Media-icmal 06.08.20

Sərt karantin rejiminin yumşaldılmasının səbəbləri, vətəndaşlara dövlət dəstəyinin davam etdirilməsi, DST-dən COVİD-19 ilə bağlı “payız mərhələsi” xəbərdarlığı və s. məsələlər medianın aparıcı mövzuları sırasındadır.

Əgər qaydalara əməl olunsa...

“Azərbaycan” qəzeti “Effektiv tədbirlər yumşaldılmalara zəmin yaratdı” sərlövhəli məqalədə COVİD-19 pandemiyası ilə bağlı avqustun 5-dən sərt karantin rejimindəki yumşalmaları dəyərləndirir.

Müəllif deyir ki, Azərbaycan koronavirusa qarşı mübarizə tədbirlərini tez aldı, möhkəm maddi-texniki baza, modul tipli xəstəxanaların inşası, müasir laboratoriyaların quraşdırılması pandemiyanı nəzarətdə saxlamağa imkan verib.

“Hazırda ölkəmizin 46 xəstəxanasında koronavirus xəstələri müalicə alır. Bu xəstəxanaların 41-i son 16 il ərzində tikilib və ya əsaslı şəkildə təmir edilib. Onlar müasir avadanlıqlarla təchiz olunub. Buna görədir ki, 28 minə yaxın virusa yoluxmuş vətəndaşımız müalicə olunaraq sağalıb, koronavirusdan həyatını itirənlərin sayı minimum həddə olub”.

Müəllifə görə, hazırda ölkədə 31 laboratoriya fəaliyyət göstərir, perspektivdə 45-ə çatdırılması planlaşdırılır, indiyə kimi Azərbaycanda 750 mindən çox test keçirilib.

Müəllif hesab edir ki, effektiv tədbirlər tədricən sərt karantin rejimindən yumşaldılmalara keçidi sürətləndirib, SMS icazə ləğv edilib, çimərliklər fəaliyyətə başlayıb, sağalanlar artır, virusa yoluxanlar azalır, bununla belə bəzi bölgələrdə sərt karantin rejimi qüvvədə qalır.

Müəllif xəbərdarlıq edir ki, yumşaldılma COVID-19-un yox olması deyil,  odur ki, maska taxılması, sosial məsafəyə, gigiyenik qaydalara  əməl olunması davam etməlidir.

Müəllif deyir ki, payız-qış mövsümündə kəskin respirator virus infeksiyalarının artması qaçılmazdır, amma koronavirusla mübarizədə tələb olunan qaydalara ciddi əməl olunsa bunu atlatmaq asan olar.

Pandemiyanın yaratdığı suallar

“Müsavat.com” saytı  “Fazil Mustafa: Azərbaycan vətəndaşının, sahibkarının vəziyyəti  acınacaqlıdır” sərlövhəli məqalədə ölkədə COVİD-19 pandemiyasının iqtisadi sahədə yaratdığı vəziyyətlə bağlı deputat Fazil Mustafanın düşüncələrinə yer verib.

Deputata görə, pandemiyanın yaratdığı şərtlər elədir ki, mütləq çevik qərarlar verilməlidir.

F.Mustafanın fikrincə, ilk növbədə müdafiə xərclərinin artırılmasına diqqət yetirməli, ikincisi də vətəndaşın, sahibkarın durumuna fikir verməlidir.

“Bu gün Azərbaycan vətəndaşının, sahibkarının vəziyyəti acılanacaqlıdır. Vətəndaşa verilən 190 manat çox az məbləğ olsa da, zəruri bir yol idi, cəmiyyət də bunu anlayışla qarşıladı. 600 min əhaliyə 284 milyon verə bildik”.

Deputat əlavə edir ki, amma artıq evinə qapadılan vətəndaşa nə veriləcyi vədi verilmir: “Vəd vermirik ki, sənə nə verəcəyik? Yaxşı insanlar nə etsin? 190 manat nəyə çatacaq?  Amma heç olmasa bu, rəmzi xarakter daşıyan dövlətin dəstəyidir, bunu heç vaxt kəsmək olmaz”.

F.Mustafa vurğulayıb ki, bir-iki aydan sonra bu, ölkə üçün çox ciddi problemlərə gətirib çıxara bilər. Yaxud böyük iş yerlərinin açılmasını təmin etməliyik. 31 avqusta qədər böyük ticarət mərkəzləri bağlandı, orada çalışanlar nə ilə dolanmalıdır?”

DST-dən TƏBİB-ə  “payız hazırlığı” tövsiyələri

“Yenisabah.az”  saytı “Virusun gələcəkdə mutasiyaya uğraması, payız aylarında...” sərlövhəli məqalədə COVİD-19 pandemiyasına qarşı mübarizənin “payız mərhələsi” barədə Tibbi Ərazi Bölmələrini İdarəetmə Birliyi (TƏBİB) İdarə Heyətinin sədri Ramin Bayramlının şərhinə yer verir.

TƏBİB rəhbərinin deməsinə görə, Dünya Səhiyyə Təşkilatı (DST) və digər beynəlxalq səhiyyə qurumlarının Azərbaycana dəvət olunan ekspertləri payız aylarına hazırlıqla bağlı tövsiyələr verirlər.

Müəllif deyir ki, artıq Gənclər və İdman Nazirliyinin tabeliyində olan Hövsan və Abşeron Olimpiya İdman Kompleksləri müvəqqəti xəstəxanaya çevrilib: “Bütün dünya ölkələri bu hazırlığı görür, çünki xəstəliyin gedişatını öncədən proqnozlaşdırmaq çox çətindir. Virusun gələcəkdə mutasiyaya uğraması, payız aylarında ehtimal olunan digər respirator virus infeksiyalarla birlikdə gedişatı və s. problemlərə səbəb ola bilər. Bununla səhiyyə müəssisələrinin üzərinə düşən yük arta bilər. Bu baxımdan bütün ölkələr ehtiyat tədbirini görür”.

R.Bayramlı deyir ki, xaricdən dəvət edilən ekspertlərin bir səbəbi də  təlimlərin tez keçirilməsidir. Onun deməsinə görə, tibbi heyət yetərlidir, sadəcə, reanimasiya vəziyyətində yardım göstərmək üçün müəyyən təcrübəyə ehtiyac var.

Hövsan Olimpiya İdman Kompleksinin iki idman zalında müvəqqəti arakəsmələr qurulmaqla çarpayı sayı 280-ə yaxın xəstəxana palataları və 10 çarpayılıq reanimasiya zalı quraşdılıb.