Media-icmal 09.03.21

Qarabağ məsələsində Azərbaycanın maraqlarının təmin olunması, COVİD-19 pandemiyası ilə bağlı vəziyyət, ölkənin minik avtomobili bazarındakı durum və s. məsələlər medianın aparıcı mövzuları sırasındadır.

“Yenisabah.az” saytı “Ən böyük təhlükə Laçın dəhlizindədir… - Ermənistan silahlı qüvvələrinin oyunu” sərlövhəli məqalədə

Qarabağ bölgəsindəki vəziyyəti deputat Vahid Əhmədovla dəyərləndirir.

V.Əhmədov Azərbaycanın mütləq qələbə qazandığını, ərazi bütövlüyünün təmin edildiyini bildirib. Bəzi politoloqların Rusiya sülhməramlılarının bölgədə qalma müddətinə dair fikirlərinə cavab olaraq bu prosesin uzun çəkməyəcəyini, sülhməramlıların bölgədən gedəcəklərini bildirir.

V.Əhmədova görə, hazırda Azərbaycan hökumətinin qarşısında bir məsələ var: “Ermənistanın Azərbaycanın ərazi bütövlüyünü tanımasına çalışmaq lazımdır. Bu məsələ həll olunana qədər Ermənistanla hər hansı iqtisadi əlaqələr qurulmamalıdır”, deyə deputat bildirir.

V.Əhmədov deyir ki, hazırda Azərbaycanın qarşısında işğaldan azad etdiyimiz əraziləri bərpa etmək kimi ilkin vəzifə durur.

Deputat əlavə edir ki, Azərbaycan-Türkiyə-Pakistan hərbi əməkdaşlığı daha da möhkəmləndirilməlidir: “Bu dövlətlərlə əməkdaşlığın dərinləşməsi müstəqilliyimizin qarantıdır”, deyə deputat bu fikrinin səbəbini izah edir.

Təhlükəsizlik məsələləri üzrə ekspert İlham İsmayıl isə hesab edir ki, Azərbaycan İkinci Qarabağ müharibəsində qələbə qazansa da, hələlik tam qələbə təmin olunmayıb. 

İ.İsmayıla görə, Azərbaycan Qarabağda müəyyən bölgəyə nəzarət etmədiyi, bu ərazilərdə Rusiya sülhməramlıları qaldığı üçün tam qələbədən danışmaq tezdir.

O vurğulayır ki, Ermənistan silahlı qüvvələrinin ərazidən çıxarılmaması, azərbaycanlıların BMT nəzarətilə Qarabağa qaytarılmaması, bölgənin daxili yollarının təhlükəsiz və işlək durumda olmaması xüsusi gərginlik yaradır.

Ekspertə görə, ən böyük təhlükə Azərbaycanın Laçın dəhlizinə nəzarət edə bilməməsidir, bu dəhliz vasitəsilə kimlərsə Azərbaycan ərazilərinə qanunsuz daxil olur.

“Müsavat.com” saytında “Koronavirusa yoluxanlar çoxalır - Qapanma ilə bağlı vacib açıqlama” sərlövhəli məqalədə  müəllif Azərbaycanda COVİD-19 pandemiyası ilə bağlı vəziyyəti sahə mütəxəssislərilə dəyərləndirir.

Müəllif deyir ki, son günlər koronavirus infeksiyasına  yoluxanların sayı yenidən artıb, bəzi ekspertlərə görə, belə davam edərsə, karantin qaydalarının sərtləşdirilməsi yenidən qaçılmaz olacaq.

Mütəxəssislərin bəziləri deyirlər ki, hazırda ölkədə epidemioloji vəziyyət narahatlıq doğuracaq səviyyədə deyil, amma digər tərəfdən yoluxmalar da artır, odur ki, mərhələli şəkildə qapanmalar ola bilər. Onların fikrincə, son günlər müşahidə edilən yoluxma sayı stabil qalsa, yenidən tam qapanmaya ehtiyac qalmayacaq.

Bəzi mütəxəssislər isə nisbi artımı böyük rəqəm kimi ifadə etməyi doğru saymırlar, bunu insanlarda yaranan müəyyən arxayınlığın nəticəsi sayırlar.

Sahə mütəxəssisləri bunu da əlavə edirlər ki, Azərbaycanda hələ ki, bu virusun yeni ştamları aşkarlanmayıb. Odur ki, mütəxəssislər xəstəlik sayının artmasını böyütməməyi tövsiyə edirlər.

Mütəxəssislərə görə, qapanmanın olub-olmaması daha çox əhalinin qoyulan tələblərə necə riayət etməsindən asılı olacaqdır.

“Sfera.az” saytı “Azərbaycanda bu avtomobillər bahalaşacaq” sərlövhəli məqalədə ölkənin maşın bazarını dəyərləndirir.

Müəllif aidiyyatı qurumlara istinadən ölkənin avtomobil parkının yenilənməsi layihələri həyata keçirildiyini bildirir.

Bu layihələr ölkəyə gətiriləcək yeni nəqliyyat vasitələrinin gömrük rüsumlarının aşağı salınması və ya alternativ nəqliyyat vasitələrinin idxalına üstünlük verilməsi ilə bağlıdır.

Burada istehsalı 5 ildən yuxarı olan nəqliyyat vasitələrinin ölkəyə gətirilməməsi və ya gətirilərsə belə, onlara olan vergi rüsumlarının artırılmasından söhbət gedir.

Müəllifə görə, istehsal tarixindən 5 ildən çox keçən avtomobillərin idxalı qadağan edilərsə və ya onların idxalına tətbiq edilən rüsum və vergilər kəskin şəkildə artırılarsa, Azərbaycanda olan köhnə avtomobillərin dəyərində 15-20 faiz artım baş verəcək. Səbəb də budur ki, avtomobil sahibi olmaq istəyənlərin imkanları orta hesabla 18-20 min manatlıq avtomobillərin alınmasına çatır.

Müəllifə görə, bu imkanla ancaq 2005-2012-ci ilə qədər olan avtomobilləri idxal etmək mümkündür. İstehsal tarixi 5 il və daha yeni olan, orta keyfiyyətli avtomobilləri idxal etmək üçün ən azı 30 min manat tələb olunur.

Daxili bazarda olan minik avtomobillərinin təxminən 80 faizinin istehsal tarixi 10 ildən artıqdır, 2014-cü ildə bu göstərici 62 faiz idi, altı il ərzində onların xüsusi çəkisi 18 faiz bəndi artıb. Belə davam edərsə, 2025-ci ildə istehsalından 10 il keçən avtomobillərin payı 90 faizə çatacaq.