Fransa səfirliyinin viza şöbəsi 5 gün bağlı olacaq

Qəbul şərtlərinin yaxşılaşdırılması məqsədilə aparılan təmir işləri ilə əlaqədar Fransanın Bakıdakı səfirliyinin viza şöbəsi 7-22 sentyabr arasında olan müddətdə 5 iş günü ərzində bağlı olacaq. Dəqiq tarix barədə avqustun 27-dək məlumat veriləcək. Bu haqda Fransa səfirliyinin mətbuat xidmətinin məlumatında deyilir.

Hazırda viza almaq üçün müraciətin təqdim olunması ilə bağlı qəbula görə lazım olan müddət 12 iş gününü əhatə edir. Buna müraciətin baxılması üçün nəzərdə tutulan müddət minimum 5 iş günü əlavə edilir.

Diplomatik və xidməti pasportların sahibləri bazar ertəsindən-cümə gününədək saat 15.00-16.00 arasında viza şöbəsinə müraciət edə bilər. Müraciətin baxılması üçün minimum 2 iş günü lazımdır.

Bunu nəzərə alaraq, viza şöbəsi Fransa səfirliyinin viza verdiyi ölkələrə (Fransa, İspaniya, Portuqaliya, Belçika, Lüksemburq, Niderland) səfər etməyi planlaşdıran şəxslərdən prosedur müddətinin ümumi şəkildə uzanacağının nəzərə alınmasını xahiş edilir.

Bundan əlavə, viza şöbəsi müraciətlərin qəbulu və onlara baxılması imkanlarına uyğun olaraq, qəbulların sayının dəyişdirilməsi imkanını özündə saxlayır.

Viza proseduru ilə bağlı əlavə məlumat almaq üçün http://ambafrance-az.org/ saytına müraciət etmək olar.