Media-icmal 04.12.19

Ölkədə aparılan kadr islahatları, RF XİN başçısının Azərbaycan səfərinin müzakirəsi, İranda yayılmış “quş qripi” virusunun Azərbaycanda yayıla bilməsi və s. məsələlər medianın aparıcı mövzuları sırasındadır...

Kadr islahatları-mahiyyət

“Azərbaycan” qəzeti “Yeni kadr dəyişiklikləri islahatların dönməzliyinin təsdiqidir” sərlövhəli məqalədə ölkədə aparılan kadr islahatlarını dəyərləndirir.

Müəllif deyir ki, Azərbaycan artıq illərdir ki, davamlı islahatları həyata keçirən dövlət imicini qazanıb, iqtisadiyyatın şaxələndirilməsi, qeyri-neft sektorunun inkişafı, dövlət quruculuğunun təkmilləşdirilməsi, qanunvericiliyin islahatların ruhuna uyğunlaşdırılması istiqamətlərində atılan bütün addımlar yüksək qiymətləndirilir.

Müəllifə görə, dövlət başçısı İlham Əliyev belə hesab edir ki, nəsillərin təbii dəyişməsi yeni ideyaların və yeni münasibət modellərinin yaranmasına təkan verir.

Yazı müəllifi əlavə edir ki, bundan da irəli gələrək ölkədə gəncləşmə siyasətinin aparılması labüddür və bunu dərk etməmək, ondan kənarda qalmaq mümkün deyil.

Onun fikrincə, Prezident kadr islahatlarında dərin məntiqə, müasir dünya təcrübəsinə arxalanır və eyni zamanda yüksək eşelondakı bir qədər yaşlı insanlara qarşı kampaniya təşkil etməyə yönələn cəhdlərin qarşısını qətiyyətlə alır.

Yaşlı kadrlarla bağlı müəllif ekspertlərə istinadən deyir ki, Prezident Administrasiyası tərkibinə yüksək vəzifələrə sınanmış kadrların irəli çəkilməsi də müşahidə olunur və bununla yeni kadr siyasətində vacib balans qorunur.

Müəllifə görə, yüksək vəzifəyə təyin olunan məmurlarla bağlı qəbulların KİV-də geniş işıqlandırılması dövlət başçısının  kadr siyasətində şəffaflığı gözlədiyinin sübutudur.

Məqalə müəllifinə görə, bununla həm də Prezident iqamətgahından həm ölkəyə, həm dünyaya Azərbaycanın gələcəyi və perspektivlərinin islahatlara və yüksək tələblərə kökləndiyi, hamının islahatların sürətlə həyata keçirilməsinə kömək etməli olduğu mesajı verilir.

Yazı müəllifi ekspertlərə istinadən deyir ki, sonuncu kadr islahatları Azərbaycan dövlətçiliyi tarixində yeni və təqdirəlayiq mərhələdir.

Müəllifə görə, ölkədə hamıya aydındır ki, dövlət başçısının nümayiş etdirdiyi soyuqqanlı praqmatizm, sistemli və mərhələli islahatlar ayrı-ayrılıqda hər bir kəsin, bütünlükdə isə milli maraqların tam təmin olunmasına yönəlmişdir.

Yazının sonunda isə oxuyuruq: “Dövlət quruculuğunda, iqtisadi proseslərin idarə olunmasında, əhalinin sosial maraqlarının təmin edilməsində İlham Əliyevin nümayiş etdirdiyi uzaqgörənlik və prinsipiallıq Azərbaycanda islahatların dönməzliyini təsdiq edir”.

Lavrovun Bakı səfəri, amma etiraf olmadı

“Teleqraf.com”da isə “Lavrovun Bakı səfəri - Tofiq Zülfüqarovun şərhi” sərlövhəli məqalə oxumaq olar.

Müəllif Rusiya xarici işlər naziri Sergey Lavrovun Azərbaycana səfəri, bu səfərin mahiyyəti haqda keçmiş xarici işlər naziri Tofiq Zülfüqarovla söhbətləşir.

T.Zülfüqarov vurğulayır ki, S.Lavrovun İrəvanda verdiyi bəyanatlara RF XİN düzəlişlər edərək, bildirdi ki, danışıqlar iki ölkə arasında aparılmalıdır (Rusiya xarici işlər naziri S.Lavrovun bu ilin noyabrında İrəvanda səfərdə olması, Azərbaycanın Ermənistanla yanaşı Dağlıq Qarabağ xalqı ilə danışıqlar aparmalı olduğunu söyləməsi, sonradan RF XİN-in buna danışıqların Azərbaycanla Ermənistan arasında getməsi kimi düzəliş etməsi nəzərdə tutulur - red).

