Media-icmal 07.03.2017

Dövlət başçısı İlham Əliyevin islam ölkələrinə səfərləri, ölkədə ərzaq bahalaşması, jurnalist F.Fəraməzoğlunun həbsinin səbəbləri barədə paylaşımı, Bakının keçmiş “Sovetski” məhəlləsində qalanların problemləri bugünkü medianın aparıcı mövzusudur.

“İslam Həmrəyliyi” ilində 3 müsəlman ölkəsinə səfər

“Azərbaycan” qəzeti  “İslam Həmrəyliyi ilinin bir həftəsində 3 müsəlman ölkəsinə səfər (http://www.azerbaijan-news.az/index.php?mod=3&id=117472) sərlövhəli məqalədə dövlət başçısı İlham Əliyevin müsəlman ölkələrinə səfərləri dəyərləndirilir.

Müəllif deyir ki, Azərbaycanın islam ölkələrilə əlaqələri ildən-ilə genişlənir.

Azərbaycanın İslam Əməkdaşlıq Təşkilatının, İSESCO -nun və islam ölkələrini birləşdirən digər qurumların üzvü seçilərək islam aləmilə münasibətləri gücləndirdiyi vurğulanır.

Müəllif  bu xüsusda dövlət başçısı İlham Əliyevin islam ölkələrinə səfərlərini xüsusi olaraq ön plana çıxarır: “Prezident İlham Əliyevin Qətər və Pakistan dövlətlərinə səfərlərinin ardınca bu günlərdə İrana rəsmi səfəri də dövlətlərarası münasibətlərin inkişafında yeni mərhələ oldu”.

Müəllif dövlət başçısı İlham Əliyevin bir həftədə 3 müsəlman ölkəsinə səfərini Azərbaycanın islam dünyasının müasirlik və əməkdaşlıq mərkəzi kimi uğurla təqdim etməsi kimi dəyərləndirir: “Qlobal aləmdə siyasi və sosial kataklizmlərin yaşandığı bir şəraitdə, ən əsası isə islam dünyasının birliyinə nail olmağa ciddi ehtiyacın olduğu bir vaxtda islam həmrəyliyi təşəbbüsünün irəli sürülməsi dünyada sülhün, əmin-amanlığın bərqərar olunması üçün yeni yol xəritəsinin ortaya çıxmasına imkan yaradacaq”.

İ.Əliyevin martın 5-də İrana səfəri fonunda Azərbaycan-İran əlaqələrinə toxunan müəllif  deyir ki, hər iki xalqın dil, mədəniyyət, mənəvi dəyərlər baxımından yaxınlığı rəsmi Tehranla Bakı münasibətlərinə təsir göstərən amillər sırasında sadalanır. 

Məqalədə xatırladılır ki, 1993-cü ildə keçmiş prezident Heydər Əliyev hakimiyyətə gəldikdən sonra İranla da münasibətlər yeni mərhələyə qədəm qoyub və bu yol da davam etdirilir.

Daha sonra müəllif dövlət basçısı İlham Əliyevin martın 5-də İran səfərinə, səfər çərçivəsində görüşləri və imzalanan sənədlər barədə danışır, bu görüşlərdə Qarabağ problemindən regional və beynəlxalq problemlərə qədər bir çox məsələlərin müzakirə obyekti olduğunu bildirir.

Məqalədə deyilir ki, İrana rəsmi səfərin yekunları iki ölkə arasında  münasibətlərin intrensiv inkişafının təsdiqidir,  əməkdaşlıq sahəsində əldə edilən ciddi uğurlar dövlətlərarası münasibətlərin inkişafında öz sözünü deyir.

Onların məndə axtardıqları ...

“Azadlıq.info” saytı “Fikrət Fərəməzoğlu həbsinin gerçək səbəbini açıqladı” (https://www.azadliq.info/179924.html) sərlövhəli məqalədə həbsdə olan jurnalist, “jam.az” saytının rəhbəri Fikrət Fərəməzoğlunun düşüncələrinə yer verib. Belə ki, bu mövqeyi xanımı Faiqə Nüsrəti öz facebook səhifəsində paylaşıb.

