Media-icmal 01.10.19

Neft gəlirlərinin sosial layihələrin yerinə yetirilməsində rolu, bəzi qanun layihələrilə bağlı deputatdan təklif, Xaçmaz rayonunun bir qrup sakininin sosial qayğıları və s. məsələlər bugünki (01 oktyabr 2019-cu il) medianın aparıcı mövzularındandır...

Neft gəlirləri və sosial siyasət

"Azərbaycan" qəzeti "Neftdən əldə edilən gəlirlər ilk növbədə sosial məsələlərin həllinə yönəldilir" sərlövhəli məqalədə sosial problemlərin həllində neft gəlirlərinin əəmiyyətini dəyərləndirir.

Müəllif deyir ki, ölkədə çoxşaxəli sosial islahatlar həyata keçirilir, əməkhaqları və pensiyaların, sosial müavinətlərin, müxtəlif kateqoriyadan olan təqaüdlərin artırılması bura daxildir, amma sosial siyasətin əsas məqsədi əməkqabiliyyətli əhalinin işlə təmin olunmasıdır.

Müəllif əlavə edir ki, sosial siyasətin əsas məqsədi ölkə vətəndaşının rifah halının yaxşılaşmasına yönəlib, dövlət əldə etdiyi gəlirlərdən ilk növbədə öz vətəndaşlarının həyat səviyyəsinin daha da yaxşılaşdırılması məqsədilə istifadə edir.

Yazı müəllifi vurğulayır ki, "Əsrin müqaviləsi"ndən (1994-cü ildə imzalanmış neft kontraktları nəzərdə tutulur - red.) əldə olunan gəlirlər də ilk növbədə sosial problemlərin həllinə yönəldildi.

Müəllifə görə, sosial sahədə layihələr həyata keçirilməkdə davam edir və bu ilin əvvəlində Prezident İlham Əliyev çox böyük sosial paket təsdiqlədi: "Bu sosial layihə 4 milyon ölkə vətəndaşını əhatə edir. Buraya minimum əməkhaqqının, minimum pensiyanın əhəmiyyətli dərəcədə artırılması daxildir. Həmin sosial paketin icrası sayəsində pensiyalar birinci dəfə 40 faiz, ikinci dəfə daha 40 faiz artmışdır. Minimum əməkhaqqı təxminən iki dəfə qaldırılıb, 130 manatdan 250 manata çatdırılıb, minimum pensiya isə 116 manatdan 200 manata qədər qaldırılıb".

Məqalədə deyilir ki, Prezident bu ilin iyununda sentyabrın 1-dən ölkədə minimum əməkhaqqının 180 manatdan 250 manata çatdırılması, dövlət sektorunda çalışanların əməkhaqlarında 20-50 faiz artımlar edilməsi haqda sərəncamlar imzalayıb: "Minimum əməkhaqqının artımının ilk pilləsi minimum əməkhaqqı məbləği səviyyəsində olan vahid tarif cədvəlinin bütün pillələri üzrə edilən artımlar da nəzərə alınmaqla, 950 min nəfərin (o cümlədən dövlət sektoru üzrə 600 min nəfər, özəl sektor üzrə 350 min nəfər) maaşının artmasına imkan verib".

Müəllif deyir ki, ikinci sosial paketin tərkib hissəsi kimi, minimum əməkhaqqının və dövlət sektorunda işləyənlərin əməkhaqlarının artımı ümumən 1 milyon 350 min insanın əməkhaqqı gəlirlərinin əhəmiyyətli şəkildə artması ilə nəticələnib.

Müəllifə görə, bu sırada gənclərin işlə təmin olunmaları xüsusi yer tutur, bu istiqamətdə aidiyyatı dövlət qurumlarının iştirakı ilə bu yaxınlarda Bakı Dövlət Universitetində tələbə və məzunlar üçün "Karyerada ilk addım" adlı məşğulluq tədbiri keçirilib, tədbirdə bu ilin 8 ayında 14056 gəncin işlə təmin edildiyi vurğulanıb.

Müəllifə görə, həyata keçirilən sosial siyasət nəticəsində vətəndaşların müavinət və təqaüdlərinin artırılması sahəsində görülən işlər ümumilikdə 1,3 milyon insanı əhatə edib, bunun 300 mindən çoxu əlilliyi olan şəxslər, 500 minə qədəri məcburi köçkün, 100 mindən çoxu tələbələrdir.

Deputat bunları vacib sayır

"Modern.az"da isə "Azərbaycanda monopoliya yoxdur deyə bilmərik - deputat məsələ qaldırdı" sərlövhəli məqalə oxumaq olar.

Sayt ölkə qanunvericiliyi üçün lazım olan bəzi qanun layihələrinin işlənməsinin zəruriliyi barədə deputat Vahid Əhmədovun düşüncələrinə yer verib.

Milli Məclisin İqtisadiyyat, sənaye və sahibkarlıq komitəsinin üzvü, deputat V.Əhmədov bəzi qanun layihələrinin qəbul edilməsinin vacibliyi düşüncəsində olduğunu bildirir.

