Media-icmal 07.12.20

Azərbaycanın media resursları ölkə həyatının bütün məsələlərini və o cümlədən aktual mövzularını işıqlandırır, onlar barəsində ekspertlərin şərhlərinə və mülahizələrinə yer verirlər.

Bu mənada "Azərbaycan" qəzeti "Milli qürurumuzun təntənəsinə çevrilən Qələbə" sərlövhəli məqalədə İkinci Qarabağ müharibəsində qazanılan qələbəni (27 sentyabr-10 noyabr) dəyərləndirir.

Müəllifə görə, Azərbaycanın torpaqlarını müharibə yolu ilə işğaldan azad etməsi nəinki regionda, bütün dünyada diqqətlə izlənən hadisə olub, çünki bu qələbə ilk növbədə bir dövlətin uzun illər məruz qaldığı işğala təkbaşına son qoymasının ən mükəmməl nümunəsidir.

Eyni zamanda deyilir ki, Azərbaycan müharibəni heç vaxt istisna etmirdi, işğalda olan ərazilərin müharibə yolu ilə azad ediləcəyi gözardı edilmirdi, 30 ilə yaxın davam edən danışıqlar nəticə vermədiyi üçün müharibə qaçılmaz oldu.

Məqalədə vurğulanır ki, sadəcə zamana ehtiyac var idi, ötən hər bir il Azərbaycan gücləndi, Dağlıq Qarabağ probleminin həlli ilə bağlı beynəlxalq hüquqla təsbit olunan haqlı mövqelərini daha da möhkəmləndirdi: "Bu mənada Azərbaycan düşmənə zərbəni öz məqamında və zamanında vurdu", deyə qeyd edilir.

İndi reallıq budur ki, kapitulyasiya aktı bu reallığın hüquqi təsbitidir, bu reallığın ən mühüm tərəfi odur ki, 44 günlük müharibənin nəticəsi olaraq Azərbaycanın ərazi bütövlüyü təmin edildi.

Xalq bu müharibədə həlak olan şəhidlərə öz qəlbində əbədi heykəl ucaldıb, o cümlədən bu müharibənin qurbanları olan mülki vətəndaşların əziz xatirəsi heç vaxt unudulmayacaq. 8 noyabr isə Azərbaycanda Zəfər Günü təsis edilib.

"Redaktor.az" saytında "Bizim olan ərazilər son nöqtəsinə qədər qaytarılacaq" sərlövhəli məqalədə isə Kəlbəcər rayonundakı Söyüdlü-Zod yatağının Azərbaycana mənsubluğu məsələsi şərh edilir.

Müzakirəyə səbəb isə budur ki, bu il noyabrın 25-də Kəlbəcər 27 illik işğaldan azad edilib. Bu rayonun ərazisində olan adı çəkilən qızıl yatağının yarısının Ermənistana məsxsus olması ilə bağlı yazılar yayılıb.

Mövzu ilə bağlı şərhçilər bildirirlər ki, Söyüdlü-Zod qızıl yatağının ancaq 24%-i Ermənistanın nəzarətindədir, qalan 76% Azərbaycana aiddir.  

Habelə qeyd edilir ki, qaytarılan ərazilərə heç bir halda Ermənistan tərəf nəzarət edə bilməz, etmir və bu iddia yalandır.

Yazıda vurğulanır ki, sovet dövrünün xəritələrində də Söyüdlü-Zod yatağının 74 faizinin Azərbaycanın sərhədləri daxilinə düşdüyü təsdiqlənir. 

Eyni zamanda, vurğulanır ki, Ermənistan Azərbaycan torpaqlarını işğal edəndən sonra dövlət sərhədini bir çox istiqamətdə irəli çəkib, bunda məqsəd bəzi Azərbaycan ərazilərinin Ermənistanda qalması cəhdidir.

"... Onlar 28 illik işğal müddətində sərhədləri irəli çəkərək, Azərbaycan torpaqlarını qanunsuz zəbt edib. Amma bu, ermənilərin düşündüyü kimi asan məsələ deyil. Hər bir kəndin, ərazinin öz pasportu, hansı ölkəyə aid olması ilə bağlı sənədi var. Onlar məğlub tərəf kimi qeyd-şərtsiz bizə məxsus olan bütün əraziləri boşaltmalıdır. Bunu xoşluqla etməsələr, güc tətbiq ediləcək.

