Kamran Əliyev: «Korrupsiya ilə məşğul olan başqa məmurlar da cinayət məsuliyyətinə cəlb olunacaqlar»

Yanvarın 16-da baş prokuror yanında Korrupsiyaya Qarşı Mübarizə Baş İdarəsində ötən il ərzində korrupsiyaya qarşı mübarizə sahəsində görülən işlərlə bağlı mətbuat konfransı keçirilib.

Tədbirdə rəsmi qurumların rəhbərləri və QHT təmsilçiləri iştirak ediblər.

Baş prokurorun müavini, baş prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev bildirib ki, 2016-cı ildə vətəndaşların 9360 müraciətinə baxılıb,  həmçinin 251 cinayət xarakterli material araşdırılıb.

“Araşdırılmış materialların 159-u (63,3%) üzrə cinayət işləri başlanılıb, digər müraciətlər üzrə  müvafiq prokuror təsir aktları tətbiq edilməklə inzibati və intizam tədbirləri görülüb”.

O deyib ki, ötən il Baş İdarənin “161 - Qaynar xətt” əlaqə mərkəzinə 5492 müraciət daxil olub, həmin müraciətlərin 23-ü üzrə Cinayət Məcəlləsinin müvafiq maddələri ilə cinayət işləri başlanılıb.

“2016-cı ildə keçirilmiş 6 əməliyyat tədbiri nəticəsində korrupsiya cinayəti törədən 6 şəxs cinayət başında yaxalanıb, habelə Baş İdarənin əməliyyat qurumları tərəfindən aparılan araşdırmalar üzrə fakta görə 32 cinayət işi başlanılıb. Baş İdarənin əməliyyat qurumları tərəfindən keçirilmiş əməliyyat-axtarış tədbirləri nəticəsində axtarışda olan 24 şəxs tutulub”, -K.Əliyev qeyd edib.

Ötən il Baş İdarədə 2241 vətəndaş qəbul edilib.

“2016-cı ildə korrupsiyaya şərait yaradan halların aradan qaldırılması məqsədilə müvafiq qurumlara 88 təqdimat verilib, habelə digər prokuror təsir aktlarından istifadə edilməklə 12 inzibati icraat açılıb, 11 şəxsə qanun pozuntularından çəkindirmək məqsədilə rəsmi xəbərdarlıq edilib”.

K.Əliyev bildirib ki, ötən il Korrupsiyaya Qarşı Mübarizə Baş İdarəsində 480 cinayət işinin ibtidai istintaqı aparılıb.

Onun sözlərinə görə, onlardan dövlət və özəl sektorda çalışan 313 vəzifəli şəxsin barəsində 201 cinayət işinin istintaqı tamamlanaraq baxılması üçün aidiyyati məhkəmələrə göndərilib.

K.Əliyev qeyd edib ki, hazırda Baş İdarənin İstintaq idarəsinin icraatında 116 cinayət işi üzrə istintaq davam etdirilir. Həmin cinayət işlərindən 110 şəxsin barəsində 62 iş qulluq mövqeyindən istifadə etməklə mənimsəmə və ya israf etmə, 61 şəxsin barəsində 56 iş vəzifə səlahiyyətlərindən sui-istifadə etməklə dələduzluq, 34 şəxs barəsində 24 iş vəzifə səlahiyyətlərindən sui-istifadə etmə və aşma, 52 şəxsin barəsində 10 iş rüşvət alma, 17 şəxsin barəsində 14 iş rüşvət vermə, 3 şəxsin barəsində 3 iş vəzifə saxtakarlığı, 1 şəxsin barəsində 1 iş səhlənkarlıq, 35 şəxsin barəsində 31 iş isə digər faktlarla bağlı olub.

Məhkəmələrə göndərilən cinayət işləri üzrə vurulan 202 milyon 629 manat məbləğində ziyanın 33 milyon 249 manat və ya 16,6 %-nin ödənilməsi təmin edilib, qalan ziyanın ödənilməsi məqsədilə 78 milyon 283 manat məbləğində əmlak üzərinə həbs qoyulub.

Korrupsiyaya qarşı mübarizə üzrə komissiyasının katibi Kamal Cəfərov 2016-cı ildə korrupsiyaya qarşı mübarizə sahəsində hökumətin və parlamentin fəaliyyətindən danışıb.

“Ötən il ölkə üçün genişmiqyaslı islahatlar ili olub. Gömrük və vergi sahələrində şəffaflığın daha da artırılması məqsədilə iqtisadiyyatımızı şaxələndirən islahatlar həyata keçirilib. Eyni zamanda korrupsiyaya qarşı mübarizə üzrə Milli Fəaliyyət Planının 86%-i və açıq hökumətin təşviqi üzrə Milli Fəaliyyət Planının 82%-i dövlət orqanları tərəfindən icra olunub”, -K.Cəfərov qeyd edib.

Tədbirdə QHT-lərin Məlumat və Əməkdaşlıq Şəbəkəsinin koordinatoru - “Konstitusiya Araşdırmalar Fondu”nun prezidenti Əliməmməd Nuriyev, “Transparency International” təşkilatının Azərbaycan üzrə milli bölməsi - “Şəffaflıq Azərbaycan”ın icraçı direktoru Rəna Səfərəliyeva QHT-lərin korrupsiyaya qarşı mübarizədə rolunun vacibliyindən danışıblar.

