Pomidor istixanalarında videomonitorinq

Bakı/10.04.21/Turan: Azərbaycan Respublikasının Qida Təhlükəsizliyi Agentliyi Rusiya Federasiyasının Baytarlıq və Fitosanitar nəzarət üzrə Federal Xidmətinin (Rosselxoznadzor) mütəxəssislərini Azərbaycan istixanalarında yetişdirilən pomidorların təhlükəsiz və sağlamlıq üçün zərərsiz olduğuna inandırmaq məqsədilə videomonitorinq həyata keçirməyə başlayıb. Bu barədə Agentlik məlumat verib.

5-8 aprel tarixlərində “Rosselxoznadzor” mütəxəssisləri Azərbaycanda pomidor təsərrüfatlarının ümumi sahəsi, yetişdirilən sort, gözlənilən istehsal, istixananın işıq və istilik rejimi, yerinə yetirilən bitki mühafizə tədbirləri ilə tanış olublar. Rusiyalı mütəxəssislərin sualları cavablandırılıb, götürülmüş bitki və meyvə nümunələri Rusiya tərəfin müvafiq laboratoriyalarında müayinə edilməsi üçün nümunə paketlərinə qoyularaq göndərilib.

Qida Təhlükəsizliyi Agentliyinin məlumatına görə, videomonitorinq Abşeron, Salyan, Şəmkir, Samux rayonlarında yerləşən 10 təsərrüfatda aparılıb.

Agentlik və Rusiya Federasiyası ekspertlərinin işçi qrupu tərəfindən aparılan birgə videomonitorinqlər digər regionlarda yerləşən istixanalarda davam etdiriləcək. -0-