Gənclər Cümhuriyyət qurucularını tanıdıblar

“Gənclər Klubu” ictimai birliyi “İctimai fəaliyyət və liderlik təlimləri” layihəsinin birinci sessiyasının başa çatması ilə bağlı cümə günü RATİ-də təlim iştirakçılarına sertifikatlar təqdim edib.

Birliyin rəhbəri Z.Əkbər adı çəkilən layihəni Avropa Demokratiyaya Dəstək Fondunun maliyyələşdirdiyini deyib. Təlimlərdə iştiraka qatılmaq üçün 154 gənc müraciət edib, 60 nəfər müsabiqədən keçib. Hər biri 10 nəfərdən ibarət 6 qrup təşkil edilib. Hər qrupa Demokratik Cümhuriyyət (1918-20-ci illər) qurucularından birinin adı verilib. İlin sonunadək davam edəcək layihənin birinci sessiyası başa çatıb. İlk sessiyanın nəticəsi olaraq hər qrup adını daşıdığı cümhuriyyət qurucusu haqda tanıtım təqdimatı keçirib.

Daha sonra qruplar seçki simulyasiyası keçiriblər. Xəyali “Fərziyyəstan” ölkəsinin prezident seçkisi olub. Qruplar prezidentliyə namizədləri irəli sürüblər, seçki kampaniyası hazırlanıb, seçki şüarları müəyyən edilib, təbliğatçılar “seçicilər”in içinə gediblər. Nəhayət, gizli səsvermə yolu ilə keçirilən seçkilərdə Tural Hüseynli “Fərziyyəstan” ölkəsinin prezidenti seçilib. Bu günsə ilk sessiyanı başa vuran təlim iştirakçılarına setifikatlar təqdim olunub. Təlimlərdə iştirakdan sonra bəzi gənclər ictimai qurum yaratmaq barədə düşündüklərini nəzərə çatdırıblar.

İkinci sessiyaya təlim iştirakçılarının qəbul edilməsilə bağlı müraciətlər başlanıb. Artıq 253 müraciət daxil olub. Yenə də hər biri 10 nəfərdən ibarət 6 qrupun təşkili nəzərdə tutulur. -05C-