Ölümlə nəticlənən YNH, süst müxalifət və mənasız istefalr

Avqustun 3-də Bakıda H.Əliyev prospektində iki nəfərin ölümünə və daha iki nəfərin yaralanmasına gətirib çıxaran ağır avtomobil qəzası Azərbaycan cəmiyyətində güclü rezonans doğurub, amma ölkə müxalifətindən lazımi reaksiya yoxdur. Bəzi müxalifət liderlərinin facebook-da qəzəbli bəyanatlarını saymasaq, hakim komandanın rəqibləri sanki təqsirkarı MercedesGelandewagen-in sürücüsü - Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənovun nəvəsi Nail Allahverdiyev olan, ölümlə nəticələnən YNH-ni hakimiyyətə bağışlayıb.

Hətta diaspora belə qəzəblənib. İsveçrədə yaşayan Müsavatçı Hacı Hacılı hesab edir ki, müxalifət hakimiyyətdən tam və qeyd-şərtsiz istefa tələb etmək üçün təcili yığışmalıdır. "Harınlamış məmurların övladları Azərbaycanın dövlət təhlükəsizliyini təhlükə altına atır. Bu məmurlar bu gün yollarda uçarkən və insanları əzərkən ayaqlarının altına baxmırlarsa, sabah onlar asanlıqla ölkəni yaxşı pula satarlar", müxalifətçi belə hesab edir.

İyulda həddini aşan digər sürücünün xuliqanlığı bu qəzaya qarşı ictimai rezonansı daha da gücləndirir. Generalın oğlu bahalı maşınla sərnişin avtobusunu ötüb, onu dayanmağa məcbur edib və salona daxil olaraq, avtobus sürücüsünü döyüb.

Prezident təcili generalı işdən çıxarıb, amma Əli Həsənov, qəzadan iki gün keçməsinə baxmayaraq, hələ də öz kabinetindədir. Bu azmış kimi, cəmiyyətdə cinayət məsuliyyətinə cəlb edilmiş Nail Allahverdiyevin bu gün prospektdə qüdrətli fövqəladə hallar naziri Kəmaləddin Heydərovun qardaşı Səməd Heydərova məxsus bahalı Mazda sedan (dövlət nömrə nişanı 99 FS 777) sürdüyü haqqında məlumat yayılıb. Amma ŞYP rəhbərliyi S.Heydərov haqqında məlumatı təkzib edib, "Mazda"nın başqa şəxsə məxsus olduğunu və başqası tərəfindən idarə olunduğunu bildirib.

İcra qurumlarının qəza təqsirkarının yüksək vəzifəli məmurla ailə əlaqəsi olduğunu prezidentdən gizlətməyə çalışmaq cəhdi də başqa bir intriqadır. Nail Allahverdiyev və bu il nazir övladlarının həyasızlığına qarşı sərt çıxış edən Əli Həsənov arasında qohumluq əlaqələri haqqında məlumat əvvəlcə gizlədilir və ya təkzib edilirdi.

İnformasiya texnologiyaları üzrə ekspert Osman Gündüz əvvəl H.Əliyev prospektində qəzanın təqsirkarı haqqında foto və mətn məlumatların şəbəkədən yığışdırıldığını və ya redaktə edildiyini bildirib. Hiss olunurdu ki, hansısa təfərrüatları gizlətmək istəyirlər. Dövlət başçısına yalan məlumat çatdırmağa çalışdıqları istisna deyil. Amma bir müddət sonra DİN rəsmi bəyanatla çıxış edib, ölümlə nəticələnən qəzanın təqsirkarını açıqlayıb. O.Gündüz H.Əliyev prospektinin strateji əhəmiyyətinə diqqət çəkir, bu prospekt üzərində üç müxtəlif dövlət qurumuna - Xüsusi Mühafizə Xidmətinə, DİN-ə və Nəqliyyat, Rabitə və Yüksək Texnologiyalar Nazirliyinə məxsus olan üç videomüşahidə kamerası yerləşdirilib. Bəlkə də orada Dövlət Təhlükəsizliyi Xidmətinin gizli kameraları da var. Belə üçqat və ya dördqat nəzarət olduğu halda bu qurumların rəhbərləri digər nazirlərin İ.Əliyevə həqiqəti çatdıracağını ehtimal edərək, prezidenti aldatmağa risk etməzlər. Nazirlər üçün nə qədər çətin də olsa, onlar prinsipiallıq nümayiş etdiriblər", deyə O.Gündüz iddia edir.

Prezident hər şeyi öyrənəcək. Rezonans doğuran qəzanın olduğu gün İ.Əliyev Azərbaycanın şimal-qərb regionunda səfərdə idi. Şənbə günü axşamdan etibarən və bazar günü o, yəqin ki, istirahət edəcək, bazar ertəsi isə xidməti öhdəliklərinin icrasına qayıdacaq. Əli Həsənovun işdən çıxarılması haqqında fərmanın avqustun 8-də imzalanacağını təxmin edirəm.

Bəs işdən çıxarmasalar necə? O, nazir övladlarının və nəvələrinin həddini aşdığına görə hökumətsiz qala bilməz ki. Bu qədər yeni yaltaqları hardan tapacaq? - deyə Moskvanın "Kavkazskiy Uzel" nəşri sual edir.

Nəşrdə bloq müəllifi prezidentin ən azından ailə üzvləri insanların ölümündə təqsirli olan bir naziri işdən qovacağını gözləyən azərbaycanlıların sadəlövhlüyünə təəccüb edir. "Onlar (azərbaycanlılar - red.) düşünürlər ki, prezident bütün hökumət tərkibini qovsa, onların yerinə qırmızı qalstuklu şərəfli pionerlər gələcək. Məsələ şəxslərdə deyil, rüşvətxorluq və korrupsiyanın tətbiqi üzərində qurulmuş dövlət idarəetmə sistemindədir. Bu sayədə rəhbərlər dövlət büdcəsindən oğurluq etmək üçün insanları necə gəldi tapdalaya bilirlər. 40 dərəcə istidə pencəklərini çıxarmamalarının səbəbi əmək haqları və yüksək mənəvi prinsiplər deyil ki...

Prezident İsveç kraliçası kimi sadə sərnişin təyyarəsində sıravi vətəndaşlarla birlikdə uçanda onun məmurlarının övladları da metroya minəcəklər və vətəndaşları əzməyəcəklər...", deyə Moskva KİV-də bloq müəllifi yazır.