Media-icmal 07.05.19

Sosial problemlərin həlli, paytaxtda yaşıllıqların məhv edilməsi, vəkildən həmkarlarına birlik təklifi, məcburi köçkünlər arasında 655 ailənin bu statusda olmamasının aşkarlanması və s. məsələlər bugünki (07 may, 2019-cu il) medianın aparıcı mövzularındandır....

Sosial problemlərin kompleks həlli

"Azərbaycan" qəzeti "Ölkəmizdə sosial problemlərin həllinə kompleks yanaşılır" sərlövhəli məqalədə sosial problemlərin həllini dəyərləndirir.

Müəllif deyir ki, vətəndaşın sosial müdafiəsi dövlətin əsas prioritetlərindən biridir, dövlət başçısı siyasətin mərkəzində Azərbaycan vətəndaşının dayandığını bəyan edir və bu sahədəki statistik rəqəmələri diqqətə çatdırır: "Təkcə son 15 il üzrə bu sahədəki faktlara nəzər salaq: maaşlar 7, pensiyalar 9, minimum əməkhaqqı 6,5 dəfə artıb. Prezidentin imzaladığı sərəncam və fərmanlar sayəsində minimum əməkhaqqı və minimum pensiyalar təxminən 40, məcburi köçkünlərə verilən müavinət 50 faiz, sosial müavinətlər orta hesabla 2 dəfə, eləcə də tələbələrin təqaüdü, şəhid ailələrinə, Qarabağ müharibəsi əlillərinə verilən müavinətlər nəzərəçarpacaq səviyyədə artmışdır".

Müəllifə görə, iş yerlərinin açılması davamalı prosesə dönüb, son 15 ildə 2 milyon iş yeri açılıb, amma əhali artımı da yaxşıdır, odur ki, artan iş tələbatını ödəmək üçün müxtəlif proqramlar hazırlanır.

Yazi müəllifi deyir ki, yaxın gələcəkdə 40 min ödənişli ictimai iş yerinin yaradılması, özəl sektorun 8 min iş yeri yaratması gözlənilir.

Müəllifin fikrincə, vətəndaşlara daha bir qayğı Mənzil İnşaatı Dövlət Agentliyinin xətti ilə sosial evlərin tikilməsidir, belə ki, sosial evlərin tikintisi təkcə ehtiyacı olanların mənzillə təmin edilməsi deyil, bu proqram həm də minlərlə yeni iş yerinin açılması deməkdir.

Müəllif hesab edir ki, əhalinin məşğulluğunun təminatı ilə bağlı həyata keçirilən daha bir layihə özünüməşğulluq proqramıdır və bu haqda dövlət başçısı İlham Əliyev deyib: "İş yerlərinin yaradılması üçün, əlbəttə ki, vacib amillərdən, vasitələrdən biri özünüməşğulluq proqramıdır. Biz buna da başlamışıq. Bu proqram çox böyük rəğbət qazanıb. Biz hər il özünüməşğulluq proqramı çərçivəsində təqribən 7 minə yaxın insanı işə cəlb etmək fikrindəyik. Ancaq yerlərdən gələn sifarişlər qat-qat çoxdur. Biz bunu nəzərə almalıyıq və öz planımıza düzəliş etməliyik", deyə dövlət baçısı proqrama tələbatın artdığını vurğulayır.

Müəllif həmçinin Prezidentin bu il Ağsu, İsmayıllı və Şamaxı rayonlarında baş vermiş zəlzələ zamanı göstərdiyi diqqət və qayğını hər bir məmur üçün örnək adlandırır: "Məlum olduğu kimi, dövlət başçısı zəlzələdən ziyan çəkən vətəndaşlarla görüşərək onların qayğıları ilə maraqlanıb, aidiyyəti dövlət qurumlarına tapşırıqlarını verib, işlərin sürətlə aparılması üçün vəsait ayırmış və həmin işlərin icrasını şəxsi nəzarətinə götürmüşdür", deyə müəllif görülən işin çoxtərəfliliyini nəzərə çatdırır.

Buna da prezident müdaxiləsi lazımdır?...

"Yeni Sabah.az"da isə "Ağacları qorumağa da prezident müdaxilə etməlidir?" sərlövəhli yazı oxumaq olar.

Sayt paytaxt Bakıda yaşıllıqların qırılması ilə bağlı "Multimedia Mərkəzi"nin rəhbəri Osman Gündüzün fikirlərinə yer verib: "Xəbər lentinə baxıram, sanki küçə döyüşlərinə hazırlıq gedir. Anlamıram, nə baş verir", O.Gündüz son günlər paytaxtda yaşıllıqların kütləvi şəkildə dağıdılmasına belə münasibət bildirir.

