polisə çağırılıb və ona təzyiq göstərilib.

Toplaşmaq azadlığı o qədər məhdudlaşdırılıb ki, vətəndaş cəmiyyəti fəallarına və müxalifətə artıq tədbir keçirmək üçün yer də vermirlər.

Vətəndaşları hakimiyyətlə razılaşdırılmış mitinqlərdə iştiraka görə belə təqib etməyə başlayıblar. Referenduma qarşı 17 sentyabr mitinqindən əvvəl də, sonra da 250 nəfər, əksərən AXCP üzvləri saxlanılıb. 27 nəfər inzibati həbslərə məruz qalıb, 5 nəfər cərimə olunub, 5 nəfər işdən qovulub.

İfadə azadlığı sahəsində vəziyyət pisləşir. AXCP sədr müavini Fuad Qəhrəmanlı facebook-da Nardaran hadisələri haqqında statuslarına görə həbs olunub.

Heydər Əliyevin abidəsində şüar yazan gənc fəallar Qiyas İbrahim və Bayram Məmmədov narkotik ittihamı ilə 10 il azadlıqdan məhrumetmə cəzasına məhkum edilib.

Bir çox müxalif və ictimai xadimləri və jurnalistləri İnternetdə sosial şəbəkələrdəki yazılarına görə polisə dindirməyə çağırırlar.

“Azadlıq” qəzetinin maliyyə direktoru Faiq Əmirov həbs olunub, qəzetin buraxılışı isə dayandırılıb.

Son bir neçə həftə ərzində üç jurnalist – Fikrət Fərəməzoğlu, Əlövsət Sadıqov və İkram Rəhimov həbs olunub.

Sentyabr referendumundan sonra Konstitusiyaya və Cinayət Məcəlləsinə prezidentin şərəf və ləyaqətinin onlayn təhqirinə görə cəzaları sərtləşdirən məhdudiyyətlər daxil edilib.

Azərbaycan Ziyalıları Birliyinin sədri Eldəniz Quliyev bildirib ki, hakimiyyətin repressiv siyasətinə yalnız dinc ictimai müqavimətlə qarşı qoymaq olar.

“Özünə hörmət edən hər bir insan imkanları daxilində siyasi məhbusların azad edilməsi uğrunda mübarizə aparmalıdır, çünki növbəti məhbus onun doğmalarından və yaxınlarından biri ola bilər. Ədalətsizliklə barışmaq və razılaşmaq olmaz”, deyə Quliyev bildirib.

Demokratik Qüvvələrin Milli Şurasının üzvü Rövşən Əhmədli də onunla razılaşıb.

Onun fikrincə, siyasi məhbusların sayının 100 və ya 160 olması ilə bağlı mübahisələrə son qoyulmalıdır. “9 milyon ölkə sakininin hər biri potensial siyasi məhbusdur”, deyə o bildirib. Əhmədov deyib ki, bu tədbir üçün ofisini verməyə razılaşdığı üçün onu polisə çağırıblar.

“Mənə deyiblər ki, dövlət çevrilişinə görə həbs olunmuş Taleh Bağırzadəni dəstəkləyirsənsə, dövlətə də qarşı çıxırsan. Onların məntiqi bax, belədir”, deyə Əhmədli qeyd edib.

Siyasi Məhbusları Monitorinq Mərkəzinin rəhbəri Elşən Həsənov Azərbaycanın məhkəmə sisteminin nöqsanlı olduğuna diqqət çəkib.

“Hakimlər daha çox pul verənlərin xeyrinə qərar çıxaran biznesmenlərə çevriliblər. Onlar adi işlərdən qazanırlar, bu imtiyazı siyasi işlər üzrə hakimiyyətin sifarişlərini qeyd-şərtsiz yerinə yetirdiklərinə görə alırlar”, deyə Həsənov bildirib.

Onun fikrincə, belə hakimlərə qarşı ictimai qınaq təşkil edilməlidir.

O, İbrahimov barəsində prokurorun istədiyindən daha çox müddətə həbs hökmü çıxaran Ənvər Seyidovu ən mənfur hakim adlandırıb.

Hakim Əkbər Qəhrəmanov isə “Yeqova şahidləri” icmasının üzvü olan iki qadını azadlıqdan məhrum edib, onlardan biri əlil idi. İş beynəlxalq rezonans doğurduqdan sonra onları azad ediblər.

Həsənov qadınları – siyasi məhbusların analarını, bacılarını, həyat yoldaşlarını təqsirsiz yerə həbs olunanların azad edilməsi uğrunda birgə mübarizə aparmaq üçün ictimai komitələr yaratmağa çağırıb.

Keçmiş müstəntiq Rüfət Səfərovun anası bildirib ki, oğlu hüquq-mühafizə sistemini tənqid etdiyinə görə həbs olunub.

“Eurovision” müsabiqəsi ərəfəsində 29 digər şəxslə birlikdə həbs olunmuş Həsən Səlimxanovun anası deyib ki, onu terrorizmdə ittiham edərək 14 il müddətinə həbs ediblər. Ananın sözlərinə görə, oğlu türk liseyini, İqtisad Universitetini fərqlənmə ilə bitirib, 5 dil bilir.

“Onların heç bir siyalı yox idi, heç bir terror fəaliyyəti ilə məşğul olmurdular. Bütün bunlar Eldar Mahmudovun rəhbərlik etdiyi MTN-in uydurması idi”, deyə Səlimxanova bildirib.

Hətta MTN rəhbərliyinin özünün cinayətlərinin üstü açıldıqdan və əksəriyyəti həbs edildikdən sonra belə onların qurbanları həbsdə qalmağa davam edir. Bu barədə 2007-ci ildə “Səidin qrupu” işi üzrə həbs edilmiş şəxslərin anaları bildirib.

Səid Dadaşbəyli deyirdi ki, ona məhz hazırda həbsdə olan Akif Çovdarov işgəncə verirdi.

Hüquq müdafiəçisi Leyla Yunus da Niderlanddan skayp vasitəsilə konfrans iştirakçılarına qoşulub. O bildirib ki, beynəlxalq forum iştirakçılarına Azərbaycanda siyasi məhbuslar haqqında məlumat verilib və onlar siyasi məhbuslara dəstək üçün müxtəlif aksiyalar keçirəcəklər. -06D-