Media-icmal 06.07.20

Koronavirus pandemiyası və onun çoxcəhətli fəsadlarına qarşı mübarizə ölkənin internet resurslarının aparıcı mövzusu olaraq qalır. Bundan əlavə, ölkənin sosial-iqtisadi həyatında baş verənlər də saytlarda əksini tapır...    

İş adamlarına edilən güzəştlər 

"Azərbaycan" qəzeti  "İlham Əliyevdən sahibkarlara növbəti böyük dəstək" sərlövhəli məqalədə sahibkarlara dövlət dəstəyini dəyərləndirir.

Müəllif deyir ki, Azərbaycan hazırda koronavirus pandemiyasından az itkilərlə çıxmaq, eləcə də makroiqtisadi sabitliyi qorumaq üçün imkanlarını səfərbər edib.

Yazıda vurğulanır ki, hökumət əhalinin sosial rifahının yaxşılaşdırılması, sahibkarlara dəyən zərərin ödənilməsi istiqamətində qərarlar qəbul edib, sahibkarlıq subyektlərinə vergi güzəştləri, tətillər verilməsi, sosial sığorta yükünün azaldılması, kredit faizlərinin subsidiyalaşdırılması və zəmanət alətlərinin təkmilləşdirilməsi prosesi həyata keçirilir.

Bununla yanaşı, sahibkarlara dövlət dəstəyi, iş adamlarının güzəştli kredit almaq imkanları genişləndirilir, bu günədək 130 mindən çox sahibkara maliyyə dəstəyi göstərilib: "Qəbul edilmiş proqramlar işçi heyəti ilə birlikdə 310 mindən artıq vətəndaşı əhatə edib... İndiyədək 155 milyon manatdan çox maliyyə vəsaiti sahibkarların bank hesablarına köçürülüb", deyə müəllif bildirir.

Qəbul edilmiş vergi və sosial güzəştlər paketinin ümumi maliyyə dəyəri 130 milyon manatdır, güzəştlər pandemiyanın təsirinə məruz qalan mikro, kiçik və orta sahibkarlıq subyektlərini, bəzi dəyişikliklər isə bütövlükdə hər bir vergi ödəyicisini əhatə edir.

Yeni mexanizmlər biznes kreditlərin alınması prosedurlarını asanlaşdırır və bunun üçün Elektron Kredit Platforması yaradılıb.

Habelə, sahibkarlara yeni kreditlər üzrə dövlət zəmanətinin verilməsi və həmin kreditlər üzrə faizlərin subsidiyalaşdırılması, mövcud kredit borcu olan sahibkarların kredit faizlərinin bir hissəsinin dövlət tərəfindən maliyyələşdirilməsi mexanizmlərinin tətbiqinə başlanılıb.

Ümidlər net-qaz gəlirlərinə bağlanmamalı...

"Moderator.az"da yer alan  "Ümidləri neft-qaz satışından gələn gəlirlərə bağlamaq çox təhlükəlidir, biz yubanırıq..." sərlövhəli məqalədə isə deputat Qüdrət Həsənquliyev ölkənin iqtisadi həyatı və islahatlarla bağlı düşüncələrini bildirir.

Deputat son vaxtlar Kür çayında suyun səviyyəsinin aşağı düşməsilə bağlı Neftçala rayonunda içməli su problemi yarandığını deyərək, bunun qarşısını almaq üçün Kürün Xəzərə töküldüyü ərazidə bənd qurulmasını təklif edir.

Ona görə Kürün təbii yatağını su ilə dolduracaq səviyyədə çay boyunca bir neçə yerdə bəndlər vurulmalıdır: "Kür böyük çay deyil, həmin bəndlərdə şülüzlər qoyulmalıdır ki, ehtiyac olduqda suyun səviyyəsini tənzimləmək mümkün olsun,  Artıq sular bəndlərin üstündən aşıb getməlidir. Biz XXI əsrdə yaşayırıq, bu kimi texniki problemləri həll etmək çox sadədir".

Ölkədə islahatların dərinləşdirilməsi barədə danışan deputat deyir ki, bu istiqamətdə hansısa işlər görülür, amma islahatların sürəti ciddi narahatçılıq doğurur: "Ümidləri neft və qaz satışından gələn gəlirlərə bağlamaq çox təhlükəlidir. Biz yubanırıq, ölkəyə investisiya cəlb etmək üçün vergilər azaldılmalı, maliyyə-kredit sektorunda islahatlar aparılmalı, kredit dərəcələri 3-4%-dən artıq olmamalı, nüfuzlu xarici banklar ölkəyə çağırılmalı, güclü məhkəmə hakimiyyəti formalaşdırılmalıdır".

Onun fikrincə, neft fondunun vəsaitlərini yalnız hökumətin xərcləməsi praktikasına son qoyulmalı, onların bir hissəsi yerli banklarda yerləşdirilməlidir ki, sahibkarlar öz baxışlarına uyğun layihələrə xərcləyə bilsinlər, bunlarsız ölkənin sürətli inkişafını gözləmək əbəsdir.

Daha bir rayonda su böhranı

"Oxu.az"da "Daha bir rayon su böhranı ilə üz-üzədir" sərlövhəli məqalədə müəllif Biləsuvar rayonunda su problemi yaşandığını diqqətə çatdırır.

Müəllif deyir ki, Cənub-Muğan kanalının Biləsuvar rayonundan keçən hissəsində su azalıb, rayonun Ağalıkənd, Əmənkənd, Ovçubərə, Yuxarı Cürəli və Təzəkənd kəndlərində su çatışmazlığına səbəb olub.

Yerli sakinlərin sözlərinə görə isə, son bir ayda adları çəkilən bu kəndlərə su fasilələrlə verilib: "Artıq bir neçə gündür ki, Cənub-Muğan kanalının qeyd olunan kəndlərdən keçən ərazisində su tamamilə quruyub. Sakinlər içməli su, eyni zamanda kənd təsərrüfatında əkin və mal-qara üçün zəruri olan su ehtiyatlarını tapmaqda çətinlik çəkirlər".

Müəllif deyir ki, Cənub-Muğan kanalı 1960-cı ildə istismara verilib, uzunluğu 65 kilometrdir. Mənbəyini Araz çayından götürür, Azərbaycanın üç rayonunda - İmişli, Biləsuvar və Cəlilabad rayonunda yerləşir. Son vaxtlar Kür çayında suyun səviyyəsinin aşağı enməsi Xəzər dənizi sularının çaya tökülməsinə səbəb olub.

Məqalədə Xəzərin suyunun Kürə qarışması Neftçala rayonunda içməli və suvarma sularının çatışmazlığı problemi yaradıb. Bu da rayonda ciddi ekoloji təhlükənin olması deməkdir. İlkin məlumata görə, dəniz suyu 30 kilometr məsafədə Kür çayına qarışıb. Neftçala şəhərinin özündə, daha iki qəsəbə və 7 kəndində (Sübh, Qırmızı Şəfəq, Yenikənd, 1 və 2 nömrəli Mayak, Bankə qəsəbəsi, Kürkənd, Uzunbabalı, Şirvanlı, Tatarməhlə kəndlərinin və şəhər mərkəzi) əhali sudan istifadə baxımından çətin durumda qalıb.