F.Fərəməzoğlu deyir ki, əldə etdiyi məlumata görə, həbsinə səbəb “bandotdel” rəhbərliyində MTN-in iş adamları, habelə digər şəxslərlə bağlı şantaj videolarının bir qisminin onda olması qənaətindən irəli gəlib: “Bandotdel”in əməliyyatçıları həm evimdə, həm də maşınımda hansısa görüntülərin olduğu flaş kart və CD-ləri axtarıb. Hətta evimdə və maşınımda olan bütün CD-ləri özlərilə götürüblər. Qəribədir ki, götürülən əşyaların heç biri haqqında istintaq materiallarında məlumat verilməyib”.

F.Fəraməzoğlu bildirir ki, həbsinin ilk günlərində həm əməliyyatçılar, həm də müstəntiq ondan hansısa görüntülər barədə israrla soruşurmuş, amma həmin vaxt onların nə axtardıqları və nə istədiklərini anlamayıb.

Jurnalist evindən və ya maşınından götürülən CD-lərdə şantaj xarakterli hər hansı görüntünün aşkarlanmadığını bildirir.

F.Fəraməzoğlu iddia edir ki, onda şantaj xarakterli videolarun olması haqda məlumatları polisə jurnalistikada bəzi qeyri-ciddi tanınan şəxslər ötürüb: “Bandotdel”in axtardığı görüntülərin bir qismi Dövlət Təhlükəsizlik Xidmətinin  (DTX) keçirdiyi əməliyyat zamanı yaxalanmış “reket” jurnalistlərin kompüterindən və ofisindən çıxıb.

Bu haqda F.Fərəməzoğlu deyir: “DTX-nin əməliyyatından sonra “bandotdel”in nəinki əməliyyatçıları, hətta rəhbərliyi şok vəziyyətində idi. Çünki axtardıqları məndən çıxmamışdı. Bunu dolayısı ilə özləri də etiraf edirdilər”.

F.Fərəməzoğlu vurğulayır ki, onda nəinki MTN-ə aid olan, hətta başqa hər hansı şantaj xarakterli görüntülər olmayıb və olması mümkün də deyil, çünki yaxından və ya uzaqdan keçmiş MTN-lə heç bir əlaqəsi olmayıb.

Jurnalist xatırladır ki, hələ 2008-ci ildə keçmiş MTN rəhbərliyi qəzetini əlindən alıb, özünü isə 3 gün həbsdə saxlayıb.

Ət kəskin bahalaşır

 “Novoye Vremya” qəzetində “Ətin qiyməti sürətlə artır, Kənd Təsərrüfatı Nazirliyi yarmarkalara ümid edir” sərlövhəli məqalədə  müəllif ölkədə ərzaq bahalaşmasının səbəblərini ekspertlərlə müzakirə edir.  (http://www.novoye-vremya.com/w84399/.../#.WL2fEDuLTIU) 

Müəllif Azərabycanda ətin bahalaşdığını bildirir. Məqalə müəllifi qəssablara istinadən ətin bahalaşmasına səbəb kimi kommunal xidmətlərin bahalaşmasını və korrupsiyanın mövcudluğunu göstərir.

Ekspert Oqtay Haqverdiyev hesab edir ki, qiymətlər süni olaraq qaldırılır və bu, inhisarın əlindədir: “Mənə elə gəlir ki, bazarlarda inhisarın varlığını unutmaq olmaz. Göndəricilər əti qəssablara çatdırırlar, öz aralarında qiyməti razılaşdırırlar, bu durum bütün bazarlarda hökm sürür.Bu isə artıq inhisarın təzahürüdür.

Müəllif ətin qiymətinin 16 manata yüksəldiyini deyərək hələ fevralın sonlarında 11-12 manata satıldığını xatırladır.

Məqalədə vurğulanır ki, Kənd Təsərrüfatı Nazirliyi ölkədə ət və toyuq əti istehsalının artdığını bildirir: “Kənd yerlərində mal ətinin bir kiloqramı 8-9 manatdır, Bakida sümüksüz ət 16 manata satılır. Hətta istehsalçı qiyməti qaldırılan enerjiyə və xidmətlərə görə məsrəfləri bağlamaq istəsə belə qiymətlər bu qədər yüksəlməməli idi”.

Nazirlik yaxın günlərdə Bakıda bayramöncəsi yarmarkaların təşkil olunacağı, bu yarmarkalarda ətin bir kiloqramının  8-8,50 manata satılacağını bildirib. Nazirlik həm də belə hesab edir ki, bu yaramarkaların təşkili qiymət artımının qarşısını da ala bilər.

Müəllif isə Nazirliyin bu mövqeyini əsaslı saymayaraq yarmarkaların bazar qiymətlərinə təsir göstərmək gücündə olmadıqlarını bildirib.

