Vergi cinayətlərinin artan statistikası

Dünya bazarında “qara qızıl” qiymətdən düşdükcə vergi əməkdaşlarını daha ntensiv şəkildə vergi intizamı pozuntuları aşkarlayır: 2015-ci ildə vergidən yayınma və qanunsuz sahibkarlıq faktları üzrə cinayət işlərinin sayı iki dəfə artıb.

Vergilər Nazirliyi analitik informasiya şöbəsinin məlumatına görə, ötən il vergi cinayətlərinin ilkin istintaqı departamenti 1853 cinayət işi qaldırıb.

Bir qayda olaraq, cinayət işləri səyyar vergi yoxlamaları, vergidən yayınma, hüquq mühafizə orqanlarından daxil olan faktlar üzrə qaldırılır.

Bu cinayət işlərinin istintaqı gedişində cəlb edimiş şəxslər büdcəyə 69,5 mln manat ödəyib. Bu, 2014-cü ildəkindən (16 mln manat) 4,5 dəfə çoxdur. 576 cinayət işi üzrə büdcədən yayındırılmış vergilər ibtidai istintaq zamanı tamamilə ödənildiyinə görə onların icraatına xitam verilib.

57 nəfər təqsirləndirilən şəxs barəsində həbs qətimkan tədbiri seçilib. Bu, 2014-cü ildəkindən iki dəfə çoxdur. İstintaqı tamamlanmış cinayət işlərindən 71 iş üzrə 83 nəfər şəxs barəsində materiallar ittiham aktı ilə aidiyyəti üzrə baxılması üçün məhkəmələrə göndərilib.

Vergilər Nazirliyi 2014-cü ildə  971, 2013-cü ildə  519, 2012-ci ildə  417 cinayət işi qaldırıb. Göründüyü kimi, neftin qiyməti azaldıqca aşkarlanan vergi cinayətləri artır. Vergi əməkdaşları dövlət büdcəsini məcburi metodlarla doldurmağa çalışır.

Dövlətstatkoma görə, 2015-ci il oktyabrın 1-i üçün Azərbaycanda özəl sahibkarlıq subyekti olan 86,4 min hüquqi şəxs, eləcə də 564 min hüquqi şəxs yaratmadan sahibkarlıqla məşğul olan fiziki şəxs qeydiyyata alınıb. 08D