Media-icmal 02.08.2016

O, vədlərinə sadiq qalıb

“Azərbaycan” qəzeti “Müstəqil siyasət aparan ölkə” sərlövhəli məqalədə (http://www.azerbaijan-news.az/index.php?mod=3&id=102153) ölkənin iqtisadi inkişafından ordu quruculuğuna kimi  müxtəlif sahələrdəki uğurları və bu uğurlarda dövlət başçısı İlham Əliyevin rolundan danışır.

Müəllif artıq ölkənin postneft dövrünü yaşadığı, bu dövrün öz tələbləri olduğunu vurğulayır. Müəllifə görə, ölkə keçid dövründın modernləşmə mərhələsinə uğurla transformasiya edir. İqtisadi hədəf olaraq Azərbaycan Malayziya, Cənubi Koreya və Sinqapur kimi ölkələrlə bir sırada olmaq xətti ötürüb. Məqalədə qeyri-neft sektorunun və kənd təsərrüfatının  böyüdüyü  qeyd edilir.

Müəllif bütün yürüdülən siyasətdə siyasi lider olaraq L.Əliyevin rolunu belə dəyərləndirir: “Prezident İlham Əliyev xalq qarşısında verdiyi bütün vədlərə sadiq qalmaqla hər bir azərbaycanlının layiqli prezidenti olduğunu təsdiqləyib”.

Müəllifə görə, Azərbaycan bu gün dünyada sülh, tolerantlıq, iqtisadi inkişaf mərkəzlərindən biridir. Məqalədə Azərbaycanın regional müstəvidə əsas oyunçulardan biri olması xüsusi vurğulanır. Müəllif deyir ki, ölkənin bu ön mövqeyə çıxa bilməsinin əsas səbəblərindən biri dövlət başçısının xarici səfərlərinin nəticəsidir. Bundan irəli gələrək dövlət başçısının Avropa və Amerika səfərləri barədə danışır.

Ordu quruculuğu sahəsində müəllif bu ilin aprelində Qarabağ cəbhəsində baş vermiş döyüşləri önə çəkir və ordunun üstünlük qazandığını xatırladır.

Müəllif bütün sahələrdə əldə edilən uğurların perspektivinə də nəzər salır: “Bütün sahələrdə əldə olunan müsbət nəticələr deməyə əsas verir ki, Azərbaycan modernləşmə mərhələsini də tezliklə başa vuraraq dünyanın ən inkişaf etmiş dövlətləri ilə bir sırada dayanmaq imkanı əldə edəcək”.

Elektrik bahalaşması çörəyi bahalaşdırdı

“Exo” qəzeti isə artıq çörəyin bahalaşması ilə bağlı “Çörəyin qiyməti qalxmayacaq” (http://www.echo.az/article.php?aid=103421) sərlövhəli məqalədə bu məsələni ekspertlərlə müzakirə edir. Bəzi mağazalarda çörəyin qiymətinin qalxdığı vurğulanır.

Ekspert Oqtay Haqverdiyev deyir ki, qiyməti qaldırmağa əsas yoxdur: “Son vaxtlar dünyanın heç bir yerində buğda və ya unun qiyməti qalxmayıb. Görünür, elektirk enerjisinin tarifləri qaldırıldıqdan sonra çörək və çörək məmulatları bişirmə sexləri qiymətləri qaldırmağa qərar veriblər.

Ekspert  hər  şeyin əmtəənin maya dəyərindən asılı olduğunu deyərək elektrik enerjisinə görə qiymətlərin qaldırılmasını hüquqi şəxslərə ağır zərbə kimi dəyərləndirir. O.Haqverdiyev çörəyin qiymətinin dövlət tərəfindən tənzimlənmədiyini deyir, buna görə də sahibkarların işinə hökumətin müdaxilə edə bilməyəcəyini bildirir.

Çörəyin strateji məhsul olduğunu deyən ekspert Nəriman Ağayev isə heç bir halda onun qiymətini sərbəst buraxmaq olmaması qənaətindədir.

N.Ağayev ölkəni 2-2,5 milyon insan tərk etdiyi üçün 700 min ton taxıl istehsalının bütün ölkə əhalisnin tələbatını ödəyəcəyi düşüncəsindədir.

Azad İstehlakçılar Birlyinin sədri Eyyub Hüseynov isə çörəyin qiymətinin qalxmasını normal adlandırıb: “36 adda istehlak əmtəəsi bahalaşıb, bəzi rəsmi qururmlar bunu diqqətə almır, 10 qəpik bahalaşacaq çörəyin qiymətini diqqətdə saxlayırlar. Bu, doğru siyasət deyil, dövlət çörəyin qiymətini tənzimləmir, istehsalçı onu istədiyi qiymətə satmaqda azaddır”. 