O.Gündüz bu özbaşınalıqların narahatlıq doğurduğunu vurğulayır: "Bir dəstə insan Xətaidə gecə ağacların kəsilməsinin qarşısını almaq üçün az qalıb barrikada qursunlar. Bir dəstə adam 28 May tərəfdə qədim binanın sökülməsinin qarşısını almağa çalışır. Bir neçə gün öncə də, yalnız birinci vitse-prezident İçərişəhər Qala Divarlarına baş çəkəndən sonra qanunsuzluq edənlər oradan çəkilib gediblər.

Nə baş verir? Vətəndaşlar nə üçün gecə keşik çəkməlidirlər? Bunun adı ictimai nəzarət deyil. Bu, fərqli bir şeydir. Hardadır səlahiyyətli qurumlar? Nə üçün öz səlahiyyətlərini yerinə yetirmirlər? Ağacları qorumağa da prezident və ya birinci vitse-prezidentmi müdaxilə etməlidir?" - deyə O.Gündüz bildirir.

O.Gündüz bir dövlət qurumunun digər səlahiyyətli qurumun qərarını icra etməməsini dövlət intizamsızlığı, məsuliyyətsizlik və sayğısızlıq, harınlıq kimi dəyərləndirir.

O.Gündüzə görə, hər yerdə kameraların olduğu bir zamanda, texnologiyanın bu qədər inşkişaf etdiyi bir zamanda, bu qədər səlahiyyətli qurumalrın olduğu bir zamanda qanun pozuntularını aşkar etmək bu qədər çətin olmamalıdır.

"Biz hökumətdən ciddi səylər gözləyirik. Prezident Administrasiyası baş verən qanunsuzluqların qarşısını almaq, səlahiyyətli dövlət qurumlarının qərarlarının icrasını təmin etmək üçün, dövlət nəzarətini gücləndirmək üçün təsirli tədbirlər görməlidir", deyə O.Gündüz dövlət qurumlarını fəal hərəkətə çağırır.

Xatırladaq ki, bu günlərdə Bakının Xətai rayonundakı Məhəmməd Hadi küçəsində 100-ə qədər ağac, kolluqlar və s. yaşıllıqlar qırılıb.

Tanınmış vəkildən həmkarlarına təklif

"Azadlıqinfo"da isə "Vəkil vəkili müdafiə etməyə çağırır" sərlövhəli məqalə diqqət cəlb edir.

Sayt ölkənin məhkəmə-hüquq sahəsində tanınmış bir sıra vəkillərə qarşı ayrı-ayrı dövlət idarələrinin Vəkillər Kollegiyasına (VK) müraciətləri və bu müraciətlər əsasında məhkəmələrə verilən təkliflər əsasında çıxarılan qərarlar barədə vəkil Adil İsmayılovun dəyərləndirməsinə yer verib.

A.İsmayilov son illər öz müstəqil mövqeyilə tanınan vəkillərə qarşı çıxarılan məhkəmə qərarlarına birmənalı mənfi münasibət ifadə edir və vəkil Yalçın İmanova münasibətdə belə qəararların uzağa gedən nəticələrindən danışır: "2017-ci ildə Penitensiar Xidmətin şikayəti əsasında Yalçın İmanov vəkillikdən uzaqlaşdırıldı. De yure vəkil statusu saxlanılsa da, de fakto artıq iki ildir ki, vəkillik edə bilmir. Bəziləri deyir ki, VK vəkillikdən çıxartmır, sadəcə təklif verir, vəkillikdən məhkəmə çıxarır. İki ildir Yalçının işi məhkəmələrdədir, belə getsə, bir iki il də məhkəmə bitməyəcək. Heç kim də narahat olmayacaq ki, bu illər adamın ömründən, kisəsindən gedir, özü də təkcə onun kisəsindən yox, bu illər ərzində adam neçə-neçə günahsız insana vəkillik edə, kömək göstərə bilərdi..."

A.İsmayilov deyir ki, vəkillərə qarşı "ölçü götürmək" prosesi başa çatmayıb, hələ də davam etməkdədir: "İndi VK və onun rəhbərliyi eyni situasiya ilə üz-üzədir. Bu dəfə PX-nın hədəfində digər hörmət etdiyim vəkil Fariz Namazlıdır.

Eşitdiyimə görə, bir-iki ay olar ki, Fariz Namazlı PX-nın qara siyahısına salınıb.

Vəkillik fəaliyyətinə qadağa qoyulmasa da, onun türmələrə girişinə qadağa qoyulub. Yəqin, Y.İmanovun işindən sonra PX əmindir ki, VK bu dəfə də onun sözünü yerə salmayacaq".

