Təbriz ərazisində bəyan edildiyindən 5 dəfə çox adam həlak olub

Avqustun 11-də İranın Şərqi Azərbaycan əyalətində baş vermiş zəlzələ zamanı rəsmi hakimiyyətin dediyi kimi, 306 nəfər yox, 1 min 600 nəfər həlak olub. Bu barədə Dünya Azərbaycanlıları Konqresinin (DAK) Daimi Şurasının sədri Əjdər Tağızadə “Obyektiv” TV-yə (obyektiv.tv) müsahibəsində deyib.

Onun fikrincə, İran hakimiyyəti fəlakət zonasına humanitar yüklərin daşınmasını qəsdən yubadır. Dünya birliyindən yardımın qəbulundan imtina vəziyyəti daha da acınacaqlı edir.

Rəsmi Tehran Suriya, İraq, Fələstin və digər ölkələrdə humanitar yardım adı altında şiə hərəkatlarına milyonlarla dollar verir. Eyni zamanda İran hakimiyyəti öz türk əhalisinə göstərilən yardımın qarşısını alır. “Hazırda oradakı vəziyyət Fələstinin yaşayış məntəqələrində olduğundan pisdir”, - Ə.Tağızadə bildirib.

“Təbrizə yardım” ictimai kampaniyasının iştirakçısı Cahangir Yusifin sözlərinə görə, zəlzələ yerində xilasedici briqada yoxdur, odur ki, qurbanların sayının artması ehtimalı böyükdür. Uçqunları təmizləyən yerli sakinlər cəsədlərin çürüməsinin, cəsəd iyinin şahidi olurlar ki, bu da epidemiyanın yayılmasının ilkin əlamətidir. 

Faciə Azərbaycan Respublikasından tutmuş Kanada və Alyaskaya kimi dünya azərbaycanlılarının həmrəyliyinin dərəcəsini üzə çıxardı. Bu, vahid xalqdır və soydaşlarının sevinci də, kədəri də birdir. Əgər milli ruh birdirsə, millətin birləşmə günü də uzaqda deyil”, - Ə.Tağızadə vurğulayıb. -17D—