İctimaiyyət Rafiq Tağının məzarı önündə...

Bakı/05.08.17/Turan: Bu gün yazıçı-publisist Rafiq Tağının 67 yaşı olacaqdı...Əgər 2011-ci ildə "Semaşko" xəstəxanasında müəmmalı şəraitdə dünyasını dəyişməsəydi...

O, küçədə naməlum şəxs tərəfindən 7 bıçaq zərbəsi almışdı, ancaq sağ qalmışdı. Çətin əməliyyatdan çıxmışdı, vəziyyəti yaxlılaşmağa doğru gedirdi, hətta müsahibə vermişdi və sui-qəsddə "İran versiyası"ı barədə bildirmişdi. Və birdən Rafqi Tağının ölüm xəbəri yayıldı. Rəsmi məlumata görə, qəfildən halı pisləşib, qusmağa başlayıb. Ölüm haqda ilkin rəydə səbəb kimi zəhərlənmə göstərilmişdi. Sonradan bu rəy başqası ilə əvəzləndı. Rafiq Tağıya hücum edənlər tapılmadı. Hər dəfə belə hallarda olduğu kimi, rəsmi şəxslər gurultulu bəyanatlar verərək günahkarların cəzalanacağını vəd etdilər. Və sözlə kifayətləndilər, iş dayandı.

İstintaqın məlumatına görə, R.Tağıya hücum edilən yerin yaxınlığında qurulmuş təhlükəsizlik kameraları işləməyib. Ancaq jurnalistlərdən və hüquq müdafiəçilərindən ibarət müstəqil qrup yaxınlıqdakı mağazanın təhlükəsizlik kamerasından qeydləri tapıb istintaqa təqdim etdi. Ancaq bu da kömək eləmədi. İstintaq orqanları nədənsə cinayətkarı "tapmadılar". Ancaq müxalifətin mitinqlərinin keçirildiyi "Məhsul" stadionunun ətrafında quraşdırılmış belə kameraların sayəsində fəalları tapır, üstəlik profilaktik söhbətə çağırırlar.

Qəribə odur ki, R.Tağı özünə qarşı mümkün sui-qəsd barədə bildirdikdən dərhal sonra öldürüldü. Yəqin ki, yazdığı "Avropa və biz" məqaləsindən sonra gələn hədə-qorxularla əlaqədar şübhələnmişdi və düşünürdü ki, bu, radikal fanatiklərin işi ola bilər. Lakin R.Tağının dindən bəhs etməyən digər tənqidi yazıları da vardı.

Adətən mərhum jurnalistlərin, ictimai xadimlərin doğum gününü qeyd etmək üçün onların məzarı önünə gedirik. Bu gün ictimaiyyət R.Tağının məzarı önündə onun xatirəsini yad edib. R.Tağı təkcə yazışı deyildi, həm də jurnalist idi. O, azad sözün daşıyıcısı idi. Anım mərasimində onun qardaşı İlqar Tağı deyib ki, R.Tağı heç bir siyasi hərəkata mənsub deyildi və rejimə tabe deyildi: "Rafiq çox kəskin yazırdı. Çox zaman onun yazdığı məqalələr hazırda baş verənləri əks etdirirdi. Biz onun esse və məqalələrini kitab şəklində dərc etdirməyi planlaşdırırıq. Onları oxuyarkən görəcəksiniz ki, Rafiq bizi xəbərdarlıq etmək istəyirdi və onun o zaman yazdıqları indiki hadisələrdə öz əksini tapır. Onun ölümü təsadüfü deyildi. O, sadəcə, onu öldürən qüvvələr üçün sərfəli deyildi. Ancaq Rafiq ölməyib, o yaşayır".

D18 Hərəkatının başqan müavini Samirə Ağayeva deyib ki, R.Tağının ölümü təsadüfü deyil. O, iki jurnalistin ölümü arasında paralellər aparıb: "Mən hər zaman Rafiq Tağının və Rasim Əliyevin ölümü arasında paralellər aparıram. Hər ikisi eyni xəstəxanada müalicə olunurdu. Hər ikisi baş verənlərdən sonra müsahibə vermişdi və ikisi də qəfildən eyni simptomla öldü. Məncə, onların ölümündə hakimiyyətin izini axtarmaq lazımdır".

D18 Hərəkatının başqanı Ruslan İzzətli bildirib ki, istənilən halda jurnalistlərin, ictimai xadimlərin ölümünə görə hakimiyyət məsuliyyət daşıyır: "Rafiq Tağının adı bəlkə də geniş ictimaiyyətə çox tanış deyil. Vaxtilə Mikayıl Müşviqin, Əhməd Cavadın da adları tanış deyildi. Ancaq vaxt gələcək, onların yazdıqları xalq yaradıcılığına qızıl hərflərlə daxil olacaq. Rafiq Tağının da ölümü açılmamış qaldı, necə ki, Elmar Hüseynovun, Rasim Əliyevin ölümü açılmadı. Çünki hakimiyyətdə İlham Əliyev rejimidir. Ancaq vaxt gələcək, həmin cinayətlərin bütün detalları ictimaiyyətə məlum olacaq. Hakimiyyət birbaşa və ya dolayısı ilə onların ölümündə günahkardır. Çünki bu illər ərzində qatillər cəzalandırılmayıb, qətllərin üstü açılmayıb".