"Azpolitika.info" saytında isə "PUA-lar qüvvələr nisbətini dəyişir – Azərbaycan dronlardan bacarıqla istifadə etdi" sərlövhəli məqalədə müasir müharibələrdə Pilotsuz Uçuş Aparatlarından (PUA) istifadənin ön plana çıxması şərh edilir.   

Məqalədə deyilir ki, 44 günlük İkinci Qarabağ müharibəsində Azərbaycanın PUA-lardan istifadə etməsi fenomenə çevrilib və bu fakt dünya hərb tarixində xüsusi yer tutacaq.

Eyni zamada deyilir ki, məhz bu baxımdan Qarabağ müharibəsi dünya mətbuatı və hərbi ekspertlərin diqqət mərkəzindədir. Ekspertlər hesab edirlər ki, müasir müharibələrdə PUA-lar əhəmiyyətli rola malikdirlər, peşəkarlar isə pult arxasında dronların idarə olunmasının öhdəsindən daha yaxşı gəlirlər.

Müəllif əlavə edir ki, Azərbaycanın hərbi arsenalında bir sıra ölkələrin PUA-ları vardır. Hərbi ekspertlər vurğulayılrar ki, PUA-lar kiçik ölkələrin döyüş potensialını artırmaq gücündədir.

Ekspertlər Rusiyanın əsas ixrac silahı olan zenit-raket kompleksləri PUA-lar tərəfindən vurulub sıradan çıxarıla bildiyi üçün onlara inam güclü şəkildə azalıb. Ekspertlər bu düşüncədədirlər ki, PUA-ların geniş yayılmasından narahat olan təkcə Rusiya deyil, xaricdə əməliyyatlar aparan istənilən ölkə və ya hərbi blok bu təhlükəli fenomenlə qarşılaşacaqlar.

"Müsavat.com" saytı isə "İrəvanda yeni müharibə çağırışları: tarixdən dərs götürməyənlər onu təzədən yaşamalı olacaqlar" sərlövhəli məqalədə mütəxəssislər Ermənistanda yeni müharibə çağırışlarını şərh edirlər.

Ekspertlərə görə, Ermənistanda durum qeyri-müəyyən olaraq qalır, bir tərəfdən İkinci Qarabağ müharibəsində ağır məğlubiyyətə görə, vətəndaşlar və bəzi siyasi qüvvələr baş nazir Nikol Paşinyanın istefasını tələb edirlər, digər tərəfdən isə Azərbaycana qaşrı yeni müharibə çağırışları eşidilir.

Ekspertlər Ermənistanın yeni xarici işlər naziri Ara Ayvazyanın vəzifəyə keçən kimi Azərbaycana konfliktin "ədalətli həlli" üçün Qarabağ ermənilərinin öz müqəddəratını təyin etmə haqqının tanınması, Azərbaycan qoşunlarının 27 sentyabradək olan vəziyyətə qayıtması kimi şərtlər irəli sürməsini yada salırlar.

Mütəxəssislər deyirlər ki, erməni tərəf bu il noyabrın 10-da Azərbaycan önündə atəşkəs bəyanatı imzalanmasını, faktiki kapitulyasiyanı qəbul etmirlər. Ekspertlər şərh edirlər ki, Ermənistan müharibədən dərs götürmədi, ona görə də Ermənistana gələn həftə Bakıda keçiriləcək hərbi paradı diqqətlə izləməyi təklif edirlər.

"Trend.az" saytında "Qarabağ regional əhəmiyyətli ekoturizm mərkəzinə çevriləcək - Dağlıq Qarabağ böyük turizm potensialına malikdir" sərlövhəli məqalədə mütəxəssislər Qarabağın iqtisadi inkişafına səbəb olacaq fəaliyyət sahələri barədə müzakirə aparırlar.

Mütəxəssislərə görə, Qarabağ regional əhəmiyyətli, daha sonra dünya əhəmiyyətli ekoturizm mərkəzinə çevrilə bilər və bu, mümkündür.

Onlara görə azad edilmiş ərazilərdə itirilmiş kommunikasiya infrastrukturunun bərpasından sonra biznes, turizimin inkişafı üçün əlverişli mühitin yaradılmasının planlaşdırıldığını bəyan edir, bu ərazidə ekoturizm fəaliyyətinin yüksək sürətlə inkişaf edəcəyini birmənalı bildirirlər. Ekspertlər bəyan edirlər ki, ekoturizm bu ərazilərin gələcəyidir, burada təbii ehtiyatlar çoxdur, turizmin müxtəlif sahələri inkişaf edə bilər.