Media-icmal 09.07. 2016

İlham Əliyevin NATO missiyası

 “Azərbaycan” qəzeti indiki beynəlxalq münasibətlər sistemində Azərbaycanın və onun prezidentinin rolu və yeri barədə bir qədər də maksimalist təsir bağışlayan “İlham Əliyevin NATO missiyası” sərlövhəli məqalə ilə çıxış edir. 

(http://www.azerbaijan-news.az/index.php?mod=3&id=100734)

Müəllifin düşüncəsinə görə,  NATO çəriçivəsində İlham Əliyevin öz missiyası var: “Azərbaycan Prezidentinin fəaliyyəti fövqəlgüclər arasında “soyuq müharibə”nin bitməsinə, qlobal hərbi gərginliyin aradan qalxmasına və qarşılıqlı etimadın yaranmasına yönəlib”.

Daha sonra müəllif SSRİ-ABŞ qarşıdurması, SSRİ-nin çökməsinə toxunur, nəhayət 1992-ci ildən başlayan Azərbaycan NATO əməkdaşlığı barədə danışır. Azərbaycanın NATO-nun müxtəlif əməliyyatlarında iştirakını müəllif Azərbaycan dövləti və liderinin əsas göstəricisi olan etibarlılıq, sözünə sahib çıxmaq kimi dəyərlərin NATO ilə münasibətlərdə də istisnasız tətbiq olunması adlandırır. Onun fikrincə, elə buna görə də İ.Əliyev NATO tədbirlərində arzuolunan qonaq, xüsusi hörmətlə qarşılanan tərəfdaşdır və qurumun Azərbaycanın ərazi bütövlüyünü dəstəkləməsi bu əməkdaşlığın nəticəsidir.

Müəllif bu kontekstdə NATO ilə Rusiya arasında yaşanan bu gərginliyi “soyuq müaribə”nin davam etməsi kimi dəyərləndirir. Müəllifə görə, belə durumda Azərbaycan kənarda qalmır, əksnə, gərginliyi aradan qaldırmaq üçün çalışır:

“Türkiyə-Rusiya münasibətlərinin tənzimlənməsində əsas rol alan ölkə kimi Azərbaycan öz uğurlu təcrübəsindən yararlanaraq NATO-Rusiya qarşıdurmasının  da itkisiz yekunlaşmasına çalışır. Çünki hər iki tərəf ölkəmizin strateji müttəfiqidir.

Azərbaycan Prezidentinin bu yönümdə fəaliyyəti fövqəlgüclər arasında “soyuq müharibə”nin bitməsinə, qlobal hərbi gərginliyin aradan qalxmasına və qarşılıqlı etimadın yaranmasına yönəlib. Prezident İlham Əliyevin “NATO missiyası”nın mövcud əsas istiqaməti də məhz budur...”

Problemli kreditlərin həcmi artır 

“Azadlıq” qəzeti ölkə banklarına kredit qoyuluşlarının azalmasını “Azərbaycan banklarının kredit qoyuluşları son 18 ayın ən aşağı  səviyyəsinə enib” (http://www.azadliq.info/145445.html) sərlövhəli məqalədə araşdırır.

Məqalədə 2016-cı ilin iyun ayına kreditlərin qoyuluşunun 17 milyard 648 milyon manat təşkil etdiyi, bu rəqəmin may ayı ilə müqayisədə 561 milyon manat və ya 3,1% az demək olduğu vurğulanır. Məqaləyə görə, bu ilin yanvarına kredit qoyuluşları 21 milyard manat olub, bu hesabla ötən 5 ayda kredit qoyuluşları 3 milyard yarımdan çox və ya 17%-ə qədər azalıb.

Məqalədə deyilir ki, dollarda olan kreditlər yeni məzənnə ilə hesablandığından kredit qoyuluşunda artım yaranmışdı. Əgər devalvasiylar nəticəsində baş verən artımlar nəzərə alınmazsa, kredit qoyuluşları 13 milyard səviyyəsində olar.

Məqalədə deyilir ki, kredit portfelinin azalması problemli kreditlərin həcmini azaltmayıb. May ayında problemli kreditlərin həcminin 132 milyon artaraq iyunun 1-nə 1 milyard 514 milyon manata çatdığı və bunun qeydə alınan yüksək göstərici  olduğu vurğulanır.

Məqaləyə görə, problemli kreditlərin ümumi kredit portfelindəki payı da kəskin artıb. Belə ki, hazırda bu kateqoriya kreditlərin xüsusi çəkisi 8,3%-ə çatıb.

Turizm, amma kimin üçün?...

“Novoye Vremya” qəzeti ““Kübar turizm” Azərbaycanda”  (http://www.novoye-vremya.com/w62435/.../#.V4AFzxHr34g) məqaləsində ölkədə turizmlə bağlı infrastukturun durumunu dəyərləndirir.

Müəllif öncə bunu qeyd edir ki, ölkə iqtisadiyyatında  durum ağırlaşdıqca turizmin inkişafı  haqda daha çox danışırlar. Məqalədə qeyd edilir ki, bütün bunlara baxmayaraq, turizm inkişaf etmir: “Turizm adına keçən il Azərbaycanın uğuru o olub ki, Novruz bayramı tətillərində ölkəyə İrandan 45 min nəfərə yaxın turist gəlib və bu turistlərin toplam xərclədikləri  vəsait üst-üstə 30-35 milyon dollar arasında olub”.

Məqalədə turizmin inkişafına əsas səbəb kimi obyektiv zərurətin və infrastrukturun olması göstərilir. Turizm sahəsində Azərbaycanın Dubay və İstanbul yolunu özünəməxsus  şəkildə getdiyini deyən müəllif  bunu vurğulayır ki, Dubay, İstanbul varsa, Bakıya gəlməyə zərurət yoxdur.  Müəllifə görə, infrastruktura gəlincə, burada da “axsama” var. 2015-ci ildə 1200 nömrə istifadəyə verilib, 2016-cı ildə cəmi 148 nömrə istismara veriləcək. Bununla da Azərbaycan siyahıda sonuncu sırada olacaq və bütün MDB ölkələrindən geri qalacaq.

Ölkədə hotellərin daha çox 5 və daha yuxarı ulduzlu olmasını müəllif “bahalı”turizmin Azərbaycana ayaq açması adlandırır. Həm də xatırladır ki, bu kateqoriya ABŞ, Avropa, Dubayda istirahətə üstünlük verir, Xəzərdən ötrü, yəqin ki, buraya gələn olmayacaq. Müəllif bütün bu tətillərdən sonra ölkənin tuzim sahəsindəki durumunu belə dəyərləndirir: “Beləliklə, belə bir nəticəyə gəlmək olar ki, ölkədə turizmin inkişafı, onun bütün ölkəyə yayılması barədəki bəyanatların bir əsası yoxdur. İndki halda söhbət 15 inkişaf ilindən gedir. 15 ilə ölkəni turizm mərkəzinə çevirmək olardımı? Əlbəttə mümkün idi, amma ölkə bu müddəti varlılar üçün infrastruktur yaratmağa həsr etdi ki, onlar ümumiyyətlə buraya gəlməyəcəklər”.