Media-icmal 04.01.19

Ölkənin 2018-ci ildəki uğurları, dünya neft bazarında qiymət qeyri-sabitliyinin Azərbaycana mümkün təsiri, müəllimlər üçün keçirilən qapalı test tapşırıqları imtahanının nəticələri və s. məsələlər bugünki medianın (04 yanvar, 2019-cu il) aparıcı mövzularındandır...

Qələbələrin rəhni-Prezident

"Azərbaycan" qəzeti "Prezidentin amalı" sərlövhəli məqalədə ölkənin uğurlarında prezidentin rolunu dəyərləndirir.

Müəllif hesab edir ki, 2018-ci il Azərbaycan üçün uğurlu dövr olub və istinad nöqtəsi kimi prezident İlham Əliyevin Dünya Azərbaycanlılarının Həmrəylik Günü və Yeni il münasibətilə xalqa təbrikindən sitat gətirir: "Tam əminliklə demək olar ki, 2018-ci il ölkəmiz üçün uğurlu il olmuşdur. Ölkəmiz bütün istiqamətlər üzrə uğurla, sürətlə inkişaf etmişdir. Azərbaycan güclü ölkə kimi dünya miqyasında özünü təsdiqləyib".

Məqalə müəllifi dünyanın ayrı-ayrı ölkələrində müxtəlif zəmində qarşıdurmalarla müqayisədə Azərbaycanda sabitlik olduğunu bildirir və bunun əsas səbəbi kimi xalq-iqtidar birliyini göstərir.

Bundan irəli gələrək, müəllif deyir ki, ölkədəki ictimai-siyasi sabitlik Azərbaycan dövlətinin uğurları sırasında mühüm yer tutur.

Yazı müəllifi 2018-ci il aprelin 11-də keçirilmiş prezident seçkilərini ilin ən böyük siyasi hadisəsi, demokratik və azad seçkilərdən biri, ölkənin demokratik dəyərlər yolu ilə inkişaf etməsinin təsdiqi adlandırır: "Ölkə vətəndaşları növbəti dəfə Heydər Əliyev siyasi kursunun zəfərinə, bu kursun davamçısı kimi ötən 15 ildə Azərbaycanın bütün uğurlarının müəllifi olan cənab İlham Əliyevə səs verdilər".

Müəllif keçmiş prezident Heydər Əliyevin 95 illik, Azərbaycan Xalq Cümhuriyyətinin 100 illik yubileyinin keçirilməsini, Xəzər dənizinin hüquqi statusunu müəyyən edən konvensiyanın imzalanmasını da 2018-ci ilin uğurları kimi dəyərləndirir.

Məqalə müəllifi 2018-ci ildə Bakı Beynəlxalq Dəniz Ticarət Limanı Kompleksinin istifadəyə verilməsini, "Cənub qaz dəhlizi"nin və TANAP neft kəmərinin rəsmi açılışlarını dünyaya səs salan meqalayihələr adlandırır: "Reallıq ondan ibarətdir ki, həm "Cənub qaz dəhlizi"nin, həm də onun başa çatan seqmentlərinin həyata vəsiqə almasının təşəbbüskarı Prezident İlham Əliyevdir".

Müəllif hesab edir ki, Azərbaycanın həll olunmamış yeganə problemi Qarabağ problemidir, amma əldə edilən siyasi-iqtisadi uğurlar, ordunun qüvvətlənməsi, möhkəm beynəlxalq mövqe Azərbaycanı sürətlə Böyük Qələbəyə aparır.

Müəllif 2018-ci ildə Naxçıvan istiqamətində həyata keçirilən "Günnüt əməliyyatı"nı ordunun qüdrətinin təsdiqi adlandırır.

Məqalə müəllifi 2018-ci ildə ölkənin iqtisadi sahədə də uğurlar əldə etdiyini deyərək, bütövlükdə sadalanan bütün uğurları dövlət başçısının amalının və xalqa ləyaqətli xidmətinin nəticələri adlandırır.

Neftin qiyməti düşmədikcə...

"Ölkə.az" saytında isə "Azərbaycanın kifayət qədər valyuta ehtiyatı var - Vahid Əhmədov" sərlövəhli məqalə diqqət cəlb edir.

Müəllif dünya bazarında neftin sabit olmayan qiyməti, bunun Azərbaycana mümkün təsirlərini deputat Vahid Əhmədovla müzakirə edir.

"Əgər dünyada neftin qiyməti 40-45 dollar səviyyəsinə enərsə, o zaman bu, Azərbaycanda da müəyyən problemlər yarada bilər. Ancaq yaxın zamanlarda bu, gözlənilmir". Bunu "ölkə.az"a açıqlamasında Milli Məclisin deputatı, iqtisadçı alim Vahid Əhmədov bildirib.

V.Əhmədov deyib ki, hazırda neftin qiymətində elə ciddi ucuzlaşma yoxdur, həm də riskləri önləmək üçün bütövlükdə Azərbaycanın kifayət qədər valyuta ehtiyatı var.

Hazırda Azərbaycanın 45 milyard dollara yaxın valyuta ehtiyatına malik olduğunu deyən deputat həm də bildirib: "Eyni zamanda, pul-kredit siyasətinə Mərkəzi Bank tərəfindən nəzarət edilir. İdxal-ixrac əməliyyatlarında isə ixrac idxalı üstələyir".

