Gürcüstan azərbaycanlıları məcəlləyə təkliflər verdilər

Gürcüstan azərbaycanlılarının “Borçalı” cəmiyyəti cümə günü Azərbaycanın Miqrasiya Məcəlləsi ilə bağlı dinləmələr keçirib.

Cəmiyyətin fəalı Kamran Ramazanlı bu məcəllənin bütün Gürcüstan azərbaycanlılarının maraq dairəsində olduğunu deyib. Gürcüstan azərbaycanlılarının Azərbaycana gediş-gəlişi asanlaşdırmaq üçün miqrasiya şərtlərinin sadələşdirilməsi təklifləri irəli sürüblər.  

Məcəllədə əmək miqrantlığı ilə bağlı şərtlərin ağır olmasına narazılıq ifadə olunub. Belə ki, ölkəyə əmək miqrantı kimi gələn şəxs 1121 manat rüsum ödəməli, bundan əlavə, 70-80 manat ödəyərək sağlamlıq arayışı almaq üçün həkimlərdən keçməlidir. Yazıçı Eyvaz Borçalı Miqrasiya Xidmətinin məcəllədə şərtlərin ağır olmasını Gürcüstan azərbaycanlılarının dədə-baba torpaqlarını tərk ermlərinə imkan verməmək kimi şərhini inandırıcı saymayıb. O qeyd edib ki, Azərbaycan hökuməti azərbaycanlıların Gürcüstanda qalmasını istəyirsə, o zaman Gürcüstanda fəaliyyət göstərən Azərbaycan şirkətlərinin Borçalı əhalisilə işləməsini təmin etməldiir. Halbuki, Gürcüstanda fəaliyyət göstərən Azərbaycanın 300-dən çox şirkətindən 2-3-ü Borçalı əhalisilə işləyib, kimlərəsə iş verməyə çalışır. Rusiya ilə sərhədlər bağlı olduğu üçün Gürcüstan azərbaycanlılarının ancaq Azərbaycana gəlmək imkanı olduğu üçün əmək miqrantlığı məsələsində güzəştlər olması təklif edilib. 

Məcəllədə daha bir problem kimi cərimələrin yüksək olması göstərilir. Hazırda bu cərimələr adambaşına 400 manat təşkil edir. Natiqlər hazırda bir ailədən 4 nəfərin belə yüksək cəriməyə məruz qaldığını qeyd edir. Bu cərimələrin minimum əmək haqqının yarım misli həcmində müəyyən olunması təklif edilib. Bu cərimələrin ancaq 18-55 yaş həddində olan şəxslərə şamil olunması məqbul sayılıb.

Azərbaycana gələn əcnəbilərlə azərbaycanlılar arasında fərq qoyulmaması, soydaşlara da əcnəbi kimi yanaşılması qürura toxunan məsələ sayılıb. Buna görə məcəllədə azərbaycanlı miqrantlara uyğun ad qoyulması təklif olunub. 

Daha bir problem kimi Azərbaycanda vətəndaşlıq alınması göstərilib. Valideynlərindən birinin Azərbaycan vətəndaşı olmasına baxmayaraq, övladları vətəndaşlıq ala bilməyən çoxsaylı ailələr olduğu deyilib. Vətəndaş olmadığı üçün bu uşaqlar imtahanlara buraxılmır. Amma bu gənclər Azərbaycan vətəndaşı olmamalarına baxmayaraq, Azərbaycan silahlı qüvvələri sıralarında hərbi xidmətə çağırılıblar. 

Müzakirə edilən məsələ ilə bağlı tədbirdə Gürcüstan əsilli ziyalıların adından parlament spikeri Oqtay Əsədova müraciət ünvanlanıb. -05C-