"Bu gün bir neçə məsələyə toxunmaq istəyirəm. Təəssüüf ki, bir neçə il keçməsinə baxmayaraq, "Rəqabət Məcəlləsi haqqında" qanun layihəsi qəbul edilməyib. "Rəqabət Məcəlləsi" aktual məsələlərdən biridir, bunun qəbul edilməsi həddindən artıq vacibdir. Azərbaycanın daxili bazarında monopoliya, inhisar yoxdur deyə bilmərik", deyə V.Əhmədov bu layihənin zəruriliyinin əsaslarını nəzərə çatdırır.

Deputat vurğulayır ki, prezident imzaladığı Strateji Yol Xəritəsində faktiki olaraq 2019-cu ildə "Rəqabət Məcəlləsi"nin qəbul edilməsini irəli sürüb.

"Ancaq 2019-cu il başa çatır və biz "Rəqabət Məcəlləsi haqqında" qanun layihəsini qəbul etməmişik", deyə V.Əhmədov bu sahədəki yubanmanı ön plana çıxarır.

Bundan irəli gələrək, deputat bu layihənin parlamentin gündəliyinə salınmasını vacib sayır.

Deputat V.Əhmədov həllini vacib saydığı daha bir qanun layihəsinin işlənməsinə də münasibət ifadə edib və bu məsələnin təhsil kreditlərilə bağlı olduğunu söyləyib.

"Eşitmişəm ki, Təhsil Komitəsində bununla bağlı qanun layihəsi hazırlanır. Hesab edirəm ki, bu qanun layihəsi üzərində işləmək olar. Təhsil kreditləri çox vacib hadisədir", deyə V.Əhmədov bildirib.

Deputat vurğulayıb ki, bu barədə müraciətlər həddindən artıq çoxdur, faktiki olaraq, bəzi tələbələr təhsillərini davam etdirə bilmirlər və təhsillərini yarımçıq qoyurlar.

Bir zürafə az olsun...

"Yeni Sabah.az"da isə "Xaçmazda yağış bu binadakı sakinlərin başına yağır" sərlövhəli məqalə diqqət çəkir.

Müəllif Xaçmaz rayonu, Heydər Əliyev küçəsi, 30 ünvanında yaşayan sakinlərin şəraitlərindən şikayətlərini medianın gündəminə daşıyır.

Sakinlər deyirlər ki, yaşadıqları bina Xaçmaz şəhərinin mərkəzində, Xaçmaza gələn bütün qonaqlara nümayiş etdirilən "Şəxsiyyətlər Parkı"nın yanında yerləşsə də, onların problemi hələ heç kəsin diqqətini cəlb etməyib.

Müəllif sakinlərə istinadən deyir ki, bu bina XX əsrin 50-ci illərinin sonlarında istifadəyə verilib, binanın parka baxan hissəsi müasir arxitektura qaydasında təmir olunsa da, digər tərəfi pis vəziyyətdədir: "Təhlükəli eyvanlar, sınıq pilləkənlər, dağılmış divarlardır, bu bina sahibsiz tikili kimi son günlərini yaşayır", deyə sakinlər bildirirlər.

Müəllif bina sakinlərindən birinə istinadən deyir ki, yuxarılara şikayət etməkdən, gedib-gəlməkdən yorulublar, bu qədər parklar salındığı, heykəllər ucaldıldığı halda, bu balaca binanın damının dam örtüyünü dəyişməyi problemə çeviriblər: "Bir maral, zürafə heykəli az olsun, amma damımızı da dəyişib bu qədər ailəni faciədən qurtarsınlar da. Axı, bina böyük maliyyə vəsaiti tələb etmir. Heç olmasa küçənin kimin adına olmasına baxıb, ondan utanıb bir iş görmürlər. Çöl tərəfdən, görünən yerlərə yamaq vurmaqla deyil ki", sakinlər belə deyirlər.

Müəllifin sözlərinə görə, binanın digər bir sakini get-gəldən bezdiyi üçün kredit götürərək binanın bir hissəsini öz hesabına təmir edib: "Başqa çarəm qalmadı, başımıza su tökülürdü. Adam nə qədər gedib başqa evdə qala bilər ki? Bu yaşımda gedib kredit aldım. İndi də bu qoca yaşımda market və dükanlarda süpürgəçilik edirəm ki, həm dolanım, həm də borcu qaytarım. 3 min manat kredit almışam, iki il də məcburən faiz ödəmək üçün süpürgəçilik etməliyəm".

Müəllifin sözlərinə görə, Xaçmaz Rayon İcra hakimiyyətindən isə bildiriblər ki, problemin həlli 2020-ci ildə görüləcək işlər siyahısına salınıb.

Müəllif deyir ki, rayon hakimiyyəti bu işin gələn ilə saxlanılmasını icra hakimiyyətinin hazırda maliyyə vəsaitinin kifayət qədər olmaması ilə əlaqələndirib. "Gələn il isə bu və başqa binaların dam örütyünün dəyişdirilməsi nəzərdə tutulur", deyə icra hakimiyyətindən bildiriblər.

Xatırladaq ki, Prezident İlham Əliyev sonuncu dəfə2018-ci ilin mayında Xaçmaz rayonunda abadlıq işləri və 12 küçədə yenidənqurma işləri aparmaq üçün

3 (üç)milyon manat vəsait ayrılması barədə sərəncam imzalamışdı.