Fikrət Fərəməzoğlunun press-dosyesi hazırlanacaq

  Jam.az  saytının redaktoru Fikrət Fərəməzoğlunun cinayət işi saxtalaşdırılıb və məhkəmə prosesi göstərir ki, ona qarşı irəli sürülən  ittihamlar əsassızdır. Bu barədə vəkil Elçin Sadıqov çərşənbə axşamı bir sıra KİV və QHT nümayəndələrinin bu məsələ ilə əlaqədar keçirdiyi xüsusi dinləmələrdə bildirib.

F.Fərəməzoğlu 2016-cı il iyunun 30-da restoran sahibindən 3 min manat rüşvət almaqda ittiham olunaraq həbs edilib. Pul alınması faktı  qanunauyğun şəkildə  qeydə alınmayıb, yəni sübut yoxdur, ancaq hansısa şikayətçinin və şahidlərin ərizələrinə əsaslanır.

Jurnalistlərin CM-in diffamasiya ilə bağlı 147 və 148-ci maddələrini əvəzləyən 311, 182 maddələri ilə həbs edilməsi hakimiyyət üçün normaya çevrilib.

“Hakimiyyət tabe olmayan jurnalistlərlə bu cür haqq-hesab çəkir”, - “Xural” qəzetinin redaktoru, 2013-cü ildə analoji ittihamla həbs olunmuş Əvəz Zeynallı bildirib.

Vətəndaş cəmiyyəti fəallarını və jurnalistləri müdafiə etdiyinə görə vəkillik fəaliyyətindən  kənarlaşdırılan hüquqşünas Xalid Bağırov son vaxtlar jurnalistlərin həbs olunmasını qeyd edib. “Trafikinq, fahişəlik mövzularını işıqlandıran ən azı üç jurnalist, o cümlədən Fikrət Fərəməzoğlu həbs olunub”,- o bildirib.

 10 il həbs cəzası təhlükəsi ilə üzləşən F.Fərməzoğlu masaj salonları adı altında fəaliyyət göstərən əxlaqsızlıq yuvaları mövzusunda yazıların dərcindən sonra həbs edilib.  Jurnalistlərdən biri bildirib ki, hələ  həbsdən öncə F.Fərəməzoğluna rüşvət təklif ediblər ki, bu mövzunu bağlasın, ancaq o imtina edib.

Turan İnformasiya Agentliyinin direktoru Mehman Əliyev təklif edib ki, F.Fərəməzoğlunun jurnalist fəaliyyəti haqda press-dosye hazırlansın. Bu, jurnalistin 90-cı illərdə başlayan fəaliyyət dövrünü, yazılarını, həbs, cinayət işi, məhkəməni əhatə edəcək. “Bu, jurnalistin işi ətrafında obyektiv mənzərənin formalaşdırılması baxımından çox vacibdir”, - M.Əliyev vurğulayıb.

Redaktorun xanımı Faiqə Nüsrəti bildirib ki, jam.az  saytının redaksiyası öz işini yeni ünvanla - http://jamaz.info/ bərpa edib. Saytda F.Fərəməzoğlunun məqalələri və işin gedişi ilə tanış olmaq olar”. “Biz təslim olmaq və onun azadlığı uğrunda mübarizəni dayandırmaq niyyətində deyilik”, - o bildirib.

“Siyasi Məhbuslarsız Azərbaycan” İctimai Alyansının koordinatoru Oqtay Gülalıyev dinləmələrin yekunları ilə bağlı Fikrət Fərəməzoğlunun press-dosyesi üzərində işin başlandığını bildirib və onun müdafiəsinin effektivliyinin gücləndirilməsi tədbirlərindən danışıb.—0—