«Günəşli» platformasında yanğın 68 gündən sonra söndürülüb

 Yanvarın 10-da axşam saat 20:00-a yaxın Dövlət Neft Şirkəti “Günəşli” platformasında yanğını söndürə bilib.

“Yanğın zamanı quyuağzı avadanlıqların sıradan çıxması nəticəsində quyuların hermetikliyi pozulmuşdu ki, bu da quyuların boğulmasını çətinləşdirirdi. Mövcud texnika və avadanlıqlardan maksimum səmərəli istifadə edilərək əlavə problem yaratmadan yanan quyularda növbə ilə quyuağzı avadanlıqlar dəyişdirilib, quyular məhlul ilə boğulub”, - SOCAR-ın məlumatında bildirilib.

Platformada yanğının uzunmüddətli olması (68 gün) onunla əlaqəli olub ki, yanan quyular qaz-kondensat quyuları olub. Xüsusi maddə ilə qazı söndürmək mümkün olardı, ancaq bu zaman quyudan çıxan kondensat dənizə dağılar və küləkli fava şəraitində bunun yayılma coğrafiyası genişlənər və təbii ki, bu zaman ekoloji fəsadların aradan qaldırılması üçün külli miqdarda xərc tələb olunardı.

Bundan öncə SOCAR rəhbəri Rövnəq Abdullayev bildirib ki, yanğın söndürülən kimi platformada təmir işlərinə başlanılacaq.

“Quyuları təmir etmək üçün 3-4 ay vaxt lazımdır. Yatağı mayın sonuna kimi tam həcmlə istifadəyə verməyə çalışacağıq. Bu yataqdan gündə 1,3 mln. kubmetr qaz və 1000 ton neft hasil olunurdu. Cari ildə illik hasilatın həcmi 500-600 min ton az olacaq”, - R.Abdullayev bildirib.

* 2015-ci il dekabrın 4-də “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılıb, boru kəməri zədələnib və yanğın baş verib. Nəticədə platformada olan 62 nəfərdən neftçidən 30 nəfər platformanı tərk etmək istərkən dənizə düşərək həlak olub. –12B--