Lisey və gimnaziyalara sənədlərin qəbuluna başlanılıb

Bakı/07.08.23/Turan: Lisey və gimnaziyalara mərkəzləşdirilmiş imtahanla qəbul olunan şagirdlərin sənədlərinin qəbuluna başlanılıb. Bu haqda Elm və Təhsil Nazirliyi məlumat yayıb.

Məlumata görə valideyn və ya qanuni nümayəndə övladının şəxsi işlərini 7 avqust saat 15:00-dan 17 avqust saat 15:00-dək şagirdin qəbul olunduğu cari müəssisəyə təqdim etməlidir.

Qeyd edək ki, hazırda Azərbaycanda orta təhsil müəssisələri özəl və dövlət olmaqla iki yerə bölünür. Təhsil müəssisələri müxtəlif növ olduğu kimi təhsilin keyfiyyəti də müxtəlifdir. Ekspert Elşən Qafarov təhsilin keyfiyyəti və müxtəlifliyi haqqında fikir bildirib.

Ekspertin sözlərinə görə ölkədə 1 milyon 600 min şagird var və onların böyük əksəriyyəti dövlət mülkiyyətində olan 4432 məktəbdə oxuyur.

“Ümumilikdə 60-a yaxın özəl ümumi təhsil məktəbi var. Özəl orta təhsil müəssisələrində illik  ödənişlər 5 min manatdan 60 min manat aralığında dəyişir. Valideynlərin bu ödənişləri qarşılamağa imkanları çatmadığı üçün dövlət təhsil müəəsisələrini seçirlər”.

Elşən Qafarov dövlət ümumi təhsil məktəbləri ilə özəl məktəblər arasında idarə edilmə və tədrisin təşkil edilməsində ciddi  fərqlər olduğunu vurğulayıb.

 “Özəl ümumi təhsil məktəbləri Beynəlxalq  təhsil proqramları ilə təhsil verirlər.  Əsas fərq  məktəbin strukturunun Beynəlxalq standartlara uyun olması və tədrisin təşkilidir. Özəl və dövlət ümumi təhsil müəssisələri idarə etmə sisteminə, tədrisə, təhsil proqramlarına görə bir-birindən tamamilə fərqlənirlər.

Ekspert  mühit, şagird sıxlığı, şagir-məktəb, məktəb-valideyn münasibətləri də fərqləndiyini də vurğulayıb.

Bütün təhsil müəssisələrində təhsilin keyfiyyəti eyni ola bilməz...

Ekspert ümumi təhsil müəsisələrinin misyasının müxtəlif olduğunu vurğulayıb.

“Bildiyimiz kimi ölkədə 4432 orta məktəb var.  114ü ibtidai,qalanları ümumi orta məktəb və 20-ə yaxını gimnaziyadır. Hər bir məktəbin missiyası onun növünə, tipinə, yerləşdiyi əraziyə, məktəbin infrasturturuna görə dəyişir.  Elə  məktəb var orada şagirdlərin tədrisə cəlb olunması əsas prioritetdirsə, lisey və gimnaziyalarda mərkəzləşmiş qaydada şagirdlər qəbul edilir. Orada əsas istedadlı uşaqlarla tədrisin təşkilidir”.

32 ildir müstəqil olmağımıza baxmayaraq nizamnamə yoxdur

Elşən Qafarov təhsil keyfiyyətinin artması üçün hər bir məktəbdə təlim-tərbiyyə prosesinin qurulması ilə bağlı prioritetlər və standartların olduğunu qeyd edib.

“Bunun üçün ilk növbədə  təhsil müəssisələrinin nizamnamələri  olmalıdır. Məktəblər nizamnamə əsasınsa  idarə olunmurlar. Məktəblərin idarə olunmasdı ilə bağlı hüquqi-normativ sənədlərdə boşluqlar var”.

Təhsil kompleks yanaşmanı tələb edən sahədir...

Elşən Qafarov  təhsil sahəsində olan inkişaf üçün görülən tədbirlərə diqqət çəkib.

 “24 iyul 2023-cü il tarixindən müvafiq fərmanları ilə Elm və Təhsil Nazirliyinin yeni strukturu müəyyən olundu.  Ümumi təhsil və məktəbədər agentliyi də bu strukturun bir parçasıdır. Artıq Azərbaycan təhsilində islahatların 3-cü mərhələsi başlayıb. 1-ci mərləhə 1999-2013,  ikinci mərhələ təhsilin inkişafı üzrə dövlət starategiyasının qəbul edilməsi ilə 2013-2023 illəri əhastə edir. Məktəblərin sadecə bir mərkəzdən idarə olunması öz effektini vermir. Məktəblərin idarə olunmasında onlara müəyyən səlahiyyətlər verilməlidir. Buna qədər isə məktəblərə verilmiş səlayiyyətləri idarə edə bilən kadrlar formalaşmalıdır.  Son  zamanlarda bununla bağlı bir sıra tədbirlər gürülür.  Regional təhsil idarələrin yaradılması, məktəbəqədər təhsil müəssisələrinin Elm və Təhsil Nazirliyinin balansına verilməsi, təhsilin idarə edilməsində kadrların seçilməsində müxtəlif işlər görülür.  Bu da gələcəkdə hazırda olan ümumi təhsil vəziyyətinin yaxşılaşacağına  bir işarədir”.--0--