Media-icmal 02.07.2016

Ölkədə müstəqil siyasətin yürüdülməsi, Avropa məhkəməsinin qərarları, fors-major hallarda iş adamlarının kompensasiya hüququ, tikinti şirkətlərinin dələduzluqları bugünkü medianın aparıcı mövzusudur. 

Liderlər olmasa ...       

“Azərbaycan” qəzeti “Azərbaycanın maraqlarına xidmət edən müstəqil siyasət” (http://www.azerbaijan-news.az/index.php?mod=3&id=100414)  sərlövhəli məqalə ilə çıxış edib.

Müəllifə görə, 25 ildir ki, ölkədə milli maraqları təmin edən müstəqil siyasət yürüdülür, dünyanı düşündürən aktual, qlobal məsələlərdə qəti və cəsarətli mövqe ortaya qoylur. Bu tezisdən irəli gələrək müəllif aşağıdakı qənaəti ifadə edir:“Bunun nəticəsidir ki, dünya ictimaiyyəti enerji təhlükəsizliyi, regional iqtisadi əməkdaşlıq, beynəlxalq terrorçuluqla mübarizə və s. kimi məsələlərdə Azərbaycanın mövqeyini bölüşür”.

Müəllifin fikrincə, dövlətin və xalqın inkişafı, dünya birliyindəki yerinin müəyyən olunması ona rəhbərlik edən şəxslərdən əhəmiyyətli dərəcədə asılıdır və tarix bunu hər bir güclü dövlətin təcrübəsində sübut edib. Müəllif deyir ki, məhz keçmiş prezident Heydər Əliyevin və prezident İlham Əliyevin həyata keçirdikləri siyasi kurs Azərbaycanın dövlət kimi qurulmasını, bölgənin liderinə, dünyada söz sahibinə çevrilməsini təmin edib. Müəllif qeyd edir ki, bu siyasətin nəticəsidir ki, Azərbaycan beynəlxalq birliyin fəal və qəbul edilən üzvüdür. Ölkənin icra etdiyi beynəlxalq layihələr də məhz bunun nəticəsidir.

Müəllifin fikrincə, ölkədə həyata keçirilən daxili və xarici siyasətin Azərbaycan dövlətinin maraqlarını qlobal miqyasda layiqincə təmsil edir və müəllifin fikrincə, bu xüsusda dövlət başçısı İlham Əliyevin şəxsi və müstəsna rolu var. Onun siyasi uzaqgörənliyi, diplomatik gedişləri, ölkənin mövqelərini daha da gücləndirir, milli maraqları beynəlxalq siyasi və iqtisadi proseslərlə uzlaşdıra bilir. Müəllifə görə, bu siyasi xətt Azərbaycnaı bölgənin liderinə çevirib: “Onun qətiyyətli mövqeyi Cənubi  Qafqazda hər hansı taleyüklü məsələnin həllində, transmilli layihənin reallaşmasında Azərbaycanın iştirakı və razılığı olmadan konkret nəticəyə gəlməyi mümkünsüz edir”. 

Saxtakarlığın acı bəhrəsi

“Azadlıq” qəzetində dərc edilən  “Hakimiyyətin saxtakarlığı necə ifşa edilir?” sərlövhəli (http://www.azadliq.info/144376.html) məqalədə seçki saxtakarlığı və siyasi həbslərə görə Avropa məhkəməsində Azərbaycanın cərimələnməsi təhlil edilir.

Müəllif bu cərimələnmələrə səbəb kimi hakmiyyətin saxtakarlıqlarının səbəb olduğunu deyir və yazır: “Azərbaycan hökuməti rüsvayçılıq bolluğuna düşüb. Hansı daşın altını qaldırsan hökumətin əyri əməlləri boylanır, ölkədəki eybəcər mənzərə o qədər şəffaflaşıb ki, dünyanın istənilən yerindən bu mənzərəni görmək olar”.

Müəllifin fikrincə, artıq ölkədə qanunların işləməməsi, hüquqsuzluq, məhkəmə sisteminin məhv edildiyi beynəlxalq hüquq səviyyəsində təsdiqini tapıb. Odur ki, Avropa məhkəməsi Azərbaycan hökumətindən haqlarını oğurladığı adamlara təzminat verilməsini tələb edir. Müəllifə görə, bu halda normal hökumət istefa verərdi: “Bu qədər seçki saxtakarlığından və bunun Avropa məhkəməsində təsdiqindən sonra normal hökumət istefa verərdi. Ən azı saxtakarlıqdan, hüquqsuzluqdan imtina edərdi. Faktiki onlara hakimiyyət mütəmadi cinayət başında yaxalanır,  mütəmadi olaraq hökumətin oğurluğu sübuta yetirilir”.

Müəllif eyni zamanda Avropa məhkəməsinin siyasi həbslərlə bağlı xeyli qərarlar çıxardığını da vurğulayır və bu həbslərlə bağlı bildirir: “Yəni, təsdiqlənir ki, “polisə müqavimət”, “xuliqanlıq”, “narkotika”, “kütləvi iğtişaşlar törətmə” ittihamı ilə həbs olunan insanlar əslində  günahsızdırlar və bu adamlar hakimiyyətin sifarişilə cəzalanıblar”. Müəllifin fkirincə, siyasi həbslərlə bağlı bu qədər qərarlardan sonra rəsmi Bakının  “Azərbaycanda qanunun aliliyi qorunur”, “insan haqlarına yüksək önəm verilir” bəyanatları, sadəcə, ikrah doğurur.

