Kür daşqınının növbəti məhkəməsi

2010- cu ilin yazında baş vermiş Kür Araz daşqınları zamanı evlərinə və təsərrüfatlarına ciddi ziyan dəymiş, problemləri bu günə qədər həll olunmayan bir qrup Sabirabad, İmişli və Salyan rayon sakinlərinin Fövqəladə Hallar Nazirliyinə (FHN), Meliorasiya və Su Təsərrüfatı ASC- yə, eləcə də yerli rayon İcra Hakimiyyətlərinə qarşı Şirvan şəhər İnzibati İqtisad Məhkəməsində   məhkəməsi başlayıb. Dünən tərəflərin iştirakı və hakim Elxan Əmirəliyevin sədrliyi məhkəmə prosesi keçirilib. Məhkəmə prosesində Fövqəladə Hallar Nazirliyinin,  Meliorasiya və Su Təsərrüfatı ASC-nin, Salyan RİH- in, eləcə də iddiaçılarla yanaşı onların nümayəndəsi, “Kür” Vətəndaş Cəmiyyəti Qərargahının koordinatoru Oqtay Gülalıyev iştirak edib. 

Məhkəmənin gedişində hər bir iddiaçının işi ilə bağlı ayrıca dinləmələr və müzakirələr aparılıb. İddiaçılar çıxış ediblər. İddiaçılardan Sabirabad rayonunun Ulacalı kənd sakını, 2010- cu ilin Kür daşqınları zamanı uçmuş evi bu günə qədər bərpa olunmayan Ağayev Möhübbətin iddiasına baxılıb. Məhkəmə prosesində məlum olub ki, adı çəkilən şəxsin evinə FHN- nin komissiyası bir neçə dəfə baxış keçirib, onun evinin qəzalı olduğuna görə yeni evin tikilməsi barədə rəy verib və bu barədə müvafiq akt tərtib olunub. Amma ötən 3 ildə onun evinin bərpa olunması istiqamətində heç bir addım atılmayıb. Məhkəmədə bu barədə çıxış edən FHN- nin nümayəndəsi qeyd edib ki, Ağayev Möhübbətin iddiası ilə bağlı FHN- də müvafiq araşdırmalar aparılır. FHN nümayəndəsinin bu mövqeyi iddiaçıların və onların nümayəndəsinin haqlı etirazına səbəb oldu. Belə ki, məhkəmədə çıxış edən iddiaçının nümayəndəsi Oqtay Gülalıyev bildirib ki, 2010- cu ilin yazında baş vermiş Kür daşqınlarından 3 ilə yaxın vaxt keçir; “İddiaçının evi daşqınlar zamanı uçub və o öz ailəsi ilə birlikdə orda yaşamaq mümkünsüz olduğundan evini tərk edib. FHN- nin müvafiq komissiyası da bu barədə rəy verib ki, ev qəzalı durumdadır və yeni ev tikilməlidir. Ortada uçmuş ev, FHN- nin rəyi və müvafiq Aktı var, nazirlik 3 ildir daha nəyi araşdırır?” Aktın surəti məhkəməyə təqdim olunub. 

Digər iddiaçılardan Sabirabad rayon sakinləri Xəqani Qasımov, İmaməddin Kazımov, Mirhüseyn Hüseynov, Salyan rayon sakini Firudun Əsgərov, İmişli rayon sakini Xaliq Əliyev və digərləri çıxış edərək 2010- cu ilin yazında baş vermiş Kür daşqınları zamanı evlərinə ciddi ziyan dəydiyini və FHN tərəfindən onların evinə ədalətli baxış keçirilmədiyini, bu üzdən də prezidentin sərəncamı ilə ayrılmış dövlət yardımından kənarda qaldıqlarını bildiriblər.  

Məhkəmə çıxış edən Meliorasiya və Su Təsərrüfatı ASC-nin nümayənədəsi Əbdülrəhman Hacıyev bildirib ki, 3 il öncə Kür daşqınlarının baş verməsində təmsil etdiyi qurum günahkar deyil və dəyən ziyanın aradan qaldırılması ilə bağlı FHN məşğul olur və məsuliyyət daşıyır. İddiaçılar Meliorasiya və Su Təsərrüfatı ASC-nin nümayəndəsinin çıxışına etiraz edərək 2010- cu il daşqınlarının baş verməsində Əhməd Əhmədzadənin rəhbərlik etdiyi qurumun bir başa məsuliyyət daşıdığını, məhz həmin qurumun öz işini düzgün qura bilməməsi və işinə səhlənkar, laqeyd yanaşdığına, eyni zamanda bu istiqamətdə ayrılan vəsaitlərin xərclənməsində qeyri- şəffaflığa və korrupsiyaya yol verdiyinə, sahil bərkitmə və bənd atma işlərini etibarlı həyata keçirdmədiyinə görə daşqınların baş verdiyini bildirdilər. İddiaçılar buna görə Meliorasiya və Su Təsərrüfatı ASC-nin cavab verməli və onlara dəyən ziyanın ödənilməsində məsuliyyət daşıdığını bildirdilər. Onlar qeyd etdilər ki, hazırda Kür və Araz çayları sahillərində bənd vurma işləri yaxın ərazidən gətirilən münbit bələdiyyə və meşə torpaqlarından istifadə olunur və bəzi yerlərdə etibarsız şəkildə həyata keçirilməklə sakinlərin həyətyanı torpaqlarına və tikililərinə ciddi ziyan vurur.

Hakim iddiaçıların evinə keçirilən baxış zamanı FHN- nin müvafiq komissiyaları tərəfindən tərtib olunmuş Aktları məhkəməyə təqdim olunmasını və iddialarla bağlı rəsmi cavab hazırlamağı həmin qurumların nümayəndələrinə tapşırdı.

Növbəti məhkəmə prosesi 15 aprelə təyin olunub.

Xatırladaq ki, 2010- cu ilin yazında baş vermiş Kür daşqınlarının nəticələrinin aradan qaldırılması üçün dövlət büdcəsindən 460 milyon manatdan artıq vəsait xərclənib. Vəsaitlərin xərclənməsi səlahiyyəti Fövqəladə Hallar Nazirliyinə tapşırılıb. Yerli sakinlər və vətəndaş cəmiyyəti qurumları vəsaitlərin xərclənməsində korrupsiya hallarına və vətəndaşlar arasında ayrı- seçkiliyə yol verildiyini bildirirlər. 200- dən artıq vətəndaş onlara dəyən ziyanın ödənilməsində ədalətsizliyə yol verdiyinə görə FHN- i məhkəməyə verib. Məhkəmənin gedişində bir qrup sakinin iddiası təmin olunub. Hazırda 114 nəfərin iddiası Şirvan İnzibatı İqtisad Məhkəməsinin, 2 nəfərin şikayəti isə Avropa İnsan Haqları Məhkəməsinin icraatındadır. 

İddiaçıların hüquqları “Kür” Vətəndaş Cəmiyyəti Qərargahı tərəfindən qorunur.—0—