Yaxın müddətdə Azərbaycanda iqtisadi gərginliklər gözləmədiyini deyən deputat fikrini qətiləşdirərək, xüsusilə 2019-cu ilin birinci rübünədək manatın qorunub saxlanılmasının mümkün olacağını vurğulayıb.

Deputat hesab edir ki, sonrakı vaxtlarda neftin ucuzlaşması prosesləri gücləndiyi halda müəyyən problemlər yarana bilər, indilik isə Azərbaycanda heç bir devalvasiya gözlənilmir.

V.Əhmədov diqqəti dünyada gedən proseslər üzərinə cəmləyərək son vaxtlar Rusiya, Türkiyə və İranda milli valyutaların ucuzlaşması prosesləri və bunun Azrbaycana təsiri barədə mövqeyini bildirib.

Deputat deyib ki, Rusiya, Türkiyə və İran Azərbaycanla qonşu dövlətlər, həm də onun mühüm ticarət tərəfdaşları olduqları üçün bu ölkələrin valyutalarının ucuzlşaması prosesləri müəyyən qədər Azərbaycan iqtisadiyyatına da təsir göstərir.

V.Əhmədov hesab edir ki, Dövlət Gömrük Komitəsi də Azərbaycan bazarında müəyyən malların rüsumlarını ona görə artırıb ki, bu mallar ucuz qiymətə ölkə bazarına girə bilməsin.

Bu addımın nə qədər doğru olduğu və yaxud olmadığını söyləyə bilməyəcəyini deyən deputat hər halda belə problemlərin mövcudluğunu inkar etməyib.

İmtahan rüsvayçılığı

"Azadlıq.info"da isə "Müəllimlərin savadsızlığı rüsvayçı şəkildə üzə çıxdı" sərlövhəli məqalə oxumaq olar.

Sayt "Azərbaycan Demokratiya və Rifah (ADR) sədri, tanınmış iqtisadçı

Qubad İbadoğlunun bu günlərdə Təhsil Nazirliyinin Azərbaycan və rus bölmələri üzrə orta məktəblərdə bir qrup müəllim üçün müvafiq ixtisaslara uyğun qapalı tipli test tapşırıqlarından ibarət keçirdiyi imtahanın nəticələrinə dair düşüncələrinə yer verib.

İqtisadçı deyir ki, imtahan riyaziyyat, informatika, fizika, kimya və biologiya fənlərindən dərs deyən bir qrup müəllim üçün kecirilib.

"Riyaziyyat müəllimlərinin 99 faizi, kimya müəllimlərinin 95 faizi, fizika müəllimlərin 94 faizi, informatika müəllimlərinin 90 faizi, biologiya müəllimlərinin isə 49 faizi test suallarının yarıdan çoxunu düzgün cavablandırmayıb", - deyə Q.İbadoğlu bildirir.

İqtisadçı deyir ki, biologiya fənni üzrə müəllimlərin 51%-i sualların yarıdan çoxunu düzgün cavablandırıblar, imtahanda iştirak edən 221 nəfərdən 112 nəfəri təqdim edilən 25 sualın 50 faizdən çoxuna doğru cavab verib. Yəni, iştirakçıların 51 faizi təqdim edilən sualların yarısından çoxuna doğru cavab verib və ən yüksək göstərici isə 90 faiz olub.

İnformatika fənni üzrə isə sualların yarıdan çoxunu düzgün cavablandıranlar cəmi 10 faiz olub. İmtahanda iştirak edən 129 nəfərdən 13 nəfəri təqdim edilən 20 sualın 50 faizindən çoxuna doğru cavab verib. Yəni, iştirakçıların 10 faizi təqdim edilən sualların yarısından çoxuna doğru cavab verib və ən yüksək göstərici isə 83 faiz olub.

Fizika fənni üzrə üzrə isə sualların yarıdan çoxunu düzgün cavablandıranlar 6 faiz təşkil edib, imtahanda iştirak edən 180 nəfərdən 11-i təqdim edilən 25 sualın 50 faizindən çoxuna doğru cavab verib. Yəni, iştirakçıların 6 faizi təqdim edilən sualların yarısından çoxuna doğru cavab verib və ən yüksək göstərici 95 olub.

Kimya fənni üzrə isə sualların yarıdan çoxunu düzgün cavablandıranlar 5 faiz olub. bu isə o deməkdir ki, imtahanda iştirak edən 201 nəfərdən 11 nəfəri təqdim edilən 30 sualın 50 faizindən çoxuna doğru cavab verib. Yəni, iştirakçıların 5 faizi təqdim edilən sualların yarısından çoxunu cavablandırıb və ən yüksək göstərici isə 62 faiz olub.

Riyaziyyat fənni üzrə sualların yarıdan çoxunu düzgün cavablandıranlar isə cəmi 1 faiz olub, imtahanda iştirak edən 405 nəfərdən 4 nəfəri təqdim edilən 25 sualın 50 faizindən çoxuna doğru cavab verib. Yəni iştirakçıların 1 faizi təqdim edilən sualların yarısından çoxuna doğru cavab verib və ən yüksək göstərici isə 63 faiz olub.

Bu nəticələrdən irəli gələrək, iqtisadçı cəmiyyətə belə bir sual da ünvanlayır: "Görəsən, bu müəllimlərin dərs verdiyi şagirdlərin əksəriyyəti hazırlıq kurslarına getməsə idi, onların arasında keçirilən testin nəticələri necə olardı?".