Media-icmal 03.11.17

Aqrar sahənin uğurları, tam nağdsız hesablaşmaya keçidin problemləri, bina tikintisində vətəndaşlar üçün təhlükəli məqamlar bugünki (03 noyabr 2017-ci il) medianın aparıcı mövzularındandır...

Aqrar siyasət cəbhə bölgəsində

"Azərbaycan" qəzeti "Güvənc yeri dövlət dəstəyidir" sərlövhəli məqalədə Ağdam (http://www.azerbaijan-news.az/index.php?mod=3&id=132947) rayonunda fermerlərin əldə etdikləri uğurları dəyərləndirir.

Müəllif yada salır ki, Ağdam rayonuna aid torpaqların əksər hissəsi erməni nəzarətindədir, odur ki, fermerlər əllərindəki hər qarış torpaqdan səmərəli istifadə edərək uğurlar qazanırlar: "Bu halal işdə dövlətin dəstəyi onların hər zaman əlindən tutur, belə ki, ölkədə aqrar sektorun inkişafına hesablanan yeni iqtisadi siyasət bu cəbhə bölgəsində də uğurla həyata keçirilir".

Müəllif rayon fermerlərinin qazandıqları uğurlar barədə deyir ki, bu il rayon üzrə taxılçılıqda məhsuldarlıq 37 sentnerə çatıb, bu isə 36 min tondan çox taxıl istehsalı deməkdir: "Cari ildə həmçinin rayon üzrə 3724 hektarda tərəvəz, 348 hektarda kartof, 1067 hektarda yonca, 1002 hektarda şəkər çuğunduru əkilib-becərilib, 64288 ton tərəvəz, 5860 ton kartof, 13486 ton şəkər çuğunduru istehsal olunub".

Müəllif vurğulayır ki, rayonda ənənəvi kənd təsərrüfatı sahəsi olan pambıqçılıq da inkişaf edir və bu il rayon təsərrüfatlarında 3005 hektar sahədə pambıq əkilib.

Yazıda deyilir ki, indiyə kimi 4000 tona yaxın pambıq tədarük olunub, məhsul yığımı davam edir və məqsəd böyük zəhmət bahasına yetişdirilmiş məhsulu itkisiz təhvil verməkdir.

Yazı müəllifi deyir ki, rayonda kənd təsərrüfatının digər ənənəvi sahələrindən olan baramaçılığa da maraq çoxdur və bu il rayonun kümçüləri 300 qutu ipəkqurdu bəsləyib, 13205 kiloqram barama istehsal ediblər.

Müəllif deyir ki, heyvandarlıq üzrə də qazanılan nəticələr qənaətbəxşdir, belə ki, təsərrüfatlarda qaramalın sayı artıb, bu artım isə məhsul istehsalına müsbət təsir göstərir.

Müəllifə görə, kənd təsərrüfatının digər sahələrində olduğu kimi, heyvandarlıqda qazanılan nəticələr də qənaətbəxşdir. Rayon təsərrüfatlarında qaramalın sayı artır və bu göstərici məhsul istehsalına da əhəmiyyətli təsir edir.

Yazıda vurğulanır ki, bu ilin 9 ayı ərzində 3131 ton ət, 25547 ton süd, 6,8 milyon ədəd yumurta istehsal olunub ki, bu da keçən ilin müvafiq dövrü ilə müqayisədə xeyli çox məhsul istehsalı deməkdir.

Nağdsız hesablaşma islahatı iflasda?

"Exo" qəzetində "Azərbaycanda nağdsız hesablaşmalara keçmək islahatı iflasa uğradı" (http://ru.echo.az/?p=64131) sərlövhəli məqalə oxumaq olar.

Müəllif tam nağdsız hesablaşmalara keçid sahəsində durumu ekspert Əkrəm Həsənovla müzakirə edir.

"Bakıda nağdsız hesablaşmaların tam şəkildə tətbiqi belə, gəlirləri 2 milyard dollar həddinə çatdırmayacaq. Bu, səhv hesablamadır və məlum deyil ki, hansı ekspertlər tərəfindən proqnozlaşdırılıb. Birincisi, yəqin ki, heç vaxt tam şəkildə nağdsız hesablaşma formasından istifadəyə nail ola bilməyəcəyik. İkincisi, əgər dolların dəyəri aşağı düşsə, hansısa nəticələr əldə etmək olar, bu isə mümkünsüzdür". Ə.Həsənov bu sahədəki durumu belə qiymətləndirir.

Ekspert deyir ki, biznes təbəqəsi nağdsız hesablaşma üsulundan könülsüz istifadə edir, onlara bütün pullarını banklarda saxlamaq təklif edilir, bu halda biznesmenlərin əksəriyyəti vəsaitlərini hesabdan çıxarmaq problemlərilə üzləşirlər. Odur ki, biznes aləmi öz pullarını kredit qurumlarına verməmək üçün "qara" sxemlər axtarırlar.

Ə.Həsənov deyir ki, bir sıra bankların qəfil iflasından sonra biznes adamları bunun qalan banklarda təkrar olması ehtimalı ilə pullarını banklarda saxlamaq qorxusu yaşayırlar və ona görə nağdsız hesablaşmalara da etimadla yanaşmırlar.

"Qanunvericilikdə dəyişikliklər zəruri idi, amma biz yubandıq. Nağdsız hesablaşmaya iqtisadiyyatın inkişaf etdiyi, fiziki və hüquqi şəxslərin banklara etimadı olan zaman keçilməli idi. İndiki halda isə hamı banklarla təmasdan qaçır. Buna görə də "Nağdsız hesablaşmalar haqqında" qanunun qəbulu ölkədə durum normallaşana qədər təxirə salınmalı idi".