Məhəbbət imtahanı və ya  Seymur- Nigar əfsanəsi

“Azadlıq” qəzetində isə nikahlarını həbsxanada kəsməli olan siyasi və vicdan məhbusu Seymur Həzi və bir zaman məhbus taleyi yaşamış Nigar Yaqubluya maneələr barədə “Azadlığın zindandakı nikahı” məqaləsi diqqəti cəlb edir. (http://www.azadliq.info/149756.html)

Müəllif həbsxana divarları arxasında olsa belə bu nikahın  kəsilmək istənilməsinin özünü bir analitik yazı adlandırır. Müəllif həm Nigarın, həm də Seymurun bu əzmini  zaman və məkana müqavimət kimi dəyərləndirir: “Bu nikahın bu qədər səs-küylü olması, sosial şəbəkənin gündəmini zəbt etməsi təkcə nikah yerinin həbsxana olması ilə bağlı deyil. Bu nikahı möhtəşəm edən əsas amil səbəbkarların azadlıq aşiqi olmasıdır”.

Müəllif Seymur Həzinin dustaq edilməsinin səbəbi kimi azadlıq uğrunda mübarizə aparmasını, ədalətsizliyə boyun əyməməsini göstərir. Müəllifə görə, bu nikah həm də ibrət dərsidir. Həyatını haqq uğrunda savaşa həsr etmiş adamların həbsxana divarları arasındakı nikah mərasimi də hadisəyə çevrilir.

Daha sonra müəllif “ASAN” xidmətin  kəbinin kəsilməsi üçün gənclərə problem yaratmasına toxunur, hökumətin bu nikah mərasiminin baş tutmaması üçün hər vasitəyə, hər bəhanəyə əl atdığı vurğulanır. Nədənsə “ASAN” xidmətin vəziyyəti bu qədər çətinləşdirməsi məni təəccübləndirmədi. Son statistik rəqəmlər göstərir ki, ölkədə ailə quranların sayı  azalıb. Müəllif 2015-ci ildə ölkədə 68773 nikahın qeydə alınmasını son 6 il ərzində ən aşağı göstərici adlandırır və bu faktı belə dəyərləndirir: “Demək istəyirəm ki, onsuz da bu hökumətin yarıtmaz və yaramaz idarəçiliyi nəticəsində  nikahlar azalıb. Bəli, əzəmətli hökumətimiz ailə qurulmasına yox, ailə dağılmasına töhfə verir”.

Müəllifə görə, bu qədər çətin sınaqlardan çıxmış, ən çətin məqamlarda da optimizmini, mübarizə əzmini itirməmiş adamları məyus etməyin mümkün deyil.    Müəllif bu qədər çətin sınaqdan çıxmış adamları, “ASAN” xidmətlə sınağa çəkməyi gülünclük sayır və buna belə münasibət ifadə edir: “Mənəviyyatı hüzr yerinə çevrilmiş adamların, mübariz gənclərin xeyir mərasiminə əngəl törətmək cəhdi əbəsdir. Biz bu nikahı indidən baş tutmuş hesab edirik”.

Dəyərsizləşən manat, itirilən ehtiyat 

“Novoye Vremya” qəzetində dərc olunan “Tənzimləyici pul itirir” məqaləsində  (http://www.novoye-vremya.com/w63732/.../#.V6AW7BHr34g) ölkənin Mərkəzi Bankının və bütünlükdə bank sisteminin durumunu təhlil etməyə səy göstərilir.

Müəllif bank sisteminin sağlamlaşdırılması üçün bütün iqtisadiyyatın sağlamlaşdırılmasının əsas şərt olduğunu, amma indiki halda Mərkəzi Bankın belə nümunə ola bilmədiyini deyir. Məqalədə Mərkəzi bankın bu ilin iyuluna valyuta ehtiyatlarının 4 milyard 163 manat olduğunu, keçən ilin eyni dövrülə müqayisədə 51%-dən çox azaldığı xatırladılır. Həmçinin qeyd edilir ki, bu ilin iyulunda iyun ayı ilə müqayisədə Mərkəzi Bankın ehtiyatlarının 121 milyon manat azaldığı vurğulanır. Müəllifə görə, əgər manatı sabit saxlamaq mümkün olsaydı bu itkilərə təəssüflənməmək olardı, amma Mərkəzi Bank manatı da sabit saxlaya bilmir və dollara münasibətdə manat daha da dəyərsizləşir. Bu halda isə manatın sabit saxlanması üçün maliyyə vəsaitinin xərclənməsi belə dəyərləndirilir: “Əgər maliyyə müdaxiləsi ilə də manat sabit deyilsə, onsuz durum daha kəskin pisləşə bilər. Amma hər ay 120 milyon dollar itirməksə tezliklə ehtiyatların sonuna çıxar”. 

Müəllif bu siyasətdən irəli gələrək ölkənin bank sistemində durumun acınacaqlı olduğunu bildirir.