Azad İstehlakçılar Birliyinin sədri, ekspert Eyyub Hüseynov ölkənin ət qıtlığı yaşadığını deyir və yaxın zamanlarda ətin bir kiloqramının 20 manata kimi yüksələcəyini  vurğulayır: “Bütünlükdə isə bütün ərzaq məhsullarının qiymətləri bu ilin sonuna 50%-ə qədər bahalaşa bilər. Bu, əsasən ət və kolbasa məhsullarına aiddir. Bazarlarda isə qiymət artımı artıq dözülməz olub”.

Ə.Hüseynov hesab edir ki, hökumətin nə deməsindən asılı olmayaraq ölkə idxaldan 30% asılıdır, üstəlik ölkə mağazalarını ərzaq malları ilə təmin etmək sahəsində asılılıq isə daha çoxdur.  

Müəllif deyir ki, təkcə ət deyil, süd məhsullaırının, yumurta, bal və s. ərzaq mallarının idxalı kəskin artıb: “Birmənalı demək olar ki, Novruz bayramı ərəfəsində ətin qiyməti bahalaşacaq”.

“Sovetski”dəkilərin kompensasiya xəyalları

“Müsavat.com” saytı “Söküntü, toz-torpaq, səs-küy və insanlar: Sovetskidə həyat belə davam edir” sərlövhəli məqalədə  hələ də “Sovetski” məhəlləsində yaşayan sakinlərin problemləri araşdırılır.

(http://musavat.com/news/sokuntu-toz-torpaq-ses-kuy-ve-insanlar-sovetski-de-heyat-bele-davam-edir-fotolar-reportaj_421047.html)

Müəllif Bakının keçmiş “Sovetski” məhəlləsində söküntü işlərinin sürətli şəkildə davam etdiyini deyir, hələ ki məhəllədə az da olsa yaşayanlar  bu söküntülər zamanı kommunal xətlərin sıradan çıxmasından narazılıq edirlər.

Müəllif deyir ki, keçmiş məhəllənin əhatə etdiyi bəzi küçələrdə sökülən evlərin dağıntıları qalmaqdadır, söküntü zamanı partlayan su boruları bəzi yerlərdə gölməçələr əmələ gətirib, buradakı sakinlər isə su üzünə həsrət qalıblar. 

Müəllif bir sakinə istinadən hələ də məhəllədə yaşayanların durumunu belə anladır: “Bizim evin ön, arxa və sağ tərəfindəki evlər sökülüb. Hətta evə bitişik mənzil də söküntüyə düşüb, növbəsini gözləyir. Bizim evlə bağlı isə bir söz demirlər. Adam buna görə narahat qalır, evdə körpə uşaq var, səs-küydən yata bilmir. Hava külək, hər yanda da söküntü gedir. Toz-torpaq içində qalırıq”.

Müəllifə görə, bəzi sakinlərin qorxusu uzun müddət buradan köçə bilməməklə bağlıdır.

Məqalədə deyilir ki, bəziləri hələ də verilən kompensasiyaların azlığından narazıdır və onlara verilən pula mənzil almağın mümkünsüzlüyünü deyirlər:

"Manat dəyərdən düşüb. Bizə hər kvadratmetrə görə 1500 manat təklif olunan iqtisadi vəziyyətlə indiki vəziyyət eynidir? Yox. Hər şey bahalaşıb. Evlər baha, qida baha, kommunal baha. Hər şeyin qiymətinin artdığı bir zamanda bizə verilən kompensasiya niyə artmır? Buna görə də mən şəxsən o pula yaxın durmuram, heç yerə də getmirəm”.

Müəllif vurğulayır ki, indiki şəraitdə məhəllə sakinlərinin bəziləri ölkədəki,  o cümlədən daşınmaz əmlak bazarındakı bahalığı nəzərə alaraq sökülən evin hər kvadratmetrinə 2000 manat kompensiya verilməli olduğnu deyir və bunu ədalətli kompensasiya adlandırırlar.

Digər tərəfdən, sakinlər söküntü işlərinin aparılması üçün polislərin əraziyə cəlb olunmasını da doğru saymırlar: “Söküntüyə 20-30 polislə gəlirlər. "Sovetski"də terrorçu var? Nədən qorxurlar? Əgər camaatı razı salırsansa, deməli, qorxacağın da olmamalıdır".