Ekspert deyir ki, nağdsız hesablaşmalara keçən şirkətlərin sayı o qədər də çox deyil və hələ də işəgötürənlərin çoxu qeyri-rəsmi olaraq maaşları nağd şəkildə ödəyirlər.

Ə. Həsənov xatırladır ki, vergi ödəmələrinin məbləğini azaltmaq üçün əmək müqaviləsində əmək haqqının minimum məbləği göstərilir, odur ki, az da olsa nağdsız hesablaşmaları akitvləşdirə biliblər, amma hökumət arzu etdiyi göstəricilərə nail ola bilməyib.

Müəllif isə xatırladır ki, keçən ilin dekabrında "Nağdsız hesablaşmalar haqqında" qanun qəbul edilib və bu qanuna uyğun olaraq bu ilin yanvarından əmək haqlarının verilməsi bu üsula keçirilib. Yanvarın 1-dən qanun 30 min vergi ödəyicisi olan hüquqi şəxsə münasibətdə qüvvəyə minib, aprelin 1-dən isə 740 min digər kateqoriya vergi ödəyicilərinə şamil edilib.

Yeni qaydalara əməl etməyənlərə ilk halda keçirdiyi ticari əməliyyatların 10%-i qədər cərimə nəzərdə tutulur, təkrar edildiyi halda isə həcm 40%-ə qədər qaldırılır.

Müəllif xatırladır ki, İqtisadi İslahatların Təhlili Mərkəzinin rəhbəri Vüqar Qasımlı bu günlərdə tam nağdsız hesablaşmalara keçildiyi halda gəlirin 2 milyard dollara yüksələcəyi barədə bəyanat səsləndirib.

Vətəndaş üçün təhlükəli mənzil tikintisi

"Azadlıq.info" da isə diqqəti "Pilot layihə", yoxsa özbaşınalıq?" sərlövhəli (https://www.azadliq.info/205676.html) məqalə cəlb edir.

Tanınmış vəkil Cavad Cavadov son vaxtlar paytaxtda "pilot layihə" adı ilə geniş vüsət alan mənzil tikintisində şirkətlərin yol verdikləri qanunsuzluqları araşdırır.

Müəllif deyir ki, 2016-cı ilin fevralında Nazirlər Kabineti paytaxtın Suraxanı, Nəsimi, Xətai, Nərimanov, Nizami, Yasamal, Səbail, Pirallahı, Xəzər rayonlarında qəzalı vəziyyətdə olan binaların sökülərək, yerində müasir tələblərə uyğun yenilərinin tikilməsi və s. ilə bağlı qərar qəbul edib.

Vəkil adı çəkilən qərarda evlərin sökülməsinin qarşı tərəflə qanunun bütün müddəalarına əməl edilməsilə baş tutumasının vurğulandığını, amma qərarda "pilot layihə" ifadəsinin olmadığını göstərir.

C.Cavadov deyir ki, Dövlət Şəhərsalma və Arxitektura Komitəsinin internet saytında isə bu "pilot layihə" adlandırılır.

Vəkil vurğulayır ki, bu prosesdə, yumşaq deyilsə, ciddi qanunsuzluqlar var: "Belə ki, Nazirlər Kabinetinin qərarı qəbul ediləndən sonra adlarında "Pilot" olan MMC-lər yağışdırıldıqdan sonra göbələk kimi çıxmağa -qeydiyyata alınmağa başlayır. Bunların da nizamnamə kapitalı 10, 20, ən insaflılarının maksimum 100 manatdır. Milyonlarla qiyməti olan "Pilot layihələr" yeni yaradılmış şirkətlərə həvalə olunur".

Müəllif məqaləsində bina tikintisi tapşırılan "pilot" adlı 8 MMC-nin adını çəkir.

Vəkil deyir ki, Nizamnamə kapitalları 10, 20, 100 manat olan şirkətlərin məlum qərardan sonra göbələk kimi ortaya çıxmaları prosesin qeyri-şəffaf, müsabiqəsiz, məmurların mülahizəsilə həll edildiyini göstərir.

C.Cavadova görə, daha bir təhlükə tikintinin vaxtında başa çatdırılması üçün dövlət və bank zəmanətinin, paytaxtın kirayə mənzil bazarının bu həcmdə müştərini kirayə ilə təmin etmək potensialının olmamasıdır.

Vəkil bəzən tikinti şirkətlərinin bir qism vətəndaşla razılaşdıqdan sonra binada mənzilləri, aparıcı konstruksiyaları, bəzi hallarda kommunikasiyaları sökərək faktiki digər vətəndaşların həyatlarını təhlükəyə atmaqla razılığa məcbur etməsini qanuna zidd və əmlakın qəsdən məhv edilməsi cinayəti adlandırır.

C.Cavadov hesab edir ki, belə qanunsuzluqlara yol verən şirkətlər barəsində vətəndaşlar prokurorluğa şikayət verməlidirlər: "Vətəndaşlara məsləhətim odur ki, bu məsələlərdə birgə danışıqlar aparsınlar və qanunsuzluqlarla bağlı kollektiv müraciətlər etsinlər, müqavilələri kor-koranə imzalamasınlar, mənzillərin təmiri və keyfiyyəti ilə bağlı müddəaların salınmasını tələb etsinlər və ümumiyyətlə, binaların tikiləcəyi, vaxtında tikilib başa çatdırılacağı ilə bağlı zəmanət tələb etsinlər.--0--