Limanda insanlar spirtli içkilərin və siqaretin olmamasına etiraz ediblər? (YENİLƏNİB)

Lənkəran (Bakıdan 280 km cənubda) icra hakimiyyəti Liman şəhərində etiraz aksiyası haqqında məlumatları təsdiq edib. Lakin administrasiyadan bildiriblər ki, etiraz yanvarın 1-dən plastik bank kartları ilə yeni satış qaydalarının tətbiqindən sonra mağazalarda spirtli içkilərin və siqaretin olmaması ilə bağlı olub.

Plastik kartı olmayanlar etiraz əlaməti olaraq Bakı-Ələt yolunu bağlamağı qərara alıblar, yerli hakimiyyət belə hesab edir.

“İcra hakimiyyəti nümayəndələrinin və hüquq-mühafizə orqanları əməkdaşlarının profilaktik söhbətindən sonra aksiya iştirakçıları dağılıb. Hazırda Liman şəhərində və rayon ərazisində vəziyyət stabildir”, deyə Lənkəran icra hakimiyyəti bildirib. -0-

2016 Yanvar 12 (Çərşənbə axşamı) 15:16:33

Bu gün Lənkəranın Liman qəsəbəsində bir qrup sakin ölkədə qiymətlərin bahalaşmasına etiraz aksiyası keçirib. Bu haqda Turan-a yerli mənbələr bildirib. 

Təqribən saat 12-13 radələrinə kimi 500-ə yaxın şəxs Bakı-Astara yolunu bağlayaraq etiraz edbilər. Sakinlər təkcə bahalaşmaya qarşı yox, kütləvi işsizliyə və rayonda həddən artıq artan oğurluq hallarına da etiraz bildiriblər.

Hadisə yerinə gələn polis qüvvələri aksiya işirakçılarını dağıda bilməsələr də, yolu açaraq hərəkəti bərpa edə biliblər.

Mənbənin bildirdiyinə görə, rayon icra hakimiyyəti və hüquq-mühafizə orqanlarının hadisə yerində olan nümayəndələri ilə aksiya iştirakçılarını təmsilçiləri danışıqlar aparılması üçün Lənkəran rayon icra hakimiyytinə gediblər.

Aksiya zamanı polislə aksiya iştirakçıları arasında hər-hansı insident baş verməyib. 

Keçən il dekbarın 21-də ölkədə baş verən devalvasiya manatı 50%-dən çox, birinci 21 fervral devalvasiyası ilə üst-üstə 90%-ə qədər ucuzlaşdırdı. Bundan sonra bütün ölkə boyu qiymətlərin kəskin bahalaşması başladı. Liman qəsəbəsində baş verən bu etiraz aksiyası bu kateqoriyadan olan ilk aksiyadır. -05-