"Gündəlik Bakı" qəzetinin redaktoru saxlanılıb

Dünən Dövlət Təhlükəsizlik Xidmətinin əməkdaşları "Gündəlik Bakı" qəzetinin redaktoru Habil Vəliyevi saxlayıblar. Bu barədə Turan-a qəzetin redaksiyasının yerləşdiyi "Azərbaycan" nəşriyyatındakı mənbələrdən bəlli olub.

Qəzet əməkdaşları təsdiq ediblər ki, dünən axşam "əməliyyat zamanı" Vəliyev saxlanılıb, amma bunun səbəbi və redaktora qarşı irəli sürülmüş ittihamlar məlum deyil.

Öz növbəsində, DTX hələlik bu məsələ ilə bağlı rəsmi məlumat yaymayıb və DTX-nin İctimaiyyətlə Əlaqələr Mərkəzindən məlumat almaq mümkün olmayıb.

Qeyd edək ki, ötən həftə "Bizim dövran" qəzetinin redaktoru Surxay Əliyev reket ittihamı ilə həbs olunub.

Müşahidəçilər qeyd edirlər ki, DTX-nin əməlləri jurnalist statusundan sui-istifadə edərək, şantaj və pul tələb etməklə məşğul olan şəxslərin fəaliyyətinin qarşısını almaq məqsədi daşıyır.

Maraqlıdır ki, yuxarıda adları çəkilən hər iki nəşr Mətbuat Şurası tərəfindən reket nəşrlər siyahısına salınıb. Bununla belə, onlar barəsində heç bir tədbir görülməyib ki, bu da onları yüksək vəzifəli məmurların "himayə etdiyini" düşünmək üçün əsas verirdi.

Bəzi KİV-lər iddia edirlər ki, yuxarıda adı çəkilən qəzetlər ləğv edilmiş MTN-in hazırda həbsdə olan keçmiş vəzifəli şəxslərinin göstərişi ilə hərəkət edirdilər.

Onlar bu qəzetlərdəki nəşrlərdən biznesmenlərə qarşı qarayaxma kimi istifadə edirdilər.

Bu nəşrlərin əksəriyyətinin ofisləri Azərbaycan Prezident Administrasiyasının nəzarəti altında olan "Azərbaycan" dövlət nəşriyyatında yerləşir.

Azərbaycan Jurnalistlər Birliyinin sədri Elçin Şıxlının fikrincə, bu mətbuatın çiçəklənməsinə hakimiyyət özü şərait yaradıb.

"Mən ümumiyyətlə "reket jurnalistika" anlayışını qəbul etmirəm, çünki bu, jurnalistika deyil. 10-12 il əvvəl güc qurumları rəhbərlərindən biri ilə görüş olub və o, sifarişlə ona və idarəsinə qarşı materiallar yazan belə nəşrlərdən şikayət edib. Həmin vaxt mən dedim ki, lazımsız nəşrləri maliyyələşdirməyə son qoyun və bütün bunlar aradan qalxacaq. Çünki ölkədə hazırki şəraitdə kənardan maliyyə yardımı olmadan heç bir KİV mövcud ola bilmir", deyə Şıxlı bildirib.

"Reket jurnalistikanın" çiçəklənməsinə dövlətin KİV sahəsindəki siyasəti də şərait yaradır. KİV-ə dövlət dəstəyi fondu faktiki olaraq "sədəqə" paylamaqla məşğuldur və alıcıların əksəriyyəti şübhəli məzmunlu məşhur olmayan qəzetlərdir. Onların ictimai rəyə təsiri sıfıra bərabərdir. İctimai rəy artıq çoxdan vətəndaşların özləri tərəfindən sosial şəbəkələr vasitəsilə formalaşır, deyə Şıxlı bildirib.

Media hüquqları sahəsində ekspert Ələsgər Məmmədli hesab edir ki, reket nəşrlərin çiçəklənməsinə yüksək vəzifəli məmurların himayəsi şərait yaradır. O, həmçinin "Azərbaycan" dövlət nəşriyyatında yerləşən ofislərin əksəriyyətini məhz belə "redaksiyalar" tutur. "Reket jurnalistikanın" səbəblərindən biri media qurumlarının qeyri-şəffaf olması, onların maliyyə mənbələri haqqında məlumatın peşə etikasını pozanların real ictimai qınaq instututlarının olmamasıdır -03D06-