Media-icmal 04.10.17

Qərbin "ikili standartlar" siyasətinin tənqidi, uşaqların məktəbə gedə bilməməsinin səbəbləri, ərzaq mallarının bahalaşması bugünkü (4 oktyabr, 2017-ci il) medianın aparıcı mövzularındandır.

Qərbin "demokratiya"ya qarşı mübarizəsi?

"Azərbaycan" qəzeti "İkili standartlar siyasəti Qərbin özünü də separatizmə sürükləyir"(http://www.azerbaijan-news.az/index.php?mod=3&id=131101) sərlövhəli məqalədə müəllif Qərb dövlətlərini "ikili standart siyasəti"ni tənqid edir.

Müəllif deyir ki, Qərb ölkələri separatizmə laqeyd münasibət bəsləyir, Dağlıq Qarabağda separatçı rejimin yaranması da bunun nəticəsidir: "Bütün Qərb və Avropa Azərbaycanın ərazi bütövlüyünü dəstəkləsə də Dağlıq Qarabağdakı separatçı rejimə son qoyulmasına, ölkəmizin ərazi bütövlüyünün bərpa olunmasına laqeyd yanaşır, ikili standartlardan çıxış edir".

Müəllifə görə, bu "ikili standart" indi Avropanın öz başında çatlayır və bu günlərdə Kataloniyada "referendum" keçirən həmin separatçı hərəkat bu bölgənin İspaniyadan ayrılaraq müstəqil olmasına qərar verib.

Müəllif ayrı-ayrı Qərb ölkələrində separatçı hərəkatların artdığını deyir: "Yalnız Avropada deyil, ABŞ-ın ispandilli və qaradərili əhalinin çoxluq təşkil etdiyi ştatlarında, eləcə də tarixən konfederasiyaya daxil olmuş cənub ştatlarında separatizmin qarşısını hələ ki yalnız güclü ordu və xüsusi xidmətə malik federal hakimiyyət ala bilir".

Müəllif deyir ki, baş verənlər dünyada separatizmə vahid münasibət formalaşdırmağı gündəmə gətirir, bunün üçün Qərbin aparıcı ölkələri "ikili standart"lar siyasətinə son qoymalı, Ermənistan-Azərbaycan, Dağlıq Qarabağ münaqişəsi də daxil olmaqla separatçı rejimlərlə hər cür əlaqə və onlara dəstəyi dayandırmalıdır.

Müəllifə görə, dünya birliyini təhdid edən yeni münaqişə ocaqlarının yaranmasının qarşısını almağın yeganə yolu dövlətlərin ərazi bütövlüyünün qeyd-şərtsiz dəstəklənməsidir.

Müəllif daha bir "ikili standart"ı aksiyaların dağıdılmasına münasibətdə görür və deyir ki, Avropa və ya ABŞ-da mərkəzi hakimiyyətin iradəsinin bərqərar edilməsi zamanı nümayişlər qəddarlıqla dağıdılır, lakin digər ölkələrə gəldikdə "Avropa dəyərləri", demokratiya, liberal hüquqlar yada düşür.

Müəllifə görə, bu həmin anlayışların təzyiq vasitəsi kimi istifadə olunmasının sübutudur və Avropada məhəl qoyulmayan "dəyərlər"dən Azərbaycan kimi demokratiya yolu ilə inkişaf edən dövlətlərə qarşı çirkin siyasi kampaniya aparmaq üçün istifadə edilir.

Məktəbə getməyənlərin say artımı...

"Exo" qəzetində "Təəssüf ki, hər il məktəbə getməyən uşaqların sayı artır..."

(http://ru.echo.az/?p=63157) sərlövhəli məqalə oxumaq olar.

Müəllif bir qrup uşağın təhsil ala bilməməsinin səbəblərini ekspertlərlə müzakirə edir.

Müəllif deyir ki, məktəbə getməyən uşaqlarla bağlı konkret statistika mövcud deyil, amma ekspertlər onların sayının az olmadığını bildirirlər: "Məktəb təhsil sistemindən nə qədər uşağın kənarda qalmasını demək çətindir, amma burada söhbətin minlərlə uşaqdan getməsi birmənalıdır. Problemi dərhal həll etmək mümkün deyil, amma hökumət tərəfdən ciddi nəzarətin olması zəruridir", Müstəqi Müəllimlər Birlyinin sədri, təhsil eksperti Məlahət Mürşüdlü bunu qəzetə bildirir.

Burada səbəblərin çoxluğuna diqqət çəkən ekspert maddi imkansızlıq, bir də valideynlərin günahı üzündən məktəbə getməyən iki kateqoriyanın mövcud olduğunu xüsusi vurğulayır.