Vəkil bildirir ki, F.Namazlı barəsində intizam işi başlanılması onun vəkillikdən uzaqlaşdırılması prosesinin başlaması deməkdir və həmkarlarına F.Namazlını müdafiə müraciəti edir: "Dostlar, sonralar müdafiəsiz qalmaq istəmiriksə, gəlin, nə qədər gec deyil, Farizi müdafiə edək. Mənə münasibətdə göstərdiyiniz ilginin iki qatını Farizə göstərin, ona mənə olduğunuzdan iki qat artıq dayaq olun", A.İsmaylov həmkarlarına belə müraciət ünvanlayır.

Vəkil Vəkillər Kollegiyası üzvlərinə müraciət edərək, vəkillər daxilində umu-küsüləri unutmağa, vahid vəkil ailəsi kimi birləşərək F.Namazlıya qarşı olan haqsızlığa cəsarət göstərməyi təklif edir: "Həmkarınıza dayaq olun, inanın, özü deməsə də, buna ehtiyacı var. Haqqın yanında olun ki, haq da sizin yanınızda olsun",

deyə vəkilləri birlik nümayiş etdirməyə çağırır.

Məcburi köçkün olmayan 655 ailə aşkar edilib

"Modern.az"da isə köçkün yataqxanaları və qəzalı binalarda statusu olmayan 655 ailə aşkarlanıb" sərlövhəli məqalə diqqət çəkir.

Müəllif deyir ki, bu günlərdə Qaçqınların və Məcburi Köçkünlərin İşləri üzrə Dövlət Komitəsinin kollegiya iclası keçirilib, iclasda deyilib ki, Bakı, Sumqayıt şəhərlərində və eləcə də Abşeron ərazisindəki qəzalı obyektlərdə 8.485 köçkün ailəsinin məskunlaşdığı müəyyən edilib.

Müəllifin sözlərinə görə, 2019-cu il yanvarın 1-inə Bakı və Sumqayıt şəhərlərində, Abşeron rayon ərazisində qəzalı və yaşayış üçün təhlükəli vəziyyətdəki obyektlərdə 8.485 məcburi köçkün ailəsinin müvəqqəti məskunlaşdığı qeydə alınıb.

Yazı müəllifi deyir ki, müvəqqəti məskunlaşma obyektlərində məcburi köçkün statusu olmayan şəxslərin və ailələrin yaşaması faktları da aşkar edilir ki, bu da köçürülmə prosesində ciddi problemlərin yaranmasına gətirib çıxarır.

"Belə bir fakt diqqətə çatdırılıb ki, təkcə Abşeron rayonunda 1, Sumqayıtda 2,

Bakıda 18 qəzalı vəziyyətdə olan yataqxana və tədris korpusunda məcburi köçkün statusu olmayan 655 ailə və ya 2.032 nəfər məskunlaşıb. Bu da ümumilikdə həmin obyektlərdə məskunlaşanların 37 faizini təşkil edir".

Müəllif deyir ki, iclasda Dövlət Komitəsinin yerli sektor və nümayəndəliklərinə tapşırıldı ki, belə halların vaxtında aşkarlanması və təxirəsalınmaz tədbirlər görülməsi üçün komitəyə məlumat versinlər və yerli icra hakimiyyəti orqanları ilə birlikdə müvafiq tədbirlər görsünlər.

Məqalə müəllifi vurğulayır ki, məcburi köçkünlərin mənzil-məişət şəraitinin yaxşılaşdırılması üçün 2019-2020-ci illərdə həyata keçiriləcək layihələr barədə məlumat dinlənilib.

Qeyd edilib ki, MKSİF-in sifarişi əsasında, bu il Bakının Pirallahı rayonunda, Şirvan şəhərində, Kürdəmir, Ucar, Göygöl, Ağcabədi, Beyləqan, Füzuli rayonlarının ərazilərində üst-üstə 2314 məcburi köçkün ailəsinə fərdi evlər tikilib istifadəyə veriləcəkdir.

"Növbəti ildə isə belə layihələr Sumqayıt və Gəncə şəhərlərində, Ağcabədi, Şəmkir, Samux, Goranboy rayonlarında icra ediləcəkdir.

Müəllifə görə, kollegiyada məcburi köçkünlərin qeydiyyatının vahid elektron bazasının yaradılması işlərinin yaxın müddətdə tam başa çatdırılması, bu kateqoriyadan olan vətəndaşların məşğulluğunun artırılması barədə Dövlət Komitəsinin müvafiq strukturlarına tapşırıqlar verilib.