Könüllülük fəaliyyətinə hazırlıq «dərsləri»

Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası və Azərbaycan Qadınların Hüquqlarını Müdafiə Cəmiyyəti sosial xidmət, könüllülük, sosial xidmət sahələrində xidmət haqqında qanunlarla bağlı məlumatlandırma və bilgilərin genişləndirilməsi layihəsini həyata keçirir.

Layihənin Bakı şəhərində, Masallı və Balakən rayonlarında 5 (beş) ay müddətində həyata keçirilməsi nəzərdə tutulub. Layihənin məqsədi, QHT-lərə könüllü fəaliyyətin təşkilatçısı olmalarına kömək etməklə, sosial xidmət sahələrində könüllü fəaliyyətin genişlənməsinə təşəbbüsdür. Layihənin icrası müddətində maarifləndirici seminar- treninqlər ( tədbirlər) həyata keçiriləcək.

Layihə çərçivəsində könüllülük tarixi, könüllülük fəaliyyətinin məqsədi, formaları, sahələri, sferaları və xüsusiyyətləri haqda bilgilər veriləcək. Bundan əlavə, QHT-lərin dövlət tender və müsabiqələrində iştirakı qaydaları barədə bilgilər verilməsi  və s. nəzərdə tutulur.

Layihə çərçivəsində 240 nəfər tələbə gənclər və QHT nümayəndələri “Könüllü fəaliyyət haqqında”, “Sosial xidmət haqqında” Azərbaycan Respublikasının Qanunları haqda məlumatlarını artıracaqlar.

 400 nəfər üzvü olan xeyriyyəçiliklə məşğul olan “Kimsəsizlərə bir kimsə” təşəbbüs qrupunun fəal üzvləri rəsmi qeydiyyatdan sonra öz üzvləri ilə qanun çərçivəsində könüllü fəaliyyətə (sosial xidmət sahələrində) hazır olacaqlar.

Tədbir iştirakçısı olan QHT-lər, “Sosial xidmət haqqında” Azərbaycan Respublikasının Qanununa uyğun dövlət sifarişləri almaq üçün maariflənəcəklər.

QHT-lər könüllü fəaliyyətin təşkilatçısı qismində çıxış etmək yollarını öyrənəcəklər.

Tədbir iştirakçılarının alacaqları sertifikat onların könüllü fəaliyyətlə məşğul olmalarına zəmin yaradacaqdır. -0-