Media-icmal 09.09.20

Ölkənin eneri daşıyıcılarından gəlirləri, rayonların birləşdirilə bilməsi ehtimalları, bəzi dövlət qurumlarındakı vəziyyətə baxış və s. məsələlər medianın aparıcı mövzuları sırasındaır.

Sabit hasilat, sanballı gəlir

“Azərbaycan”  qəzeti  “Hasilat ahəngdar, gəlirlər sanballıdır” sərlövhəli məqalədə “Azəri-Çıraq-Günəşli” (AÇG) yataqlarından 2020-ci lin 8 ayı (yanvar-sentabrın 1-i) ərzində əldə edilən gəlirləri dəyərləndirir.

Müəllif deyir ki, 2020-ci il yanvarın 1-dən sentyabrın 1-dək “Azəri-Çıraq-Günəşli” (AÇG) yataqlarından Azərbaycan 2 milyard 657 milyon ABŞ dolları həcmində gəlir əldə edib.

Müəllif əlavə edir ki, bəhs edilən dövrdə “Şahdəniz” yatağı üzrə qaz və kondensat satışından gəlirlər 232 milyon dollar olub.

Müəllif Dövlət Neft Fonduna (ARDNF)  istinadən bəyan edir ki, bu ilin səkkiz ayı ərzində “Şahdəniz” kondensatının satışından 166 milyon dollar vəsait daxil olub.

Yazıda vurğulanır ki, Xəzərin Azərbaycan sektorundakı AÇG və “Şahdəniz” yataqları hazırda dünyada istismar olunan ən böyük və zəngin karbohidrogen yataqlarıdır. AÇG 26 ildir istismardadır və 23 ilə yaxındır ahəngdar şəkildə neft və səmt qazı verir.

Müəllifin deməsinə görə, indiyə kimi bu yataqda hasilat həcmi bu ilin yanvar ayında 500 milyon tona çatıb, Azərbaycana ümumilikdə 45 milyard kubmetrdən artıq səmt qazı təhvil verilib: “AÇG-də 8 platforma fəaliyyət göstərir. Bunlardan 6-ı hasilat, 2-i emal, qazın kompressiyası, suvurma və texnoloji təchizat qurğusudur. Hasilat “Çıraq”, "Mərkəzi Azəri”, Qərbi Azəri”, “Şərqi Azəri”, “Dərinsulu Günəşli” və “Qərbi Çıraq” platformalarından həyata keçirilir”.

“Şahdəniz” qaz-kondensat yatağından da hasilat ahəngdar davam edir. “Şahdəniz” qurğularının hasilat gücü gündə 56 milyon, ildə 20 milyard standart kubmetrdən çox mavi yanacaqdan ibarətdir.

Müəllifə görə, “Şahdəniz”in ümumi ehtiyatları 1,2 trilyon kubmetr qaz və 240 milyon ton kondensat həcmində dəyərləndirilir, Azərbaycanı dünyada qaz ixrac edən ölkə kimi məhz bu yataq tanıdıb.

“Sfera.az” saytı  “Kiçik rayonlar ləğv edilməlidir...” – Ekspert bunun müsbət tərəflərini açıqladı” sərlövhəli məqalədə müəllif bəhs olunan mövzu ilə bağlı deputat Vüqar Bayramovun fikirlərinə yer verib.

“Bu addım büdcə vəsaitlərinə qənaət etməyə, qərarların çevikliyinə və idarəetmənin səmərəliliyinin artırılmasına xidmət edəcək”, - deputat bildirib.

V.Bayramov bunu Gəncə şəhərində mövcud Kəpəz və Nizami rayonlarının ləğvi, vahid idarəetmədə birləşdirilməsinə dair təşəbbüslərlə bağlı bildirib.

Deputata görə, təcrübə göstərir ki, rayonlarda idarəetmə mexanizminin təkmilləşdirilməsi daha məqsədəuyğundur.

Onun fikrincə, kiçik ərazi və əhalisi olan rayonlar var ki,  bu, əslində əlavə idarəetmədir, xüsusən də bu addım iri şəhərlərdə idarəetmənin təmərküzləşməsi, bürokratiyanın azaldılması baxımından çox vacibdir. Gəncədə əlavə rayonlara ehtiyac yoxdur.

Deputat hesab edir ki, bu hal iş adamları, elə vətəndaşlar üçün də əlavə proseduralar, həm də büdcədən bu istiqamətə daha çox vəsait ayrılması deməkdir. “Düşünürəm ki, Gəncədə iki rayonun ləğvi büdcə vəsaitlərinə qənaət baxımından vacibdir, həm də bu addım qərarların çevikliyinə, idarəetmənin səmərəliliyinin artırılmasına xidmət edəcək. Nəticə etibarilə bu, həm də şəffaflığın güclənməsinə gətirib çıxaracaq”.

Deputatın  fikrincə, Gəncənin ardınca oxşar addımlar digər bölgələr üzrə də atılmalıdır.

Deputat əlavə edir ki, elə rayonlar var ki, əhalisi az, ərazisi isə kiçikdir.

Bölgələrdə digər rayon və şəhərlər üzrə də vahid idarətetmə formalaşması ilə bağlı qərarlar qəbul edilə bilər və buna ehtiyac var.

“Arqument.az”  saytı isə “Ola bilməz ki, müavin nədəsə iştirak etsin, nazirin xəbəri olmasın” sərlövhəli məqalədə müəllif dövlət idarəçiliyi barədə deputat Vahid Əhmədovla söhbətləşir. 

V.Əhmədov son bir ildə vəzifəli şəxslərin həbsilə bağlı deyir ki,  keçirilən  əməliyyat göstərir ki, tutulan şəxslərdən külli miqdarda vəsaitlər çıxır.

Onun fikrincə, bu insanlar bu qədər vəsaiti təmiz yolla qazana bilməzdilər,  “Burada rüşvət, korrupsiya var. Kifayət qədər də böyük vəsaitlərdən söhbət gedir. Regionlarda 11 iqtisadi rayon var. 11 ərazi vahidi yaratmaq lazım gəlir. Belə olanda müəyyən qədər aparatda islahatlar gedəcək, bürokratik aparatın, icra hakimiyyətlərinin sayı müəyyən qədər azaldılacaq”.

Rüşvət və korrupsiya faktı ilə bağlı idarəetmə orqanlarındakı həbslərə toxunan V.Əhmədov deyir ki, bu ola bilməz ki, hansısa müavin müəyyən proseslərdə iştirak etsin, amma nazirin və ya icra başçısının bundan xəbəri olmasın.

Onun fikrincə, bu, ola bilməz, mütləq var: “Çox istərdim ki, bu proses axıra qədər getsin. Birdəfəlik cəmiyyət təmizlənsin, qurumlar şəffaf işləməyə başlasın”.