Bu faktı nəzərdə tutaraq T.Zülfüqarov “teleqraf.com”a açıqlamasında: “Bakıda buna aid, yaxud Azərbaycanı narahat edən məsələ ilə bağlı hansısa bəyanatlar səslənəcəyi gözlənilirdi, biz isə onun şahidi olmadıq”, deyə bu xüsusda etiraf olmadığını bildirir.

Bütünlükdə isə T.Zülfüqarov Lavrovun səfərini neqativ qiymətləndirdiyini söyləyib: “Ümumi sözlər deyildi, mənasız tədbirlər, yəni tərəflər arasında etimad mühitinin bərpası istiqamətində addımların vacibliyi vurğulandı. Nəticəsiz məsələdir. Lavrov İrəvanda olanda Ermənistanın mövqeyini əks etdirən bəyanatlar verdi. Azərbaycana səfəri zamanı bizim əsas məsələmiz - işğal olunmuş ərazilərin azad olunması barədə heç bir bəyanat vermədi. Yenə də öz mövqeyində qaldı. Hesab edirəm ki, onun mövqeyi Azərbaycana qarşı etnik zəmində formalaşmış qərəzli mövqedir”, nazir Lavrovun Azərbaycana səfərinin mahiyyətini belə dəyərləndirir.

Müəllif xatırladır ki, S.Lavrov ötən ay İrəvana səfəri zamanı Dağlıq Qarabağ xalqının razılığı olmadan heç bir razılaşmanın əldə olunmayacağına dair bəyanat səsləndirmişdi.

Bu günlərdəki Bakı səfərində isə Rusiya XİN rəhbəri çıxışında deyib ki, RF həm Vyana sammitində, həm sonradan nazirlərin Moskva görüşündə etimad tədbirləri, humanitar əlaqələrin, KİV xətti ilə əlaqələrin nizamlanması barədə əldə edilmiş razılaşmaların bu il təsdiqlənməsində və həyata keçirilməsində maraqlı olduğunu vurğulayıb.

Xatırladaq ki, Qarabağ münaqişəsi 1988-ci ildən başlayıb. 1994-cü ildə atəşkəs razılığına kimi Dağlıq Qarabağ bölgəsini, bura bitişik 7 rayonu işğal edib. Münaqişənin nizamlanması ATƏT-in Minsk qrupuna həvalə edilib, ABŞ, Fransa və Rusiya həmsədr dövlətlərdir.

“Quş qripi” təhlükəsi

“Yenisabah.az”da isə “Azərbaycandakı ölümcül virusla bağlı dəhşətli faktları açıqladı: Sirr kimi gizlədilir” sərlövhəli məqalə diqqət çəkir.

Müəllif İranda “quş qripi”nin yayılması, kütləvi ölümlərə səbəb olması, bu virusun Azərbaycanda yayıla bilməsi barədə Azad İstehlakçılar Birliyinin sədri Eyyub Hüseynovla söhbətləşir.

Müəllifin sözlərinə görə, İran Səhiyyə Nazirliyi açıqlama yayaraq, bu il “quş qripi”nin İranda çox geniş formada yayıldığını, ilin əvvəlindən indiyədək quş qripindən 37 nəfərin öldüyünü, çox sayda insanın xəstəxanaya yerləşdirildiyini bildirir.

Yazı müəllifi İranın Azərbaycana qonşu ölkələrdən biri olduğunu, bu xəstəliyin Azərbaycanda yayıla bilməsi fikrinin əhali arasında böyük təşvişə səbəb olduğunu vurğulayır.

Bununla bağlı “yenisabah.az”a açıqlama verən Azad İstehlakçılar Birliyinin sədri Eyyub Hüseynov deyir ki, məsul qurumlar bu ehtimalın qarşısını almaq üçün müvafiq tədbirlər həyata keçirmirlər:

“Əlbəttə ki, bu virusun ölkəmizə gəlmə ehtimalı var. Əhalidən çoxsaylı zənglər gəlir ki, bəzi broyler şirkətlərində milyonlarla toyuq ölümü baş verir.

Bu isə cəmiyyətdən sirr kimi gizlədilir. Orda işləyən insanlar isə bizdən tələb edirlər ki, nə üçün bu quşçuluq fabriklərində monitorinqlər aparılmır? Daha çox "Giləzi" quşçuluq fabrikinin adını çəkirlər”.

E.Hüseynovun sölərinə görə, broyler işçilərinin bu xəstəliyin toyuqların yumurtalarına da keçə bilməsi kimi narahatlıqları var: “Əhaliyə məsləhət görərdim ki, daha çox məhsulların üzərində öz firmalarının adının qeyd olunduğu malları istehlak etsinlər. Bu işlərə vaxtilə Səhiyyə Nazirliyi tərəfindən yaxşı nəzarət olunmadı”. 

E.Hüseynov deyib ki, burda əsas yük Qida Təhklükəsizliyi Agentliyinə düşür və bu qurum əhalini məlumatlandırmalı, monitorinqlər keçirməlidir.