“İctimai şuraların yaradılması hələ də geniş vüsət almayıb. Bu şuralar şəffaflığın artırılmasına təkan verə bilər”, -Ə.Nuriyev deyib.

R.Səfərəliyeva isə bir neçə tövsiyənin yerinə yetirilməsini vacib sayır.

“Dövlət büdcəsinin xərclənməsində şəffaflıq artırılmalı, Auditorlar Palatasının rolu və büdcəsi genişləndirilməlidir (cəmi 7 auditor var), ixtisaslaşmış korrupsiya qurumları ilə bağlı qanun layihələrinin müzakirəsində vətəndaş cəmiyyətinin iştirakı təmin edilməlidir. Vergi qanunvericiliyinə 202 yeni dəyişiklik və əlavələr edilib. Bu, orta və kiçik biznes üçün çox böyük çətinlik yaradıb. Bu qədər əlavə və dəyişikliyin dərk edilməsi çətindir və bunun üçün maarifləndirmə işləri zəruridir. Bəzi dəyişikliklər isə vətəndaş cəmiyyətini narahat edir”, - R.Səfərəliyeva vurğulayıb.     

Kamran Əliyev suallara cavabda deyib ki, ötən il valyuta mübadiləsi qaydalarının pozulmasına görə 12 iş icraata verilib.

Onun fikrincə, saxta diplomlarla bağlı məsələ aktualdır.

“Lakin bu məsələ ilə bağlı şikayətlərin tendensiyası azalmaq üzrədir. Saxta diplomlar şərti olaraq 2 qrupa bölünür. Birinci qrup diplomların açıq-aydın saxta olması gözlə görünür. İkinci qrup diplomlara isə baxmaqla onların saxta olmasını müəyyən etmək olmur. Vətəndaş işə düzələrkən diplomunu təqdim edir, nəticədə məlum olur ki, diplom saxtadır. Elə diplomlar var ki, 30 il bundan qabaq alınıb (hətta MDB ölkələrindən alınıb), onların saxta olmasını müəyyən etmək çox çətindir. Qeyd edim ki, saxta diplomlarla bağlı Təhsil Nazirliyinin bizə müraciəti əsasında iş aparılır”, - o bildirib

Baş idarə rəisi bildirib ki, Beynəlxalq Bankın 5 filialı, o cümlədən Qazax və Şəki filialları barədə cinayət işinin istintaqı davam etdirilir: “Ötən il ən çox şikayət bank sektoru ilə bağlı olub. Banklarla bağlı 52 cinayət işi istintaq olunub, məhkəməyə göndərilib. Sığorta şirkətlərinin rəhbərləri ilə bağlı 5 cinayət işinin istintaqı aparılıb".

 Korrupsiyaya Qarşı Mübarizə Baş İdarəsinin rəisi Kamran Əliyev jurnalistlərin suallarının cavabında deyib ki, keçmiş rabitə və yüksək texnologiyalar naziri Əli Abbasov dəymiş ziyanı təqsirləndirilmiş şəxs qismində ödəsəydi, indi məhkəmə qarşısında olardı.

Xatırladaq ki, Əli Abbasovun 6,8 milyon manatı dəymiş ziyan kimi ödəməsi barədə məhkəmədə vəkillər vəsatət verib.

K.Əliyevin sözlərinə  görə, Rabitə və Yüksək Texnologiyalar Nazirliyinin əməkdaşları ilə bağlı bir iş məhkəməyə göndərilib, 11 nəfərlə bağlı iş isə ayrıca icraata götürülüb.

K.Əliyev Nazirlər Kabinetinin 2005-ci ildən indiyədək ölkə prezidentinin gəlir bəyannamələrinin nümunələrinin hazırlanmaması barədə sualının cavabında deyib ki, bu məsələ  gündəmdədir: “Bu sahədə təcrübəsi olan beynəlxalq qurumlarla məsləhətləşmələr aparırıq, Bir sıra ölkələrin təcrübəsini öyrənirirk. Bu, olacaq”. 

K.Əliyev Rabitə və Yüksək Texnologiyalar Nazirliyinin vəzifəfli şəxslərinə qarşı cinayət işi ilə bağlı sualın cavabında bildirib ki, başlanan cinayət işi, vəzifəli şəxlsərin korrupsiya əməllərinin ifşası siyasi iradənin çox güclü bir göstəricisidir: “Bu cinayət işinin araşdırılması korrupsiya ilə məşğul olma ehtimalı olan başqa məmurlar üçün bir nümunədir. Onlar da belə cinayət işi ilə üzləşə bilərlər və üzləşəcəklər. Biz bu istiqamətdə fəaliyyətimizi gələcəkdə də davam etdirəcəyik”.

Ə.Nuriyev isə QHT-lərin müraciəti və  mediada dərc edilən araşdırmalar əsasında qaldırılan cinayət işləri ilə bağlı deyib ki, vətəndaş cəmiyyətinə yönələn korrupsiya şikayətləri Korrupsiyaya Qarşı Mübarizə üzrə Baş İdarəsinə göndərilir.

“Mənim rəhbərlik etdiyim təşkilatın müraciəti əsasında artıq iki cinayət işi başlanılıb”, - o qeyd edib. -03B-