Media-icmal 10.02.21

“Yenisabah.az”  saytı “Xankəndidə qarşıdurma: Rusların Azərbaycana qarşı şok planı” sərlövhəli məqalədə Rusiya sülhməramlılarının Qarabağda Azərbaycan əleyhinə oyun oynamasını şərh edir. 

Müəllifə görə, Dağlıq Qarabağ separatçılarının “Təhlükəsizlik Şurası”nın katibi vəzifəsinə qayıdan  Vitali Balasanyan və “sepratçıların rəhbəri” Araik Arutyunyan Rusiyaya “sədaqət testi”ndən keçirilirlər.

Müəllif hesab edir ki, bunun özü həm də rusların Qarabağda siyasi oyunlar oynamasının dəlilidir.

Müəllif deyir ki, bu adamlar “Hadrutu yenidən qaytaracağıq” və “Qarabağdakı ermənilərə rus pasportlarının verilməsi mümkündür” tezisilə Azərbaycana meydan oxumaq istəyirlər.

Eyni zamanda müəllifə görə, burada çoxətərəfli oyun gedir, belə ki, Qarabağda separatçılar, İrəvanda isə hakimiyyətlə müxalifət üz-üzə dayanıb.

Müəllifin fikrincə, burada Azərbaycana da toxunacaq məqam var. Bu da ondan ibarətdir ki, istər Qarabağa separatçıları, istərsə də rəsmi İrəvan hələ də Dağlıq Qarabağa starus veriləcəyi ümidindədir. 

Müəllif isə deyir ki, Bakının qəti mövqeyi, imzalanan sənədlər, türklərin gəlişi, hadisələrin inkişafı separatçıların bölgədən çıxacağı yönündədir.

Müəllif əlavə edir ki, ermənilər Hadruta qaytımağı məqsədə çeviriblər, amma bu, mümkün görünmür. Odur ki, onlar üçün ayrılan ərazilərdə “Yeni Hadrut” qəsəbəsi salınır, bu isə Hadruta iddiaların davam edəcəyi deməkdir.

“Sfera.az” saytı isə “Rüstəm Muradovdan izahat almalıyıq” - generalın son açıqlamasına sərt etiraz” sərlövhəli məqalədə müəllif Qarabağda sülhməramlıların bəzi açıqlamalarının səlahiyyət hədlərini aşması sayaraq bunu  ekspertlərlə müzakirə edir.

Müzakirəyə səbəb isə Qarabağdakı Rusiya sülhməramlılarının komandanı Rüstəm Muradovun Ermənistanın müdafiə nazirinə məktubunda Ermənistan və Rusiya vətəndaşlarının Bakının icazəsi olmadan Laçın dəhlizindən keçərək Ermənistandan Qarabağa sərbəst gedə biləcəklərilə bağlı ifadəsidir.

Politoloqlar  hesab edirlər ki, belə açıqlama ilə çıxış etmək sülhməramlı kontingentin rəhbərinin səlahiyyətində deyil. 

Ekspertlərə görə,  qondarma rejimin pasportunu heç kim tanımadığı üçün Qarabağ bölgəsində yaşayan ermənilər Ermənistan pasportu ilə hərəkət edirlər. “Amma regiona aydiyyatı olmayan ermənilərin Qarabağa gediş-gəlişi məhdudlaşmalıdır”.

Ekspertlər belə düşünürlər ki, Rusiya ilə Azərbaycan arasında çaşqınlıq yaranmaması üçün bu məsələlərlə bağlı da razılaşmalar əldə edilməlidir: "Hesab edirəm ki, məsələ diqqətdən kənar saxlanılmamalıdır. Sülhməramlıların rəhbəri dəvət olunmalı, ondan izahat alınmalı, danışıqlar aparılmalıdır. 

“Moderator.az”  saytı isə “Azəriqaz”ın sayğaclama əməliyyatı: Texnoloji mükəmməllik, yoxsa primitiv tələ?” sərlövhəli məqalədə son vaxtlar su və qaz sayğaclarının tez-tez dəyişdirilməsi gündəmin müzakirəsinə daşınır.

Müəllif deyir ki, son vaxtlar sayğacların dəyişdirilməsilə bağlı həm müsbət, həm də mənfi fikirlər dolaşır, əvvəlki vaxtlarla müqayisədə son vaxtlar qaz sərfiyyatının daha çox işlədilməsi barədə düşüncələr özünə yer alır.   

Müəllif deyir ki, abonentlərin qaz sərfiyyatına daha çox vəsait ödədiyi gerçəkdir, amma bunun səbəbi sayğacların qaz sərfiyyatını real olandan çox göstərməsi yox, daha çox qaz sərf olunmasındadır. Bunun səbəbi pandemiya ilə bağlı insanların evdə qalması, mənzillərdə və evlərdə işlədilən qaz sərfiyyatının artmasıdır: “Ötən dövrlə müqayisədə qaz sərfiyyatının artmasına təsir göstərən başlıca amil pandemiya ilə əlaqədar vətəndaşların evdə daha çox vaxt keçirməsi, bu səbəblə də daha çox qaz sərf etməsi ilə bağlıdır”, - müəllif bildirir.

Müəllif bunu da əlavə edir ki, vətəndaşlar sayğacların dəyişdirilməsindən qorxmamalıdır, çünki sayğaclar hökumət qurumlarının müəyyən etdiyi qaydalar əsasında dəyişdirilir.

“Redaktor.az”  saytı isə "Ərazilərin minalardan təmizlənməsi 50 il çəkə bilər" sərlövhəli məqalədə işğaldan azad olunmiş ərazilərin minalardan təmizlənməsi müddətinin nə qədər çəkə biləcəyi ekspertlərlə şərh edilir.

Müəllif yada salır ki, Dağlıq Qarabağ münaqişəsi zamanı hərbi əməliyyatların getdiyi ərazilərdə mina partlaması nəticəsində xeyli həlak olanlar və yaralananlar olub. Ermənilər onlara verilən vaxt ərzində torpaqları tərk edərkən ərazilərə mina və digər partlayıcı qurğular yerləşdiriblər. Ekspertlərə görə, işğaldan azad edilmiş ərazilərin minalardan təmizlənməsi prosesi 50 il çəkə bilər.

Ekspertlər deyirlər ki, işğaldan azad edilmiş ərazilərdə müxtəlif təyinatlı minalar var. Ağdam şəhərinin kiçik bir ərazisində 8000 mindən artıq mina və partlamamış qurğu aşkarlanıb. Bu səbəbdən tədbirlər yüksək səviyyədə həyata keçirilməlidir.