Rusiya və Azərbaycan Baş prokurorluq orqanları Niyyət bəyanatı imzalayıblar

Bakı/10.04.21/Turan: Azərbaycan Paş Prokurorluğu aprelin 8-də Rusiya Federasiyasının Baş prokuroru İqor Krasnovun rəhbərlik etdiyi nümayəndə heyətinin Bakıya səfəri barədə geniş məlumat yayıb.

Xəbərdə Azərbaycan və Ermənistan ictimaiyyətlərinin gözlədiklərindən fərqli olaraq, erməni əsirlərın qaytarılması barədə məlumat yoxdur. Səfər ərəfəsində və səfər zamanı iki ölkənin sosial şəbəkələrində Krasnovun Bakıya ermənilərin azad edilərək Yerevana qaytarılması məsələsinin həlli üçün gəldiyi barədə şaiyələr yayılırdı.

Amma, AR Baş Prokurorluğunun məlumatına görə, Bakıda rəsmi görüş zamanı "cinayətkarlığa qarşı mübarizə sahəsində əməkdaşlıq üzrə faydalı fikir mübadiləsi aparılıb, beynəlxalq təşkilatlar çərçivəsində qarşılıqlı fəaliyyətin səmərəliliyindən, hüquqi əməkdaşlıq sahəsində mövcud müqavilə bazasının təkmilləşdirilməsindən danışılıb, iki ölkənin hüquq-mühafizə, o cümlədən prokurorluq orqanları arasında konkret cinayət işləri üzrə hüquqi yardımın göstərilməsi, eləcə də cinayət törətmiş şəxslərin ekstradisiyası və sair məsələlər ətrafında müzakirələr aparılıb".

Baş prokurorlar əlaqələrin gələcəkdə daha da intensivləşdirilməsi məqsədilə “Azərbaycan Respublikasının Baş Prokurorluğu ilə Rusiya Federasiyasının Baş Prokurorluğu arasında əməkdaşlığın inkişaf etdirilməsi haqqında” Niyyət bəyanatı imzalayıblar.

Ermənilər iddia edirlər ki, Azərbaycanda, müxtəlif mənbələrin siyahılarına görə, 60-200 erməni hərbi əsiri saxlanılır. Azərbaycan tərəfi dəfələrlə əsirlərin deyil, diversantların həbs edildiyini və hərbi əsirlərə aid Cenevrə Konvensiyasının həmin insanlara aid olmadığını bəyan edib. -0-