Media-icmal 04.05.21

Şəhid general Polad Həşimovun ailəsinin general Qasım Süleymani mükafatından imtina etməsi, Lavrovun Azərbaycana səfərinə bəslənilməyən ümidlər,  Azərbaycan Ordusunun Xocalıya girə bilməsi mümlünlüyü, son 6 ildə Bakıda minik avtomobillərinin 100 min ədəd azalmasının səbəbləri və s. məsələlər medianın aparıcı mövzuları sırasındadır...

“Moderator.az” saytında “İranın verdiyi mükafat bizə lazım deyil” sərlövhəli məqalədə İran tərəfin Azərbaycanın şəhid generalı Polad Həşimova verdiyi mükafata anası Səmayə Həşimovanın münasibəti diqqətə çatdırılır.

Müəllif deyir ki, bir neçə gün bundan öncə İranın Azərbaycandakı səfiri və Dini lider Seyid Əli Xamneyinin Bakıdakı nümayəndəsi Əli Əkbər Ocaqnejad general Polad Həşimovun ailəsini ziyarət edib.

Səfir bildirib ki, onlar öldürülmüş general Qasım Süleymani (İran generalı Q.Süleymani 2020-c il yanvarın 3-də Bağdadda öldürülüb) adına olan lövhə və medalı şəhid Polad Həşimovun xanımına və övladlarına təqdim ediblər. Lakin şəhid general Polad Həşimovun ailəsi xəbəri təkzib edib.

Müəllif deyir ki, Polad Həşimovun anası Səmayə xanım mükafatı almadıqlarını bildirib.

"İranın Poladın adına verdiyi medal bizə lazım deyil. Oğlumun adından sui-istifadə etməsinlər. Aidiyyatı qurumlardan da medalı geri qaytarmaq üçün bizə kömək etmələrini tələb edirəm", deyə Səmayə Həşimova bildirib.

Polad Həşimovun qardaşı İlham Həşimov isə deyib: “Bəli, xəbər doğrudur. Biz o mükafatı qəbul etməmişik. Şəhid general-mayor Polad Həşimovun adından sui-istifadə etməsinlər”.

“Bizimyolinfo.az” saytı isə “Lavrovun Azərbaycana səfəri: Hansı məsələlər həllini tapa bilər” sərlövhəli məqalədə son vaxtlar medianın gündəmində qalan RF xarici işlər naziri Lavrovun Ermənistan və Azərbaycana gözlənilən səfəri şərh edilir. 

Müəllif deyir ki, Lavrov mayın 5-6-da Yerevanda, 10-11-də isə Azərbaycanda işgüzar səfərdə olacaq.

Siyasi şərhçi Mübariz Göyüşlü hesab edir ki, Lavrovun səfəri ilə problemlər həll olunmayacaq, çünki Rusiya və Ermənistan problemi həll etməkdə yox, problem yaratmaqda maraqlıdırlar.

Göyüşlü vurğulayır ki, indi Rusiya 9 may Qələbə günü ilə bağlı Xankəndidə parad keçirmək istəyir, bu isə Azərbaycanın haqlı narazılığına səbəb olur. Onun fikrincə, Lavrovun Azərbaycana gəlişi zamanı bu məsələlər müzakirə oluna bilər.

Onun sözlərinə görə, bununla yanaşı, kommunikasiyaların açılması ilə bağlı məsələ də səfər zamnaı müzakirə mövzusu ola bilər.

Göyüşlü hesab edir ki, Lavrov İrəvanda Ermənistanın öhdəliklərini bir daha xatırladacaq, çünki Ermənistan rəhbərliyi öhdəliklərdən qaçmağa və yayınmağa çalışır.

Şərhçiyə görə, Xankəndindəki separatçılar Azərbaycana təhvil verilməli, Xankəndində və ətraf ərazilərdə olan Ermənistan qüvvələri birmənalı şəkildə çıxarılmalı, orada Azərbaycan qanunları, pulu, ordusu, polisi olmalıdır.

Amma Göyüşlü Lavrovun səfəri ilə bu məsələlərin həll olunacağına inanmadığını da dilə gətirir.

“Modern.az” saytı isə “Azərbaycan Ordusu Xocalıya girəndən sonra Xankəndinin mühasirəsi daralacaq” sərlövhəli məqalədə Azərbaycan hərbi gücünün Qarabafda ata biləcəkləri addımları təxmin edir.

Politoloq Elxan Şahinoğluna görə, son vaxtlar geniş yayılan “Xankəndi Azərbaycanın nəzarətinə kecəcək” ideyası Qarabağ separatçılarını və Ermənistandakı siyasətçiləri qorxudub.

Onun sözlərinə görə, ermənilər iddia edir ki, 2020-ci noyabrın 10-da imzalanmış üçtərəfli bəyanatda Xankəndinin Azərbaycana qaytarılmasıyla bağlı bənd yoxdur və ona görə də Xankəndi rəsmi Bakının tabeçiliyinə verilə bilməz.

Amma politoloq hesab edir ki, bəyanatda belə müddəa olmasa idi, ermənilər bu qədər narahatlıq keçirməzdilər.

Politoloq vurğulayır ki, bu təlaş erməni separatçılarının narahatlığı üçün kifayət qədər əsaslar olmasının göstəricisidir,

Politoloq deyir ki, Azərbaycan Qarabağda qarşısına qoyduğu ərazilərin böyük hissəsini azad edib, eyni zamanda yerdə qalan hədəflərə də çatmalıdır. Politoloq vurğulayır ki, növbəti hədəf Xocalını azad etməkdir, Azərbaycan hərbiçiləri Xocalıya daxil olduqdan sonra Xankəndinin mühasirəsi daralacaq və bunu erməni separatçıları da anlayırlar.

Politoloq əlavə edir ki, son zamanlar Azərbaycan ordusunun bölmələri Qarabağın müxtəlif istiqamətlərində postlarını irəli çəkirlər.

Onun fikrincə, erməni separatçıları prosesin qarşsını Rusiyanın ala biləcəyinə ümidlidirlər.

Politoloq hesab edir ki, ermənilər Rusiya hakimiyyətinin Azərbaycan və Türkiyə ilə tərəfdaşlığa zərər verməmək üçün Qarabağda rəsmi Bakının hansısa istəklərini yerinə yetirə biləcəyindən də narahatdırlar.

“Sfera.az” saytında “Bakıda 100 min avtomobil hara “yoxa çıxıb”? – Ekspert azalmanın səbəblərini açıqladı” sərlövhəli məqalədə bəhs edilən məsələ gündəmin müzakirəsinə daşınır.

Ekspert Elməddin Muradlı hesab edir ki, köhnə maşınların sıradan çıxması və COVİD-19 pandemiyası azalmaya səbəb olub.

Muradlı bunu son 6 ildə Bakı şəhəri üzrə avtomobillərin 100 min ədəd azalması ilə bağlı bildirib.

Muradlı Bakıda qeydiyyatda olan avtomobillərin sayının azalmasını iki səbəblə əlaqələndirib: “İstismara yararsız avtomobillər artıq küçələrdən yığışdırılır. Artıq bu avtomobillər gözə dəymir, elə bununla da Bakıda minik avtomobillərinin sayı 100 minə qədər azalıb.

Ekspertə görə, azalmaya görə, digər səbəb pandemiyadır, yəni, əhalinin alıcılıq qabiliyyəti aşağı düşüb, bu dövrdə ölkyə gətirilən avtomobillərin əksəriyyəti satılmayıb.

Onun iddiasına görə bu amillər Bakıda minik avtomobillərinin sayının azalmaına səbəb olub.