Media-icmal 10.04.21

COVİD-19 pandemiyasının başa çatması ehtimalları, sülhməramlıların komandanından Ermənistan rəhbərliyinə ittiham, xəlvəti toyların keçirilməsi mexanizmi, Qəbələdə koronavirusa yoluxma vəziyyəti və s. məsələlər medianın aparıcı mövzuları sırasındadır...

“Sfera.az” saytında  “Azərbaycanda pandemiyanın bitəcəyi tarix açıqlandı” sərlövhəli məqalədə ölkədə pandemiyanın nə zaman bitə biləcəyi ilə bağlı ehtimallar verilir.

Müəllifin sözlərinə görə, Azərbaycanda vaksinasiya sürətlə gedir, həm də tətbiq olunan vaksinlər hamısı beynəlxalq səviyyədə sınaqdan çıxmışdır.

Məqalədə vurğulanır ki, dünyada 400 milyon nəfərdən çox şəxs vaksinasiya edilib, heç bir ölüm halına rast gəlinməyib.

Müəllifin iddiasına görə, vaksinasiya 80%-ə çatdıqdan sonra yoluxma dayanacaq, vaksin olunmuş şəxslər virusa yoluxsa belə xəstəliyi yüngül keçirirlər.

Bununla belə, hətta vaksinlərin olmasına baxmayaraq, sosial məsafəyə, maska taxılmasına, gigiyenaya riayət edilməlidir.

Sahə mütəxəssislərinin fikrincə, payıza doğru vaksinasiyanın yekunlaşdırılacağı haqda məlumatlar var: “Vaksinasiyanı uyğun səviyyəyə çatdırandan sonra normallaşma başlayacaq və korornavirusla mübarizənin öhdəsindən gəlmiş olacağıq”, deyə müəllif bildirir.   

“Modern.az” saytı isə “Rüstəm Muradov Ermənistan hakimiyyətini ittiham etdi: Çirkin təxribat idi” sərlövhəli məqalədə Rusiya sülhməramlı qüvvələrinin Qarabağdakı komandanı Rüstəm Muradovun aprelin 8-də İrəvandan Bakıya səfəri şərh edilir.

Söhbət ondan gedir ki, 2020-ci il noyabrın sonunda, İkinci Qarabağ savaşı başa çatandan təqribən bir ay sonra Azərbaycan hərbiçiləri erməni yaraqlılarını saxlamışdı, Ermənistan onları hərbi əsirlər adlandırır, Azərbaycan tərəf isə hesab edir ki, bu şəxslər təxribatçılardır.

Aprelin 8-də Ermənistanda  həmin yaraqlıların buraxlacağı barədə söz-söhbət yayılmış, sülhməramlıların komandanı Muradov Bakıya səfər etmişdi, amma heç bir yaraqlı onlara təhvil verilməmişdi.

Aprelin 9-da isə mediaya açıqlamasında Muradov Ermənistan hakimiyyətini əsirlərin dəyişdiriləcəyi barədə yalan məlumat yayaraq təxribat törətməkdə təqsirləndirib.

Ermənistanın “Hraparak.am” sayıtının əməkdaşının Ermənistan rəsmilərinin Azərbaycanla əsirlərin dəyişdiriləcəyi barədə niyə yalan açıqlama verməsi sualına cavab olaraq Muradov deyir: “Bu, çirkin təxribat idi. Bunu onlardan soruşun, xalqı aldadırlar. Bakıdan əsirləri gətirəcəyimlə bağlı yazılanlar və deyilənlər yalandır. Ermənistanda bu xəbərləri yayanlar məqsədli provokasiya ilə məşğuldur, Bakıya adi səfər etmişəm”. 

Muradov Bakıya səfəri zamanı erməni hərbiçilərin azad olunmasının planlaşdırılmadığını da iddia edib.  

“Müsavat.com” saytı isə “Rüşvətlə razılıq, qonaqların ayrı-ayrı saatlarda dəvətilə və ...gizli toylar belə keçirilir” sərlövhəli məqalədə xəlvəti toyların keçirilməsi mexanizmi açıqlanır.

Söhbət ondan gedir ki, koronavirus infeksiyasına yoluxmanın qarşısını almaq üçün bir ildən çoxdur ki, toy şənliklərinin keçirilməsinə qadağa qoyulub.

Bu günlərdə isə müğənnilərdən biri gün ərzində Azərbaycanda 500-dən çox xəlvəti toy edilməsi barədə mediaya açıqlama vermişdir. Digər tərəfdən isə son günlər bəzi şadlıq saraylarının məsul şəxslərinin cərimələnməsi də açıqlamanın əsassız olmadığını təsdiqləyir. 

Daha sonra isə müəllif bildirir ki, toy sahibləri qonaqları 40-150 nəfər civarında qəbul edir, 350-400 nəfərlik toy edirsə qonaqları 100-100, 50-50 nəfər olmaqla müxətlif saatlarda dəvət edir.

Sosioloqlar məəsləyə66 ölkə miqyasında baxaraq deyirlər ki, toyları qadağaların müəyyən yumşaldılması ilə keçirmək mümkündür, amma burada  zəngin, vəzifəli, vəzifəsiz, hamı üçün eyni standartlar tətbiq olunmalıdır.

Müəllifə görə, toyların sadə şəkildə keçirilməsinin ənənəyə dönə bilməsi yaxşı olardı: “Lakin həyat öz normal qaydasına qayıdandan sonra əvvəlki adətlərə qayıdılması ehtimalı daha çoxdur”.

Sosioloqlar hesab edirlər ki, toyların hansısa standartlara uyğunlaşdırılması lazımdır və həm də vacib məsələdir.

“Azpolitika.info” saytı “Qəbələdə koronavirus tüğyan edir - Modul xəstəxana qapadılıb, insanlar köməksiz vəziyyətdə qalıb...” sərlövhəli məqalədə adı çəkilən rayonda koronavirus infeksiyasına yoluxma ilə bağl vəziyyət dəyərləndirilir.

Müəllif rayon sakinlərinə istinadən Qəbələdə koronavirusun tüğyan etdiyini, xeyli sayda rayon sakinin virusa yoluxduğunu, aralarında vəziyyəti ağır olanlar olduğunu da vurğulayır.

Müəllif əlavə edir ki, bir neçə kənddə yoluxma səviyyəsi yüksək olduğu üçün qeyri-rəsmi xüsusi rejim elan edilib: “Qəbələ sakinləri öldürücü virusun qarşısında köməksiz qalıblar. Rayonda ötən ilin yayında tikilən modul tipli koronavirus xəstəxanası bağlanıb, işləmir. Xəstələri qəbul edən, müalicə yazan həkim yoxdur”, deyə müəllif bildirir.

Müəllifin iddiasına görə, xəstələr dava-dərmanla təmin edilmir, tibb işçiləri sistem qoşmağa, iynə vurmağa belə gəlmirlər.

Müəllif bildirir ki, Qəbələ rayon Mərkəzi Xəstəxanasının rəhbərliyi xəstələrin yerləşdirilməsində problem olmadığını deyir, amma rayon sakinləri xəstəxana rəhbərliyinin yalan danışdığını iddia edir.