Hüquq-mühafizə işçiləri KİV-ə dini radikallara qarşı əməliyyatlar haqqında nə yazmalı olduqlarını öyrədəcəklər

Cümə günü parlamentin plenar iclasında deputatlar qanunvericiliyə dini ekstremizmə qarşı mübarizə üzrə dəyişikliklər paketini təsdiq ediblər.

Belə ki, “Dini etiqad azadlığı haqqında” qanuna dəyişikliklər ekstremist fəaliyyət aparan dini qurumların ləğvini nəzərdə tutur.

Qanun layihəsini təqdim edən parlamentin dini qurumlar və ictimai birliklər üzrə komitəsinin rəhbəri Siyavuş Novruzov deyib ki, müxtəlif vaxtlarda Dini Qurumlarla İş üzrə Dövlət Komitəsinin müxtəlif rəhbərləri “öz maraqlarına xidmət edərək”, 719 dini icmanı qeydiyyata alıb.

Söhbət ekstremist fəaliyyəti ilə məşğul olan təşkilatların bağlanmasından gedir”, deyə o bildirib.

Bundan başqa, dini ekstremistlərə qarşı xüsusi əməliyyat həyata keçirən hüquq-mühafizə orqanlarının əməliyyat yerində jurnalistlərin fəaliyyətinə nəzarət etmək hüququna malik olduğu, əməliyyat haqqında məlumatın forma və həcmini müəyyən etdiyi, əməliyyat ərazisinə gedən avtomobil yollarını bağladığı və elektrik enerjisi, su, qaz verilməsini dayandırdığı haqqında düzəliş qəbul edilib.

Qanun layihələrini müzakirə edən deputat Elmira Axundova ekstremist dini qrupları maliyyələşdirən şəxslər barəsində cəzaları sərtləşdirməyi təklif edib. Onun fikrincə, bu qrupların həm iştirakçısı, həm də onları maliyyələşdirən şəxs üçün eyni cəzanın – 3 ildən 5 ilədək azadlıqdan məhrumetmə cəzasının nəzərdə tutulması doğru deyil.

“Ekstremistləri maliyyələşdirən şəxs daha da təhlükəlidir”, Axundova belə hesab edir.

Deputat Fazil Mustafa öz növbəsində dini təbliğatla bağlı xaricdən sifariş yerinə yetirən KİV-in fəaliyyətinə xüsusi diqqət yetirməyi təklif edib.

Deputat Qənirə Paşayeva Azərbaycanın hüdudlarından kənarda dini təhsil almış şəxslərin dini tədbirlər və ayinlər həyata keçirməsinin qadağan edilməsini dəstəkləyib. O, öz fikrini xarici dini təhsil müəssisələrində dini cərəyanlar arasında düşmənçiliyə xüsusi əhəmiyyət verildiyi ilə əsaslandırıb.

Deputat Zahid Oruc isə qeyd edib ki, bəzi ölkələrdə, xüsusən İranın Qum şəhərində dini təhsil ödənişsizdir ki, bu da bizim vətəndaşlarımız üçün həmin təhsili cəzbedici edir.

“Bununla əlaqədar olaraq bizdə, xüsusən Bakı İslam Universitetində də təhsil pulsuz olmalıdır”, deyə o bildirib. -71D-