Müəllifə görə, Avropa məhkəməsinin bu günə qədər çıxardığı yüzlərlə qərar onu göstərir ki, Azərbaycan hökuməti dünyaya şikayət ixrac edir. Səsi oğurlanan da, siyasi sifarişlə həbs edilən də, malı- mülkü əlindən alınan da Avropa məhkəməsinə müraciət edir.        

İş adamlarının kompensasiya hüququ           

“Novoye Vremya” qəzeti “Fors-major” qaydaya dönür” sərlövhəli məqalədə (http://www.novoye-vremya.com/w62134/.../#.V3dMlBHr34g) bu günlərdə maşın bazarında baş verən yanğın fonunda ölkədə kiçik və orta  biznesin vəziyyətini təhlil edir.

Kiçik və orta biznesin istənilən iqtisadiyyatın lokomotivi olduğunu müəllif bazar iqtisadiyyatı ölkələrində biznesin bu sahəsinin inkişafına xüsusi diqqət yetirildiyini nəzərə çatdırır. Müəllif  bunu da qeyd etməyi vacib sayır ki, uzun müddət ölkədə biznesin inkişafına qayğı göstərilməyib. Amma indi ciddi maliyyə problemlərilə üzləşən rəsmi Bakı bu yolla getmək istəyir. “Ən aşağısı, ən yüksək səviyyədə biznesə dəstək verildi, eyni zamanda çoxsaylı orqanlar tərəfindən biznes obyektlərinin yoxlanmalarına qadağa qoyuldu, bu isə ölkədə biznes adamlarının dərindən nəfəs ala bilmələrinə səbəb oldu”.

Müəllif yazır ki, son vaxtlar fors-major halları biznes adamlarının fəaliyyətinə qənim kəsilib. Bu sırada müəllif ayrı-ayrı vaxtlarda “Karvan”, Sədərək, Binə kimi ticarət mərkəzlərində baş verən yanğınları göstərir. Son olaraq maşın bazarındakı yanğın və zərərə  düşən iş adamları məsələsinə toxunur. Müəllif burada bir çox nüansların yarandığını bildirir: “Amma zərərə düşənləri unutmaq olmaz, söhbət iş adamlarından gedir. Az ziyan dəyməyib, bu da birmənalıdır ki, onların çoxu ya dövlət, ya da bazar sahibi tərəfindən kompensasiya almağa ümid edir. Zərərin ödənməsi əsas məsələ olaraq ortaya çıxır. Amma ortada çoxsaylı maneə, sığortanın olmaması, məmurların bu kompensasiyanı vermək istəməməsi kimi hallar var”.   

Müəllif izah edir ki, iş adamı üçün bu yanğının necə baş verməsi əsas məsələ deyil, həm də bu, onun məsələsi deyil, odur ki, bunu bazar sahibi həll etməldiir.

Müəllifə görə, burada həm də kimlərin ticarəti qanunauyğun aparıb- aparmaması ortaya çıxacaq. Amma yenə də müəllifə görə, hakimiyyət özü sığorta işini qaydaya qoymalıdır. Amma müəllif bunu da iddia edir ki, ölkədə müstəqil məhkəmə sistemi qurulmayınca bu sahədə də özbaşınalığa son qoyulmayacaq: “Zəif vətəndaş cəmiyyəti, inkişaf etməmiş demokratik institutlar, tam asılı məhkəmə iş adamlarını məmur özbaşınalığı qarşısında müdafiəsiz duruma salır”. 

Dələduzluq qurbanları

“Bizim Yol” qəzeti “Dələduz işbazlar yüzlərlə vətəndaşı evsiz qoyub” sərlövhəli (http://www.bizimyol.info/news/80654.html) məqalədə mənzil tikintisi adı ilə işbazların əhalini aldatdıqları və cəzasız qaldıqlarını araşdırır.

Müəllif yazır ki, bu özbaşınalığa etiraz olaraq 279 ailə Korrupsiyaya Qarşı Mübarizə Baş İdarəsinin önündə onlara dəyən ziyanın ödənməsini tələb edib.

Bu mənizl tikinti şirkətləri bir mənzili bir neçə nəfərə satmaq kimi dələduzluğa belə əl atıblar. Zərərçəkmişlər “Bilik”, “Xəmsə”, “Hasil”, “Hayan” MMC-lərin təsisçləri  Elman Tağıyev və Məhərrəm Məhərrəmovdan haqlarını tələb ediblər. Onlar “ya evimizi, ya pulumuzu verin” tələbini ortaya qoyublar. Müəllif yazır ki. maraqlı olan budur ki, bu şirkət sahibləri əməllərinə görə 13-14 il həbs cəzası alsalar da qısa müddətə azadlığa burxılıblar. Müəllif yazır: “Aksiyada şikayətçilərin nümayəndələrini idarənin əməkdaşları qəbul ediblər, onlara bu dəfə də vəd verilib ki, problem tezliklə həllini tapacaq”.

Müəllif şikayətçilərə istinadən bildirir ki, bir aydan çoxdur ki, bütün idarələrə baş vuran zərərəçəkmişlərə ancaq vəd verilir və iş bundan o yana getmir, Korrupsiya idarəsi şirkət sahiblərini idarəyə gətirdə bilmir. Üstəlik, tikilən binlar da yarımçıqdır və bu şəxslərin payçıları mənzillə necə təmin edəcəkləri sual altındadır. Zərərçəkmişlərə dəyən ziyanın ödənməsi haqda məhkəmə qərarı olsa da  bu qərar hələ də yerinə yetirilməyib. Müəllif deyir ki, bu insanlar nə az, nə azaçıq 10-11 ildir ki, mənzil adı ilə adadılıb və bunun sonu hələ də görünmür.