"Hər il məktəbə getməyən uşaqların sayı artır, amma cəmi 25 il öncə bu problem yox idi, indi təhsilsiz nəsil böyüyür, orta təhsil almaq məcburidir. Hökumət aztəminatlı ailələrə məktəb geyimi, ayaqqabı, məktəb ləvazimatları almağa kömək etməlidir". Bunu isə qəzetə Uşaq Hüquqları üzrə QHT Alyansinin rəhbəri Nabil Seyidov deyir.

N.Seyidov hesab edir ki, məktəbə getməyənlər aztəminatlı ailələr içindədir: Bu, təqribən 90 min uşaq deməkdir, bunun yarısı maddi çətinlik üzündən məktəbə getmir, qalan yarısı isə risk qrupuna aiddir ki, istənilən vaxt məktəbə getməyə bilər".

Ekspert deyir ki, bu problemlər özünü daha çox ölkənin regionlarında göstərir.

N.Seyidov xatırladır ki, məktəbə getməyən daha bir qrup "küçə uşaqları"dır ki, bunların sayı 2-5 min nəfər arasındadır, daha bir qrup dilənçilik edən uşaqlar kateqoriyasıdır ki, bu "küçə uşaqları" kateqotiyasına aid deyil və onalrın sayı daha çoxdur.

Ekspert deyir ki, daha bir qrup əlilliyi olan uşaqlardır və kateqoriyaya aid 63 min uşaqdan 10 min nəfəri təhsil ala bilmir, səbəb də budur ki, ölkədə inklüziv təhsil sistemi yoxdur.

Həyat statistika deyil...

"Novoye Vremya" qəzetində isə "Ərzağın qiyməti əhəmiyyətli dərəcədə artır" ( http://www.novoye-vremya.com/w107258/.../#.WdPJoWi0PIU) sərlövhəli məqalə diqqət çəkir.

Müəllifə görə, hər gün vətəndaşların alış-verişi onlarda dalğınlığa səbəb olur, belə ki, hər gün əhali yeni qiymətlərlə rastlaşır, "pul qabı" daha tez boşalır, inflyasiya isə "kağız" üzərində ilbəil enir.

Müəllif deyir ki, əhali qazancının 1/3-nü, aztəminatlılar isə yarısını qidaya sərf edir.

Müəllif bu sahədə rəsmi statistik göstəricilərə şübhə ilə yanaşır və deyir: "İnflyasiya məsələsinə baxaq. Hökumət bundan danışanda hansısa indikatoru başa düşür ki, sabitlik, iqtisadi rifah göstərməlidir. "Orta hesab"la hesablayırlar, o qədər də pis deyil, inflyasiya nəzarətdən çıxırsa manat möhkəmləndirilir və kağızda hər şey yaxşı görünür. Amma həyat statistika deyil".

Müəllif xatırladır ki, əhali mağazalarda "kağız" üzərindəki qiymətlərlə yox, real qiymətlərlə haqq-hesab edir, burada isə qiymətlər gündə yox, hər saatda artır: " Məs, son ayda ət, yumurta, süd məhsulları bahalaşıb, idxal məhsullarının, xüsusən, xaricdən gələn yağların qiymətləri daha çox bahalaşır. Bir həftə öncə10 manata olan yağ, indi 14 manata satılır. Son günlər bahalaşma daha kəskin hiss edilir".

Müəllif deyir ki, orta statistik sakin gəlirinin 33%-ni qidaya xərcləyir, pensiyaçılarda isə bu 56% təşkil edir, beləliklə aztəminatlıların rasionuna daxil olan qida məhsullarının qiymətləri bahalaşır.

Məqalədə deyilir ki, ekspertlər bu bahalaşmanı mövsümi xarakterlə izah edirlər, yəni yayda aqrar sahə məhsullarının qiymətləri enir, amma payızda bahalaşır.

Müəllif vurğulayır ki, ölkədə ətin qiymətinin bahalaşması heyvandarlığa aid örüş yerlərinin kənd təsərrüfatı bitkiləri üçün əkin yeri kimi verilməsidir, beləliklə yem bahalaşır, bundan da irəli gələrək ət və ət məhsullarının qiyməti artır.

"Qida məhsullarının bahalaşmasının daha bir səbəbi manatın gələcəkdə ucuzlaşa bilməsi ehtimalıdır və həm də bu ilin yayında benzinin bahalaşması da qiymət bahalığına təsir göstərir". Bunu isə ekspert Vahid Məhərrəmli qəzetə bildirir.

Ekspert deyir ki, istehsal edilən meyvə və tərəvəzin həcmi azalıb, fermerlər malları indi baha qiymətə satmaq istəyir, çünki bayramlardan sonra onları baha qiymətə alan olmayacaq.