SOCAR nümayəndəsi «hesablaşmaq» üçün Tbilisiyə gedir

SOCAR nümayəndəsi yanvarın 13-də Tbilisidə Gürcüstanın energetika naziri Kaxa Kaladze ilə görüş keçirəcək, xəbəri Gürcüstanın Energetika Nazirliyi yayıb.

“Sabah SOCAR nümayəndəsi Gürcüstana gələcək. Tərəflər ətraflı müzakirə aparacaqlar. Əsasən söhbət qaz tədarükündə defisitin doldurulması məsələsinin həlli üçün əsas olacaq qiymətlərdən gedəcək”, deyə Energetika Nazirliyindən bildiriblər. Nazirlik SOCAR nümayəndəsinin adını açıqlamayıb.

Elə bu gün Kaladze Gürcüstan ekspertləri ilə görüşüb və Rusiyanın “Qazprom” şirkəti ilə danışıqlar haqqında məlumat verib.

Görüş başa çatdıqdan sonra ekspert Tornike Şaraşenidze bildirib ki, söhbət qaz defisitinin tamamlanmasından gedir, hazırki mərhələdə Gürcüstanın Energetika Nazirliyi bu məsələ ilə bağlı məhz “Qazprom”la danışıqlar aparmağı məqsədəuyğun hesab edir.

Qafqaz Strateji Araşdırmalar Mərkəzinin rəhbəri Mamuka Areşidze görüşdən sonra jurnalistlərə bildirib ki, “Qazprom”la saziş qaz istehlakının artması ilə bağlıdır.

Qeyd edək ki, Azərbaycan Gürcüstan qazının 85%-ni tədarük edir. Lakin Tbilisi tədarükdə fasilələrdən şikayət edir və 10% “Qazprom”dan almaq istəyir. Hazırda Gürcüstan bu qaz həcmini Ermənistana qaz tranzitinə ödəniş kimi alır. Amma indi Tbilisi ödənişi qaz şəklində deyil, pulla almaq istəyir. -02D-