Həmkarları Rafiq Tağının vəfatının dördüncü ildönümünü qeyd ediblər

Noyabrın 23-də bir qrup jurnalist və vətəndaş cəmiyyəti fəalı publisist Rafiq Tağının vəfatının dördüncü ildönümünü qeyd edib, onun məzarına gül qoyub və iki publisist və bir naşirə "Rafiq Tağı" mükafatı təqdim edib.

"Dalğa" gənclər hərəkatı tərəfindən təsis edilmiş mükafatın 2015-ci il laureatları arasında Kulis.az saytının redaktoru Səfir Ağayar, "Azadlıq" radiosunun oxu zalının redaktoru, yazıçı Nərmin Kamal, "Qanun" nəşriyyatının direktoru Şahbaz Xuduoğlu var.

2012-ci ildə təsis edilmiş mükafat ümumbəşəri və Avropa dəyərlərinin yayılmasında xüsusi olaraq fərqlənənlərə təqdim edilir.

Rafiq Tağı 2011-ci il noyabrın 19-da saat 22:00 radələrində evinin yaxınlığında naməlum şəxsin hücumuna məruz qalıb. Naməlum şəxs onun boynuna, qarnına və çiyninə bir neçə bıçaq xəsarəti yetirib və qaçıb gizlənib. Publisist ağır vəziyyətdə xəstəxanaya yerləşdirilib və üç gün sonra - noyabrın 23-də dünyasını dəyişib.

Peşəcə həkim olan Tağı eksentrik nəşrləri ilə məşhur idi. 2006-cı il noyabrın 15-də o, "Sənət" qəzetində Qərbdə bir sıra nəşrlərdə Məhəmməd peyğəmbərin karikaturalarının dərc olunması ilə bağlı qalmaqala həsr olunmuş "Avropa və biz" essesini dərc edib.

2006-cı il  noyabrın 19-da Rafiq Tağı və "Sənət" qəzetinin baş redaktoru Samir Sədaqətoğlu məhkəmənin qərarı ilə Məhəmməd peyğəmbəri təhqir etmək ittihamı ilə (AR CM-in 283.2.2-ci maddəsi - milli, irqi və dini ayrı-seçkilik) həbs edilib.

2007-ci il mayın 4-də Səbail rayon məhkəməsi onu üç il, Samir Sədaqətoğlunu isə dörd il müddətinə azadlıqdan məhrum edib.

Həbsdən bir müddət əvvəl "Sənət" qəzetində Rafiq Tağının uydurma "Tapdağıstan" ölkəsinin prezidenti haqqında satiruk-erotik hekayəsi dərc edilmişdi.

Bundan sonra Azərbaycanda və İranda radikal dindarlar Rafiq Tağının ölümünü tələb edirdilər. Eyni zamanda, bir qrup Azərbaycan yazıçısı və ictimai xadimi, habelə beynəlxalq təşkilatlar Rafiq Tağının həbsdən azad edilməsi tələbi ilə çıxış edib. 2007-ci il dekabrın 28-də onlar Azərbaycan prezidentinin fərmanı ilə əvf olunub.

Ölümündən iki həftə əvvəl - noyabrın 10-da Tağı dərc etdiyi yeni "İran və qloballaşmanın qaçılmazlığı" məqaləsində yazır dini dövləti dini fanatizmi aşıladığına görə tənqidə məruz qoyub, bundan sonra yenə təhdidlərə məruz qalıb.

Publisistin qətli, jurnalistlərə qarşı bütün digər cinayətlər kimi, indiyədək açılmayıb. - 0-