Media-icmal 04.03.21

Qarabağda Rusiya sülhməramlılarının Azərbaycanın maraqlarını nə dərəcədə müdafiə etməsi, poçt göndərişlərinin yubanması səbəbləri, YAP-ın qurultayının olacağı barədə xəbərlərin rəsmiləşməməsi və s. məsələlər medianın aparıcı mövzularındandır.  

“Yenisabah.az” saytı “Bütün suallar Rusiya ilə bağlıdir...” – Moskva erməni anklavını gücləndirməyə çalışır” sərlövhəli məqalədə

İkinci Qarabağ Müharibəsindən sonra mövcud olan vəziyyəti təhlükəsizlik məsələləri üzrə ekspert İlham İsmayıl şərh edir.

İ.İsmayıl deyir ki, hələ rahat olmaq tezdir, çünki qarşı tərəf tam təslim olmayıb, Azərbaycana olan ərazi iddialarından əl çəkməyib: “Səbəb də Azərbaycan torpaqlarının məlum ərazidə “Artsax” adı altında hələ də işğal altında saxlaması və ən əsası Rusiya sülhməramlılarının bu ərazilərdə yerləşməsidir".

Ekspert deyir ki, 2020-ci il 10 noyabr bəyanatının Azərbaycan maraqlarına yaxın olan bəzi bəndləri hələ reallaşdırılmayıb və bu, suallar doğurur: “Bütün suallar demək olar ki, Rusiya ilə bağlıdır, Ermənistan isə hələ uzun müddət böhran içində olacaq”,- İ.İsmayıl bildirir. 

O vurğulayır ki, 5-10 ildən sonra bölgədən getməsi, bu müddətdə Azərbaycan nəzarətində olmayam Xankəndi və s. ərazilərdə ərazi bütövlüyünü təmin etməsi, Qarabağ kartından istifadə edərək Azərbaycanı Avrasiya İttifaqına, KTMT-yə çəkmək istəməsi kimi sualların hamısı məhz Rusiyaya ünvanlanır.

İ.İsmayılın iddiasına görə, Rusiya sülməramlıları bitərəf deyil, ermənilərə hərbi təlimdən humanitar yardıma kimi hərtərəfli dəstək verir. 

“Yuxarıda görtərilən sualların üzərinə getmək üçün Azərbaycan və Türkiyə diplomatiyası birgə yol xəritəsi müəyyən etməli, 10 noyabr razılaşmasındakı müddəaları tezıiklə həyata keçirməidir” deyə  çıxış yolu göstərir. 

Onun fikrincə, qalib ölkə kimi Azərbaycanın tələb və mövqeyi sərt olmalıdır, sualların şox olmasına baxmayaraq, biri həll edilməyə başlayanda qalanlarını da ardınca gətirə biləcək.

“Mətbuat.az”  saytı “Gömrükdə ''ilişib'' qaldığı deyilən bağlamalar- Niyə xaricdən gələn sifarişlər gecikir? - əsl səbəb” sərlövhəli məqalədə məhz verilən suala cavab axtarılır.

Müəllif  deyir ki, hazırda ölkədə fəaliyyət göstərən bir çox daşıma şirkətləri var, kəmiyyətcə çox olsalar da keyfiyyətcə belə şirkətlərin sayı çox azdır.

Müəllifin deməsinə görə, xaricdən poçt göndərişlərinin ölkəyə daxil olduqdan sonrakı gecikməsi ilə bağlı vəziyyət uzun zamandır ki, eyni olaraq qalır: “Əvvəllər Türkiyədən sifarişlə ən geci 1 həftəyə Bakıya çatdırılan məhsullar indi az qala 1 ay həddində çatdırılır. Daşıma şirkətləri yubanmaları gömrükdə olan sıxlıqla əlaqələndirir. Bəs vəziyyət reallıqda necədir?”  deyə müəllif sual ünvanlayır.

Gömrük Komitəsindən isə bildirirlər ki, daşıyıcı şirkətlər tərəfindən ölkə ərazisinə gətirilən bağlamaların gömrük nəzarəti prosesi 2-3 saat, maksimum 1 gün ərzində başa çatdırılır, yubanmalara səbəb daşıyıcı şirkətlərin praktiki iş prosesini düzgün qurmamasıdır.“Belə ki, xüsusilə ilin son aylarında bayram və kütləvi endirimlər səbəbindən sifarişlərin sayı artır və nəticədə daşıyıcı şirkətlər bəzən bir neçə dəfə artan yük həcminin idarə edilməsi, yəni anbarlaşdırılması, çeşidlənməsi və bağlamalar barədə məlumatların sistemə daxil edilməsində çətinliklərlə qarşılaşır. Buna səbəb isə həmin şirkətlərin anbar ərazisini, işçi və rəflərin sayını artan yük həcminə mütənasib olaraq artırmamasıdır” deyə komitədən bildirirlər.

“Müsavat.som” saytı  “YAP-ın təcili qurultay müəmması”  sərlövhəli məqalədə martın 5-də Yeni Azərbaycan Partiyasının qurultayının keçirilməsi məsələsi şərh edilir.

Bu məsələnin müəmması budur ki,  mediada yayılan məlumatlara görə, martın 5-də YAP-ın növbəti qurultayı keçiriləcək, tədbirin başlamasına bir sutka qalsa da  partiya rəsmiləri ictimaiyyətə qurultayın olub-olmayacağı barədə hər hansı rəsmi açıqlama verməyiblər.

Saytlara açıqlama verən sıravi YAP üzvləri qurultayın olacağı barədə mətbuatdan xəbər tutduqlarını bildirirlər.

Açıqlama verənlər ehtimalla qurultay baş tutduğu halda partiya rəhbərliyinin “gəncləşdirilməsi” siyasətinə üstünük veriləcəyini deyirlər, hətta vəzifədən uzaqlaşdırılacaq yaşlı nəslin nümayndələrinin bəzilərini də təxmin edirlər.

Onların deməsinə görə, bu qurultayda hədəf partiyanı fəallaşdırmaq və potensialını hərəkətə gətirməkdir.

YAP-çı deputatların bəziləri də qurultay olacağı barədə qeyri-rəsmi informasiyalara malik olduqlarını, partiya rəhbərliyindən, rəsmi səviyyədə qurultayla bağlı bizə heç nə daxil olmadığını bildiriblər.

Onların fikrincə, bu baxımdan qurultay ola da, olmaya da bilər, qurultay barədə deyilən fikirlər daha çox ehtimal səviyyəsindədir.

“Yenə də qeyd edirik ki, rəsmi səviyyədə hələlik bizlərə heç nə deyilməyib”,- YAP-çı deputatların bəziləri bildiriblər.